الماتىداعى 5600 عيمارات جەر سىلكىنىسىنە ءتوزىمسىز

استانا. قازاقپارات - 2017-2018 جانە 2023-2024 -جىلدارى جۇرگىزىلگەن پاسپورتتاۋ جۇمىستارى الماتىداعى تەكسەرۋگە تارتىلعان 20 مىڭ نىساننىڭ 26 پايىزى جەر سىلكىنىسىنە ءتوزىمسىز ەكەنىن كورسەتكەن.

بۇل تۋرالى الماتى قالاسىن دامىتۋدىڭ 2025-جىلعا دەيىن بەس جىلدىق جوسپارىنىڭ جوباسىندا ايتىلعان.

- جىل سايىن قالادان 80 ك م راديۋستا 200-گە دەيىن ءالسىز جەر سىلكىنىسى بولادى. بۇل رەتتە، قارقىندىلىعى 2-دەن 4 بالعا دەيىنگى جەر سىلكىنىسى الماتى ءۇشىن فوندىق رەجيم بولىپ ەسەپتەلەدى. قالا اۋماعىندا 27 تەكتونيكالىق اقاۋلار بار. ولاردىڭ %60- دان استامى تاۋلى اۋماقتا ورنالاسقان، - دەپ جازىلعان قۇجاتتا.

دامۋ جوسپارىنداعى دەرەككە سەنسەك، قالاداعى تەكسەرۋدەن وتكەن 20 مىڭنان استام عيماراتتىڭ 5,6 مىڭىن جەر سىلكىنىسىنە ءتوزىمدى ەتىپ جوندەۋ كەرەك نەمەسە ءسۇرىپ تاستاۋ قاجەت.

- قالانىڭ سەيسميكالىق قاۋىپسىزدىك دەڭگەيىن باعالاۋ ءۇشىن سەيسمولوگيالىق باقىلاۋلار مەن زەرتتەۋلەردىڭ ۇلتتىق عىلىمي ورتالىعى «ەۋروستاندارت» نەگىزىندە سەيسميكالىق شاعىن اۋدانداستىرۋ كارتاسىن ازىرلەدى. وعان سايكەس قالا 9-10 بالدىق سەيسميكالىق ايماقتا ورنالاسقان. جەر سىلكىنىسىنە توزىمدىلىك تالاپتارىنا سايكەس كەلمەيتىن وبەكتىلەر مەن عيماراتتاردى انىقتاۋ ءۇشىن 2017-2018 جانە 2023-2024 -جىلدارى 20 مىڭنان استام وبەكتىگە پاسپورتتاۋ جۇرگىزىلدى. ولاردىڭ %26- ى (5,6 مىڭ وبەكت) سەيسميكالىق كۇشەيتۋدى نەمەسە بۇزۋدى تالاپ ەتەدى، - دەلىنگەن قۇجاتتا.

بۇعان دەيىن دەرەكتەردە شاھارداعى جەر سىلكىنىسىنە ءتوزىمسىز نىسانداردىڭ سانى 3 مىڭنىڭ توڭىرەگىندە ەكەنى ايتىلىپ كەلگەن.

ەسىمجان ناقتىباي

اۆتور