الماتىدا زاماناۋي ستاندارتقا ساي زەرتحانا اشىلدى

استانا. قازاقپارات - الماتىدا ماسساچۋسەتس تەحنولوگيالىق ينستيتۋتىنىڭ ستاندارتتارىنا ساي زەرتحانا اشىلدى، دەپ حابارلايدى 24kz.

زەرتحانا سيفرلىق وندىرىسكە ارنالعان زاماناۋي قوندىرعىلارمەن جابدىقتالعان. ەندى ساتپايەۆ ۋنيۆەرسيتەتىنىڭ ستۋدەنتتەرى 3D پرينتەرلەر، لازەرلىك كەسكىشتەر، فرەزەرلىك ستانوكتار جانە باسقا دا جابدىقتاردى پايدالانا وتىرىپ، جوبالارىن جۇزەگە اسىرا الادى. زەرتحانانىڭ اشىلۋى ءبىلىم ورداسىنىڭ 90 جىلدىعى مەن اكادەميك قانىش ساتبايەۆتىڭ 125 جىلدىعىنا وراي ۇيىمداستىرىلدى.

شاراعا دەپۋتاتتار، مەملەكەتتىك ورگانداردىڭ باسشىلارى، عالىمدار مەن شەتەلدىك قوناقتار قاتىستى. بۇگىن سونداي- اق ينجەنەرلىك ورتالىق پەن تەحنوپارك قولدانىسقا بەرىلدى. عىلىم جانە جوعارى ءبىلىم ءمينيسترى ساياسات نۇربەك ۋنيۆەرسيتەتتەردى مەملەكەت ەسەبىنەن عانا ەمەس، بيزنەستىڭ كومەگىمەن جاڭعىرتۋدىڭ ماڭىزدىلىعىن اتاپ ءوتتى.

ساياسات نۇربەك، ق ر عىلىم جانە جوعارى ءبىلىم ءمينيسترى:

- ەگەر دە جەكەمەنشىك كومپانيا جوعارى وقۋ ورىندارىمەن، عىلىمي-زەرتتەۋ ينستيتۋتتارىمەن بىرىگىپ، يننوۆاتسيالىق ءوندىرىس نەمەسە زەرتتەۋلەرگە اقشا قۇيعان جاعدايدا ينۆەستيتسيا بەرگەن جاعدايدا قازىرگى تاڭدا %150، جاڭا سالىق كودەكسىنىڭ جوباسىندا كىرگىزىلگەن، قابىلدانعان جاعدايدا %300- كە دەيىن جەڭىلدىكتەر الاتىن بولادى. سوندىقتان نەگىزگى ماقسات - ءوندىرىستى عىلىممەن ۇشتاستىرۋ.

قاناي رىسبەكوۆ، تاۋ-كەن مەتاللۋرگيا ينستيتۋتىنىڭ ديرەكتورى:

- ماگيسترانت، دوكتورانتتارىمىز ءوزىنىڭ زەرتتەۋ جۇمىستارىن وسى لابوراتوريالاردا ورىنداپ، سونىمەن قاتار وندىرىستەگى يندۋسترياداعى ماسەلەلەردى وسى لابوراتوريالاردىڭ كومەگىمەن جاساي الامىز. العاشقى ءبىزدىڭ ۇلكەن مولشەردەگى كونتراكتىلىك زەرتتەۋ دەيدى عوي، جاڭاعى كەلىسىمشارتتار جاسالىپ جاتىر.