الماتىدا وق اتقاندار كەشىرىم سۇراۋمەن سىتىلىپ كەتپەسىن - دەپۋتات قارۋ-جاراقتى تەكسەرۋدى ۇسىندى
استانا. KAZINFORM - ءماجىلىس دەپۋتاتى نارتاي سارسەنعاليەۆ الماتىدا توي ۇستىندە وق اتقانداردى جاۋاپقا تارتۋدى جانە قاراپايىم ازاماتتار قولىنداعى قارۋ-جاراققا ينۆەنتاريزاتسيا جۇرگىزۋدى ۇسىندى.

بۇل جونىندە دەپۋتات ق ر ىشكى ىستەر ءمينيسترى ەرجان سادەنوۆكە ساۋال جولدادى.
بۇعان دەيىن الەۋمەتتىك جەلىدە كولىكتە وتىرىپ اسپانعا وق اتقان ازاماتتاردىڭ بەينەجازباسى تاراعان ەدى. وقيعا الماتى وبلىسى ەڭبەكشى قازاق اۋدانىنىڭ تۇرگەن اۋىلىندا بولعان.
«ۇيلەنۋ تويى قۇرمەتىنە سەرۋەنگە شىققاندار اۆتومات پەن تاپانشادان وڭدى-سولدى وق جاۋدىرىپ قىزىق قۋعان. ونىسىن ابىروي كورىپ ۆيدەو-فوتوسىن الەۋمەتتىك جەلىگە جۇكتەگەن. بۇل دەگەنىڭىز تاۋەلسىز ەلدىڭ زاڭىن ەلەمەۋدىڭ، جازاسىز قالاتىندارىنا سەنىمدى بولۋدىڭ كوپە-كورنەۋ كورىنىسى ەمەس پە؟ ءسىز بەن ءبىزدىڭ اتا-اجەمىز، اتا-انامىز، بالا-شاعامىز، باۋىرلارىمىز، وتانداستىرىمىز جۇرەتىن كوشەدە قىزىق قۋىپ، وق جاۋدىرۋعا كىم رۇقسات بەردى»، - دەدى ن. سارسەنعاليەۆ ءماجىلىستىڭ جالپى وتىرىسىندا.
دەپۋتات پروكۋراتۋرا مەن سوت-تەرگەۋ ورگاندارى وقيعانى سارالاپ، وعان قاتىسى بار ازاماتتارعا زاڭعا ساي قاتاڭ جازا كەسۋى كەرەگىن ايتۋدا.
سونداي-اق، ىشكى ىستەر مينيسترلىگى قاراپايىم ازاماتتار قولىنداعى قارۋ-جاراققا ينۆەنتاريزاتسيا جۇرگىزىپ، زاڭعا سايكەس كەلمەيتىندەرىن تاركىلەۋى قاجەت. وسى سالانى رەتتەيتىن نورماتيۆتىك-قۇقىقتىق اكتىلەردى قاتاڭداتۋ قاجەتتىگى دە ايتىلدى.
«بۇل - جەلىككەن جاستاردىڭ ءجاي عانا بۇزاقىلىعى ەمەس، مەملەكەتتىك تارتىپكە، زاڭعا اشىق قارسىلىعى. حالىقتان، ەلدىڭ ىشكى قاۋىپسىزدىگى مەن قوعام تىنىشتىعىنا جاۋاپتى قۇقىق قورعاۋ ورگاندارىنان ەش ايىلىن جيماي، ءدوڭايبات كورسەتۋى. ايتپاقشى، وق اتقاندار بەينەكامەراعا قاراپ كەشىرىم سۇراپ جازادان قۇتىلىپ كەتپەۋ كەرەك. مۇنداي تاسىلدەن ەلدىڭ ابدەن ىعىرى شىقتى. ەرتەڭ بۇلارعا ەلىكتەۋشىلەر شىعىپ، اتىس ۇيىمداستىرسا نە بولماق؟ سول سەبەپتى بۇل زاڭ بۇزۋشىلارعا زاڭعا سايكەس شارا قولدانۋ پروتسەسى كوپكە جاريا تۇردە ءجۇرۋى ءتيىس»، - دەپ تالاپ ەتتى دەپۋتات.
وعان قوسا، از كۇندە ورتا مەكتەپ تۇلەكتەرى، ءتۇرلى وقۋ ورىندارىنىڭ بىتىرۋشىلەرى اتتەستات، ديپلوم الۋ كەشتەرىن جاپپاي اتاپ وتەدى. ءماجىلىس دەپۋتاتى تۇلەكتەرمەن، اتا-انالارمەن ءتۇسىندىرۋ جۇمىستارىن جۇرگىزۋدى، اۆتوكولىكپەن جارىساتىن جاستاردىڭ اپاتقا ۇشىراپ جازىم بولماۋى ءۇشىن جاعداي جاساۋدى ۇسىندى.
اۆتور
ايجان سەرىكجان قىزى