الماتىدا تۋريزم سالاسىنان تۇسكەن سالىق ءتۇسىمى ەكى ەسەگە ارتتى
الماتى. قازاقپارات - 2024 -جىلدىڭ توعىز ايىندا الماتىعا 1,7 ميلليون تۋريست كەلدى، بۇل 2023 -جىلدىڭ وسى كەزەڭىمەن سالىستىرعاندا %14,2- عا كوپ.

- قوناقتار سانىنىڭ ارتۋى قالا ەكونوميكاسىنا تىكەلەي اسەر ەتتى: تۋريزم سالاسىنان تۇسكەن سالىقتىق تۇسىمدەرى 11 ايدا 85,5 ميلليارد تەڭگە بولدى. بۇل وتكەن جىلعى كورسەتكىشتەن 2 ەسەگە ارتىق. نەگىزگى كاپيتالعا سالىنعان ينۆەستيتسيا 92,9 ميلليارد تەڭگەگە جەتتى، - دەپ حابارلادى اكىمدىكتەن.
جەكە قاراجات ەسەبىنەن قالادا 35 جاڭا ورنالاستىرۋ نىسانى اشىلدى، ونىڭ ىشىندە 20 قوناقۇي، 4 گلەمپينگ، 8 حوستەل جانە 3 قوناق ءۇي بار. بۇل 836 بولمە قوسىپ، تۋريستەردى قابىلداۋ ينفراقۇرىلىمىن ايتارلىقتاي نىعايتتى.

- 2025 -جىلى قالا ينۆەستورلاردى تارتۋدى، تۋريستىك ينفراقۇرىلىمدى دامىتۋدى جانە حالىقارالىق ارەناداعى ورنىن نىعايتۋدى جالعاستىرىپ، الماتىنى ورتالىق ازيانىڭ جەتەكشى تۋريستىك باعىتى رەتىندە ودان ءارى ىلگەرىلەتۋدى جوسپارلاپ وتىر، - دەپ اتاپ ءوتتى اكىمدىكتەن.
ەسكە سالايىق، الماتى ساياحاتتاۋعا تۇرارلىق ەڭ ۇزدىك ورىندار تىزىمىنە ەندى.
وسىعان دەيىن الماتىعا 1,7 ميلليوننان استام تۋريست كەلگەنى تۋرالى جازعان ەدىك.
الماتى - ەلدىڭ قارجىلىق، عىلىمي، مادەني جانە ەكونوميكالىق ورتالىعى عانا ەمەس، سونىمەن قاتار تۋريستىك ورتالىق. ونداعى تابيعاتتى، تاريحي جانە كورىكتى جەرلەردى تاماشالاۋعا، دەمالۋعا الەمنىڭ تۇكپىر-تۇكپىرىنەن تۋريستەر كوپتەپ كەلەدى.
الما مۇقانوۆا
اۆتور