الماتىدا «قازاقستان ارۋى - 2023» بايقاۋىنىڭ فيناليستەرى انىقتالدى
الماتىدا 14-جەلتوقسان كۇنى «قازاقستان ارۋى - 2023» ۇلتتىق سۇلۋلىق بايقاۋىنىڭ فينالى وتەدى. وعان كاستينگ پەن جارتىلاي فينالدىڭ ناتيجەسىندە ىرىكتەلىپ شىققان 25 قىز قاتىسادى. ولاردىڭ اراسىندا وڭىرلىك كەزەڭنىڭ جەڭىمپازدارى بار، دەپ حابارلايدى Kazinform.
بايقاۋعا قاتىسۋشى ارۋلارعا كەلەسىدەي نەگىزگى تالاپتار قويىلدى: جاسى 18-25 اراسىندا، بويى 165 س م- دەن كەم ەمەس، ق ر ازاماتى، تۇرمىسقا شىقپاعان بولۋى ءتيىس.
«نە سەبەپتى مۇنداي پارامەترلەر قويىلعانىن تۇسىندىرەيىن. بۇل شارتتاردى ءبىز ءوزىمىز ويلاپ تاپقان جوقپىز. «قازاقستان ارۋى» بايقاۋى ءۇش حالىقارالىق بايقاۋدىڭ، ياعني «الەم ارۋى»، «جەر ارۋى» جانە «عالام ارۋى» بايقاۋلارىنىڭ ليتسەنزياتى. ولارمەن جاساسقان كەلىسىمشارتتا بايقاۋدى وتكىزۋ ەرەجەلەرى تۋرالى ليسەنزيالىق قۇجات بار. ءبىز ولاردىڭ تالاپتارىنا سۇيەنەمىز جانە «الەم ارۋى» بايقاۋى سول پارامەترلەر بويىنشا قابىلدايدى»، - دەپ ءتۇسىندىردى ۇلتتىق سۇلۋلىق بايقاۋىنىڭ PR ديرەكتورى كامشات اكىمقوجا.
بايقاۋعا قاتىسۋشى قىزدار بايقاۋدىڭ ۇيىمداستىرۋ كوميتەتىنىڭ كاستينگ- بولىمىنەن ىرىكتەلىپ الىندى. سايتقا ەلىمىزدىڭ ءار وڭىرىنەن 30 مىڭعا جۋىق ءوتىنىش تۇسكەن. ودان بولەك، ۇيىمداستىرۋشىلار پارامەترلەرگە ساي كەلەتىن قىزداردى الەۋمەتتىك جەلى ارقىلى ءوز بەتىنشە ىزدەپ، شاقىرعان. ناتيجەسىندە ولاردىڭ ىشىنەن 25 قىز جارتىلاي فينالعا وتكەن. ولاردىڭ اراسىندا ءوڭىر جەڭىمپازدارى بار.
«فيللەر مەن باسقا زاتتارعا كەلەر بولساق، ارينە ەرەجەدە قىزدار تاتۋاجسىز، ۇزارتىلعان كىرپىكسىز، ۇلكەيتىلگەن ەرىنسىز بولۋى تۋرالى جازىلعان. ءبىزدىڭ فيناليست قىزداردىڭ اراسىندا جاساندى كورىنەتىن بىردە- ءبىر قىز جوق، ولاردىڭ بارلىعى وتە سۇلۋ… سونداي- اق ولاردىڭ كوپشىلىگى بۇگىندە جاقسى مودەلگە اينالعان»، - دەدى بايقاۋدىڭ كاستينگ- ديرەكتورى، بۇرىنعى «قازاقستان ارۋى»، «الماتى ارۋى» ديانا ابىشيەۆا.
«قازاقستان ارۋى» بايقاۋىنىڭ پرەزيدەنتى، بايقاۋدىڭ بۇرىنعى جەڭىمپازى ايداي يسايەۆا فيللەردى ەنگىزۋگە تىكەلەي تىيىم سالىنبايتىنىن ايتتى. سەبەبى الەمدىك بايقاۋلارعا كىرپىگى ۇزارتىلعان، جاساندى شاشتارى بار كوپتەگەن قىزدار قاتىسىپ ءجۇر.
«ءبىز الدىمەن سىرتقى كەلبەتكە قارايمىز. قازىر بەتتىڭ، ەرىننىڭ، سيممەترياسى بار، ەگەر ءسال وزگەرىس قوسسا بايقالماي قالادى. كەرىسىنشە ادەمى بولادى، ياعني ازداعان تۇزەتۋلەرگە تىيىم سالىنبايدى. ونىڭ ۇستىنە بىزدە كوسمەتولوگيا، دەرماتولوگيا وتە جاقسى دامىعان، سونداي- اق شاشتى بوياۋعا دا تىيىم سالىنبايدى. سوندىقتان تولىق تىيىم سالىنعان دۇنيە جوق. ەگەر جاساندى ەكەنى كورىنىپ تۇرسا، ول باسقا سۇراق»، - دەدى ايداي يسايەۆا.
بيىلعى بايقاۋ تابيعاتتى ساقتاۋ كونتەكسى اياسىندا «بولاشاقتى قورعا» ۇرانىمەن ءوتىپ جاتىر. بايقاۋدىڭ فينالى 14 -جەلتوقسان كۇنى الماتىدا رەسپۋبليكا سارايىندا ساعات 20:00-دە باستالادى. مۇندا التى نوميناتسيا بولادى: قازاقستان ارۋى، قازاقستاننىڭ ءبىرىنشى ۆيتسە- ارۋى، قازاقستان عالامى ارۋى، قازاقستان جەر ارۋى، كورەرمەندەر كوزايىمى سىيلىعى (بايقاۋدىڭ سايتىندا داۋىس بەرۋدىڭ قورىتىندىسى بويىنشا) جانە سپورتشى قىز نوميناتسياسى. جەڭىمپاز «قازاقستان ارۋى - 2023» اتاعىنا يە بولادى، 5 ميلليون تەڭگە كولەمىندە اقشالاي سىيلىققا يە بولىپ، قازاقستان اتىنان «الەم ارۋى» بايقاۋىنا قاتىسۋعا مۇمكىندىك الادى.
ۇيىمداستىرۋشىلار سونداي- اق تورەشىلەردىڭ قۇرامىندا وتكەن جىلعىداي شەتەلدىك ارتىستەردىڭ بولمايتىنىن ايتتى. ولاردىڭ ورنىنا وتاندىق بلوگەرلەر مەن شوۋ- بيزنەس جۇلدىزدارى شاقىرىلماق.
«بيىل وزدەرىن جاقسى كورسەتىپ، كورەرمەندەردىڭ نازارى تەك ولاردا بولۋى ءۇشىن قاتىسۋشى قىزدارعا ءمان بەرەمىز. اۋديتوريا مەن كورەرمەندەر ءبىزدىڭ قاتىسۋشى قىزدارىمىزدى باعالاعانىن قالايمىن»، - دەپ ءتۇسىندىردى كامشات اكىمقوجا.
ايتا كەتەيىك، سۇلۋلىق بايقاۋىنىڭ فينالىنا الينا يميروۆا، اياۋلىم الىمحاليەۆا، رابيعا ناسۋرۋللايەۆا، اياۋلىم ءسالىموۆا، سيەۆينچ تاجىبايەۆا، سابينا يدريسوۆا، داريا پودگورنايا، ناتاليا پەتري، مادينا ءالمۇحانوۆا، ايانا نۇرقاسىموۆا، ايشا نارىمبي، تىلەكشى بيسەمبايەۆا، اقتوتى جۇنىسبەكوۆا، ادەلينا باگۋمبايەۆا، ايبارشا لەكەروۆا، اياجان جۇماگەرەيەۆا، ديانا ەربوسىن، دارينا بايدىبەكوۆا، يانا پولىگالوۆا، ارۋجان قۋاتبايەۆا، مادينا ەشانوۆا، كارينا بريمجانوۆا، بوتاگوز نۇرجىگىتوۆا، اننا زورينا مەن ارۋجان ارىستان ەسىمدى ارۋلار قاتىساتىن بولادى.
اۆتور
دۋمان ارعىنگەلدى
