الماتىدا ق ق س بويىنشا شەكتى 15 ميلليون تەڭگەگە دەيىن تومەندەتۋ ماسەلەسى قارالدى
استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين الماتىدا بيزنەس وكىلدەرىمەن كەزدەستى، دەپ حابارلايدى ۇكىمەتتىڭ باسپا ءسوز قىزمەتى.
سونداي-اق كەزدەسۋگە قارجى ءمينيسترى ءمادي تاكيەۆ، ۇلتتىق ەكونوميكا ۆيتسە-ءمينيسترى ازامات ءامرين، «اتامەكەن» ۇ ك پ باسقارما ءتوراعاسى رايىمبەك باتالوۆ، جەڭىل ونەركاسىپ قاۋىمداستىعى، تۋريستىك كومپانيالار جانە باسقا دا سالالىق بيزنەس بىرلەستىكتەرى، 50-دەن استام ءىرى جانە شاعىن بيزنەس وكىلدەرى تاۋەلسىز ساراپشىلار قاتىستى.
كەزدەسۋدە ق ق س بويىنشا تىركەۋ بويىنشا شەگىن 15 ميلليون تەڭگەگە دەيىن تومەندەتۋ جانە ارنايى B2C رەجيمدەگى قىزمەت تۇرلەرىنىڭ اياسىن تارىلتۋ كاسىپكەرلەردىڭ كوتەرگەن نەگىزگى ماسەلەلەرى بولدى. سالىق تولەۋشىلەردى تىركەۋ ءۇشىن رەفورما شەڭبەرىندە بەلگىلەنگەن شەك شاعىن بيزنەستىڭ ودان ءارى جۇمىس ىستەۋىنە كەدەرگى بولۋى مۇمكىن جانە كاسىپكەرلەر سالىق سالۋدى بولدىرماۋ ءۇشىن ءوز كاسىپورىندارىن بولشەكتەۋگە نەمەسە ءوز قىزمەتىنىڭ ءبىر بولىگىن جاسىرۋعا ءماجبۇر بولادى.
- جىل سايىن مەملەكەت ق ق س بويىنشا ەسەپكە قويۋدىڭ جوعارى شەگىنە بايلانىستى بيزنەستى بولشەكتەۋدەن شامامەن 800 ميلليارد تەڭگە تابىس سالىعىن جوعالتادى. ءىس جۇزىندە بىزدە ورتا بيزنەس بار، ءبىراق زاڭ جۇزىندە جوق. بۇل تەتىكتەردى ەنگىزۋ – ق ق س بويىنشا ەسەپكە قويۋ شەگىن تومەندەتۋ جانە جەڭىلدەتىلگەن ارنايى رەجيم تەك B2C - بۇل كاسىپكەرلىككە قارسى كۇرەس ەمەس، كولەڭكەلى ەكونوميكاعا قارسى كۇرەس. سالىق تولەيتىن ادام تولەمەيتىندەرمەن ادال باسەكەلەسە المايدى. ال ءادىل سالىق سالۋعا ۇمتىلۋدا بيزنەستى جاپپاي قولداۋسىز مەملەكەتتىك ورگاندار كولەڭكەلى ەكونوميكامەن تولىققاندى كۇرەسە المايدى، - دەپ اتاپ ءوتتى ازامات ءامرين.
ەڭبەكاقى تولەۋ قورىنا جۇكتەمەنى ازايتۋ بويىنشا ساۋالدارعا دا جاۋاپ بەرىلدى. كاسىپكەرلەردىڭ الەۋمەتتىك سالىقتى جانە مىندەتتى زەينەتاقى جارنالارىن تولەۋدى جويۋ بولىگىندە بۇرىن ۇسىنىلعان رەفورما ق ق س مولشەرلەمەسى %20- عا دەيىن كوتەرىلگەن جاعدايدا جۇرگىزىلۋى مۇمكىن ەكەندىگى اتاپ ءوتىلدى. وندا مەملەكەت جۇمىس بەرۋشىنىڭ ورنىنا الەۋمەتتىك اۋدارىمداردى جابۋعا كىرىس الادى. ءبىراق قازىرگى ۋاقىتتا ۇسىنىلىپ وتىرعان %16 ق ق س مولشەرلەمەسىمەن الەۋمەتتىك اۋدارىمداردى وزگەرىسسىز قالدىرۋ ۇسىنىلادى.
كەزدەسۋدە سپورت كلۋبتارى، اقپاراتتىق قاۋىپسىزدىك، مەديتسينا، جەڭىل ونەركاسىپ، تۋريزم جانە باسقا دا سالالار بويىنشا بيزنەس وكىلدەرى ءسوز سويلەدى. كەزدەسۋ قورىتىندىسى بويىنشا سەرىك جۇمانعارين قاتىسۋشىلارعا سىندارلى ديالوگ ءۇشىن العىسىن ءبىلدىرىپ، بارلىق ۇسىنىس سالىق رەفورماسى جوباسىن ءماجىلىستىڭ قاراۋىنا شىعارار الدىندا ۇكىمەتتەگى جۇمىس توپتارىندا قارالاتىنىن اتاپ ءوتتى.
وسىعان دەيىن مەملەكەت باسشىسى بىرەر كۇن بۇرىن بيزنەس وكىلدەرىمەن كەزدەسۋدە قوسىلعان قۇن سالىعىنىڭ مولشەرلەمەسى سارالانىپ بەلگىلەنۋى تيىستىگىن ايتقان ەدى.
سونىمەن قاتار جاقىندا ۇكىمەت ق ق س مولشەرلەمەسىنە قاتىستى جاڭا ۇسىنىس ايتقانىن جازدىق.
كەشە پرەمەر-ءمينيستردىڭ ورىنباسارى تامارا دۇيسەنوۆا قوسىلعان قۇن سالىعى شەگىن كوتەرۋگە قاتىستى پىكىر ءبىلدىردى.
اۆتور
اينۇر تۋماكبايەۆا
