الماتىدا پلاستيكالىق وپەراتسيا جاساتقان ايەل كوز جۇمدى
استانا. قازاقپارات - ەلدە كوسمەتولوگيا، سونىڭ ىشىندە ەستەتيكالىق حيرۋرگيا نارىعى جىل ساناپ دامىپ بارادى، دەپ حابارلايدى 24KZ.

پلاستيكالىق وتانىڭ الۋان ءتۇرى بار. الايدا مۇنداي حيرۋرگيالىق وپەراتسيالاردىڭ ءبارى بىردەي ءساتتى اياقتالۋى ەكىتالاي. ماسەلەن، جىل باسىنان بەرى قازاقستاندىقتار تاراپىنان مەديتسينالىق قىزمەت ساپاسىنا قاتىستى 6 مىڭنان استام شاعىم تۇسكەن. سونىڭ 34- ءى كوسمەتولوگيالىق قىزمەتكە قاتىستى. الماتىدا وسىدان بىرنەشە كۇن بۇرىن ارتىق سالماقتان ارىلامىن دەپ وتا جاساتقان 47 جاستاعى ايەل كوز جۇمدى. اياقاستى ومىردەن وزعان مارقۇمنىڭ ءسىڭلىسى ونىڭ ومىرگە قۇشتار جان بولعانىن ايتادى. سوزىنشە، اپكەسىنىڭ دەنساۋلىعىندا ەشقانداي كىنارات بولماعان.
دينارا باتىرحانوۆا، مارقۇمنىڭ ءسىڭلىسى:
- كەشە ءبىز Instagram، جاڭاعى جەلىلەردەن وقىپ جاتىرمىز، سپورتپەن اينالىسسا، تاماعىن تىيدىرسا، اناۋ- مىناۋ بولار ەدى عوي دەپ. ءبىراق ول كىسى - سپورتپەن دە اينالىسقان، بەلسەندى ءومىر، سالاۋاتتى ءومىر سالتىن ۇستانعان كىسى. قانشا جەردەن ديەتا دا ۇستادى. ءبىراق ارتىق سالماقتان ايىرىلماعاننان كەيىن وسىنداي جاعدايعا كەلدى. ارتىق سالماق بولعاننان كەيىن اياعى ءىسىنىپ كەتكەن. ول ءبىر سۇلۋلىق قۋىپ، پيار جاسايىن دەپ جۇرگەن ادام ەمەس.
مارقۇمنىڭ تۋىستارى وتا جاساعان دارىگەرلەردىڭ جۇمىستارىنا سالعىرت قاراعانىنا سەنىمدى. «ءتىپتى كەلىسىمشارتتا پاتسيەنتتىڭ ومىرىنە قاۋىپ ءتونۋى مۇمكىن ەكەنى دە ەسكەرتىلمەگەن نە كورسەتىلمەگەن»، - دەيدى.
دينارا باتىرحانوۆا، مارقۇمنىڭ ءسىڭلىسى:
- كەلىسىمشارتتا اتى-ءجونى، ادرەسى، اناليزدەرى جونىندە، اقشا جونىندە ءبارى جازىلعان. ال بىلاي كادىمگى قاراپايىم كەلىسىمشارت دەيدى عوي. ەگەر دە ءبىر سول پۋنكتتە «ومىرىنە نۇقسان كەلەدى، سونداي جاعدايدا ءبىز وسىنداي، وسىلاي ىستەيمىز، وسىنداي كەزدە سىزدەردىڭ قارسىلىقتارىڭىز بولماسا، وسىنداي نارسە بولۋى مۇمكىن، بۇل - وتە اۋىر وپەراتسيا» دەپ جازىلسا، ءبىز وندا ونى وقىپ، ءتۇرتىپ الار ەدىك.
قۇرالايعا وتا جاساعان حيرۋرگ بولعان جاعدايعا قاتىستى قانداي دا ءبىر پىكىر بىلدىرۋدەن باس تارتتى. الايدا كلينيكانىڭ الەۋمەتتىك جەلىدەگى پاراقشاسىندا ول ءوز اتىنان جازبا جاريالاپتى. ول جەردە حيرۋرگ تەرگەۋ ءجۇرىپ جاتقاندىقتان، وقيعاعا قاتىستى ەشتەڭە ايتا المايتىندىعىن مالىمدەگەن. الدىن الا بولجام بويىنشا ءولىم سەبەبى - ميوكارد ينفاركتىسى. الايدا مارقۇمنىڭ تۋىستارى بۇل بولجاممەن كەلىسپەيدى. پوليتسياعا شاعىم ءتۇسىردى.
سالتانات ازىربەك، الماتى قالاسى پ د رەسمي وكىلى:
- اتالمىش دەرەك بويىنشا قىلمىستىق ءىس قوزعالدى. ادام ءولىمىنىڭ سەبەبىن انىقتاۋ ماقساتىندا سوت- مەديتسينالىق ساراپتاما تاعايىندالدى. ساراپتامالىق زەرتتەۋلەر مەن تەرگەۋ ارەكەتتەرى ناتيجەسىندە قىلمىستىق ءىس اياسىندا پروتسەسسۋالدىق شەشىم قابىلداناتىن بولادى.
كەيىنگى كەزدە كوسمەتولوگيالىق قىزمەتتەردىڭ ساپاسىنا قاتىستى ەلدە شاعىم كوبەيگەن. جىل باسىنان بەرى قۇزىرلى ورگاندارعا 34 ارىز ءتۇسىپتى.
قۇرالايدىڭ ارتىندا جان جارى، 3 بالاسى قالدى. تۋىستارى سوت- مەديتسينالىق ساراپتاما قورىتىندىسىن كۇتىپ وتىر.