الماتىدا جىلجىمايتىن مۇلىك ساتىپ الۋدان بۇرىن نەنى ءبىلۋ كەرەك
الماتى. KAZINFORM - بىلتىر جىل باسىنان بەرى سوتتارعا زاڭناما مەن قۇرىلىس نورمالارىنىڭ تالابىن بۇزعانى ءۇشىن 230 تالاپ ارىز جولداندى. ونىڭ ىشىندە 96 نىسان تولىق نەمەسە جارتىلاي بۇزۋدى تالاپ ەتەدى.

الماتى اكىمدىگىنىڭ مالىمەتىنشە، بۇزۋعا جاتاتىن نىسانداردىڭ ىشىندە تۇرعىن ءۇي كەشەندەرى مەن تاۋنحاۋستار بار. مىندەتىنە سالعىرت قاراعان قۇرىلىس سالۋشىلار ونداعى ءبىرقاتار پاتەردى ساتقان. كوبىنەسە قۇرىلىس سالۋشىلار قولدانىستاعى زاڭناماعا سايكەس ۇلەسكەرلەردىڭ قاراجاتىن تارتۋ ءۇشىن 3 قاباتقا دەيىنگى تۇرعىن ۇيلەرگە رۇقسات تالاپ ەتىلمەيتىندىگىن پايدالانادى. بۇل كوبىنەسە باستاپقى جىلجىمايتىن مۇلىك نارىعىنداعى كۇماندى مامىلەلەرگە ىقپال ەتەدى. بۇل جاعدايدا تەكسەرۋ مەن سوت تالقىلاۋىن جۇرگىزۋدىڭ قۇقىقتىق نورماسىندا بەلگىلەنگەن راسىمدەرىنىڭ ۇزاقتىعى مىندەتىنە سالعىرت قاراعان جاۋاپسىز قۇرىلىس سالۋشىعا زاڭسىز نىساندا پاتەرلەر مەن تۇرعىن ەمەس ءۇي-جايلاردىڭ بەلگىلى ءبىر سانىن ساتۋعا مۇمكىندىك بەرەدى.
الماتىنىڭ قالا قۇرىلىسىن باقىلاۋ باسقارماسى جۇيەلى تۇردە بۇقارالىق اقپارات قۇرالدارى قالا تۇرعىندارىن قۇلاقتاندىرۋ ءۇشىن جىلجىمايتىن مۇلىك ساتىپ الۋعا ۇسىنىلمايتىن تۇرعىن ءۇي كەشەندەرى تۋرالى اقپارات جاريالاپ وتىرادى. https://kaz.inform.kz/news/almatida-satip-aluga-usinilmaytin-uyler-tzm-shikti-af317f/
«الايدا جىلجىمايتىن مۇلىك نارىعىنداعى مامىلەدەگى شىعىنداردى بولدىرماۋ ءۇشىن قۇرىلىس سالۋشىدان تولىق رۇقسات قۇجاتتارىن تالاپ ەتۋ نەمەسە قالا قۇرىلىسىن باقىلاۋ باسقارماسىنىڭ 77058966000+ WhatsApp انىقتامالىق ارناسى ارقىلى ءتيىستى قۇجاتتارىنىڭ بار-جوعى تۋرالى سەنىمدى اقپارات الۋ قاجەت ەكەنىن ۇمىتپاعان ءجون. قالا قۇرىلىسى جانە ۋربانيستيكا باسقارماسىنان قۇرىلىس سالۋشىدان ۇلەسكەرلەردىڭ قاراجاتىن تارتۋعا رۇقساتتىڭ بولۋى تۋرالى اقپارات الۋعا بولادى»، - دەپ اتاپ ءوتتى اكىمدىكتەن.
ەگەر تۇتىنۋشى جىلجىمايتىن مۇلىكتى زاڭسىز نىساندا ساتىپ السا، قۇرىلىس سالۋشى قاراجاتتى قايتارۋدان باس تارتقان جاعدايدا الماتى قالاسى بويىنشا ەكونوميكالىق تەرگەۋ دەپارتامەنتىنە جانە قۇقىق قورعاۋ ورگاندارىنا وتىنىشپەن جۇگىنۋى كەرەك.
باسقارما سونىمەن قاتار وسى نىسانداردىڭ ءبىرقاتارى نەلىكتەن جارتىلاي سالىنعانىن جانە ولاردىڭ قۇرىلىسى باستاپقى كەزەڭدە قانداي سەبەپپەن توقتاتىلماعانىن ءتۇسىندىردى.
«قازىرگى تاڭدا ساۋلەت-قۇرىلىس باقىلاۋ ورگاندارى قۇرىلىس نىساندارىنا كەدەرگىسىز بارۋ قۇقىعىنان ايىرىلدى. جوسپاردان تىس تەكسەرۋلەر ق ر كاسىپكەرلىك كودەكسىمەن رەگلامەنتتەلەدى جانە تەك رەسمي ءوتىنىش نەگىزىندە جۇرگىزىلەدى. وسىلايشا، زاڭسىز قۇرىلىس فاكتىسىن تىركەۋ جانە قۇرىلىس سالۋشىعا شارا قولدانۋ ءۇشىن جوسپاردان تىس تەكسەرۋ جۇرگىزۋ قاجەت»، - دەلىنگەن حابارلامادا.
رەسمي ءوتىنىش العاننان كەيىن ماتەريالداردى جيناۋدىڭ جانە تەكسەرۋدى ق ر ب پ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ باسقارماسىندا تىركەۋ پروتسەسى جۇرەدى. تەكسەرۋ قورىتىندىسى بويىنشا بۇزۋشىلىق انىقتالعان جاعدايدا، ولاردى جويۋعا جانە قۇرىلىس- مونتاج جۇمىستارىن توقتاتا تۇرۋعا نۇسقاما بەرىلەدى.
نۇسقاما مەرزىمى وتكەننەن كەيىن تەكسەرۋ سۋبەكتىسى نۇسقاما تالاپتارىنىڭ ورىندالۋى تۋرالى اقپارات بەرۋگە ءتيىس. ەگەر بۇزۋشىلىق جويىلماسا، ماتەريالدار جۇمىستاردى توقتاتا تۇرۋ جانە اكىمشىلىك جاۋاپكەرشىلىككە تارتۋ تۋرالى پروتسەستىك شەشىم قابىلداۋ ءۇشىن مامانداندىرىلعان اۋدانارالىق اكىمشىلىك سوتقا جىبەرىلەدى. سودان كەيىن نىساندى بۇزۋ تۋرالى ازاماتتىق تارتىپتە سوتقا تالاپ ارىز جىبەرىلەدى. سوت ۇدەرىستەرى نىساننىڭ كولەمىنە جانە ءىستىڭ كۇردەلىلىگىنە بايلانىستى بىرنەشە ايعا سوزىلادى.
ايتا كەتۋ كەرەك، زاڭسىز قۇرىلىس ماسەلەسى الماتى اكىمى ەربولات دوسايەۆتىڭ ەرەكشە باقىلاۋىندا. قالا باسشىسىنىڭ تاپسىرماسىمەن مەگاپوليس بويىنشا تالاپ قويۋ قىزمەتىنىڭ ناتيجەسىنە سايكەس، وتكەن جىلدان باستاپ 35 زاڭسىز نىسان تولىق نەمەسە جارتىلاي بۇزىلدى. ونىڭ ىشىندە بيزنەس ورتالىقتار، مەيرامحانالار، قوسالقى عيماراتتار مەن اۆتوسەرۆيستەر، سونداي-اق «مەچتا» جانە KHAN سياقتى ءىرى تۇرعىن ءۇي كەشەندەرى بار.
اۆتور
الما مۇقانوۆا