الماتىدا جول ەرەجەسىن بۇزعان جۇرگىزۋشى 15 تاۋلىككە قاماۋعا الىندى

الماتى. KAZINFORM - الماتى قالاسىندا پوليتسيا قىزمەتكەرلەرى جول قوزعالىسى ەرەجەلەرىن بىرنەشە رەت ورەسكەل بۇزعان Mercedes كولىگىنىڭ جۇرگىزۋشىسىن انىقتاپ، جاۋاپقا تارتتى.

پوليتسيا دەپارتامەنتىنىڭ مالىمەتىنشە، قۇقىق بۇزۋشى اكىمشىلىك كودەكستىڭ جەتى بابى بويىنشا جاۋاپكەرشىلىككە تارتىلدى.

- ول مانيەۆر جاساۋ ەرەجەلەرىن بۇزعان، كولىكتى جۇرگىزۋشى كۋالىگىنسىز باسقارعان، اپاتتى جاعداي تۋعىزعان، كولىك قۇرالدارىن پايدالانۋ ەرەجەلەرىن ساقتاماعان، كولىكتى باسقارۋ كەزىندە ۇيالى تەلەفون پايدالانعان جانە پيروتەحنيكالىق بۇيىمداردى زاڭسىز قولدانعان. بۇل ارەكەتتەردىڭ ناتيجەسىندە جالپى سوماسى 95 ايلىق ەسەپتىك كورسەتكىشتى (373540 تەڭگە) قۇرايتىن ايىپپۇل سالىندى، - دەپ اتاپ ءوتتى الماتى قالالىق پوليتسيا دەپارتامەنتى جەرگىلىكتى پوليتسيا قىزمەتى باسقارماسى باستىعىنىڭ ورىنباسارى تيمۋر نوعايبايەۆ.

سونىمەن قاتار ءتارتىپ بۇزۋشى ۇساق بۇزاقىلىق جاساعانى ءۇشىن دە جاۋاپقا تارتىلدى. الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ شەشىمىمەن ول 15 تاۋلىككە قاماۋعا الىندى. Mercedes كولىگى ارنايى ايىپپۇل تۇراعىنا قويىلدى.

الماتى پوليتسياسى ازاماتتارعا جول ەرەجەلەرىن قاتاڭ ساقتاۋدى جانە ءاربىر جول قوزعالىسىنا قاتىسۋشىنىڭ جەكە جاۋاپكەرشىلىگىن كۇشەيتۋدى ەسكەرتەدى.

وسىعان دەيىن الماتىدا 33 جول اپاتى بولعانىن جازعان ەدىك.

اۆتور

الما مۇقانوۆا