الماتىدا جۇرەگىندە ىسىگى بار ناۋقاسقا كۇردەلى وتا جاسالدى
الماتى. KAZINFORM - الماتى قالالىق كارديولوگيا ورتالىعىنىڭ دارىگەرلەرى جۇرەك ىشىلىك ۇلكەن ىسىگى بار ناۋقاسقا - سول جاق اتريۋم ميكسوماسىن الىپ تاستاۋ وپەراتسياسىن جاسادى.
الماتى قالالىق دەنساۋلىق ساقتاۋ باسقارماسىنان ءمالىم ەتكەندەي، ناۋقاس، 53 جاستاعى ەر ادام، ەنتىگۋ مەن جۇرەك سوعۋىنا شاعىمدانعان. جۇرەككە ۋلترادىبىستىق زەرتتەۋ جۇرگىزگەننەن كەيىن سول جاق اتريۋمنىڭ جازىقتىعىندا جىلجىمالى ولشەمى شامامەن 6 س م ىسىك ءتىزىلىمى - سول جاق قارىنشانىڭ قۋىسىنا پرولابيرلەنگەن ميكسوما انىقتالدى.
دارىگەرلەردىڭ ايتۋىنشا، ىسىك ناۋقاستىڭ ومىرىنە قاۋىپ ءتوندىردى. ويتكەنى ول بولشەكتەنۋى مۇمكىن جانە ونىڭ بولىكتەرى قانعا ءتۇسىپ، مي جانە باسقا دا ماڭىزدى مۇشەلەردى قامتاماسىز ەتەتىن قان ارتەريالارىنىڭ بىتەلۋىنە اكەلۋى مۇمكىن.
«اتالعان جاعدايدا بۇل اسىرەسە وزەكتى بولدى، سەبەبى ول بىرنەشە جىل بۇرىن ينسۋلت العان. ناۋقاسقا جەدەل تۇردە جاساندى قان اينالىمى جاعدايىندا ىسىكتى الىپ تاستاۋ وتاسى جاسالدى. وتا ەكى ساعاتقا سوزىلدى جانە اشىق ادىسپەن جۇرگىزىلدى. حيرۋرگيالىق ارالاسۋ كەزىندە ميكسوما مولشەرى ۋلترادىبىستىق زەرتتەۋگە قاراعاندا ۇلكەنىرەك 9 س م- دەن اساتىنى انىقتالدى»، - دەيدى كارديوحيرۋرگيا مەڭگەرۋشىسى نۇرجان مۇسىرەپوۆ.
وتا ءساتتى ءوتتى. قازىر پاتسيەنت دارىگەرلەردىڭ باقىلاۋىندا. ونىڭ ومىرىنە ەش قاۋىپ ءتونىپ تۇرعان جوق.
اۆتور
الما مۇقانوۆا
