الماتىدا جۇرەك اۋىستىرۋ وپەراتسياسى ءساتتى ءوتتى
استانا. قازاقپارات - الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا دونورلىق جۇرەك ترانسپلانتاسياسى ءساتتى ءوتتى. 6 ساعاتقا سوزىلعان كۇردەلى وپەراتسيا بەلگىلى كارديوحيرۋرگ يۋري پيانىڭ جەتەكشىلىگىمەن جاسالدى.

دونوردىڭ جۇرەگىن سالعان 43 جاستاعى پاتسيەنتتىڭ جاعدايى قازىر تۇراقتى. ايتا كەتەيىك، بۇل جۇرەك ترانسپلانتاسياسى بويىنشا الماتىداعى ەكىنشى ءساتتى وپەراتسيا. الماتى وبلىسىنىڭ تۇرعىنى 45 جاستاعى ەر ادامدا مي ءولىمى انىقتالعاننان كەيىن مارقۇمنىڭ تۋىستارى ونىڭ اعزالارىن الۋعا كەلىسىم بەرەدى. مەديتسينالىق كورسەتىلىمدەر بويىنشا دونورلىق جۇرەك كۇتۋ تىزىمىندە تۇرعان 43 جاستاعى الماتىلىق داۋرەن اتامبەكوۆكە سايكەس كەلىپ، 20-قاڭتاردا دارىگەرلەر ترانسپلانتاسيا جاسادى.
داۋرەن ديلاتاتسيالىق كارديوميوپاتيا دەرتىنە شالدىققان. ۇزاق ۋاقىت بويى ەنەرگەتيكالىق سۋسىنداردى شامادان تىس تۇتىنعاندىقتان اۋرۋى اسقىنىپ كەتكەن.
داۋرەن اتامبەكوۆ، ناۋقاس:
- جاستارعا ايتاتىنىم ءبىرىنشى، وسى حالگە تۇسىرگەن مەنى ەنەرگەتيك كوپ ىشەتىنمىن. جۇمىستى كوپ ىستەيمىن. ەنەرگەتيكتىڭ قانداي زياندى ەكەنىن ەندى ءتۇسىندىم. جاستارعا ايتارىم، قارا سۋ ىشسەڭدەر دە ەنەرگەتيك ىشپەڭدەر. دارىگەر مىرزالارعا مىڭ دا ءبىر العىس.
قازىر ناۋقاستىڭ جاعدايى ءبىرقالىپتى، تۇراقتى، دەيدى دارىگەرلەر. اۋرۋحانادا تاعى ءبىر اپتا جاتقان سوڭ وڭالتۋ بولىمىنە جىبەرىلەدى.
رۇستەم تولەۋتايەۆ، كارديوحيرۋرگيا ءبولىمىنىڭ باسشىسى:
- رەانيماتسيادان بولىمگە اۋىسقاندا ول ناۋقاستىڭ تۇراقتى جاعدايى بولىپ سانالادى. ەندى بۇل جاڭا جۇرەكتىڭ ۇزاق جۇمىسىنا ارينە پاتسيەنتتىڭ ءومىر سالتى وزگەرۋ كەرەك. بۇعان قوسىمشا ءبىز ءوز جاعىمىزدان قوسىمشا دارىلەر بەرەمىز، كوپتەگەن دارىلەر. جىل سايىن ول دارىلەردىڭ سانى ازايادى. ءبىراق پاتسيەنت ءومىر بويى ءدارى ىشەدى. سول كەزدە جۇرەك تۇراقتى ۇزاق جۇمىس ىستەيدى.
ەلىمىزدە كارديوحيرۋرگيا مەن كارديورەانيماتسيانىڭ دامۋ دەڭگەيى جوعارى. جۇرەكتى ترانسپلانتاسيالاۋ وپەراتسيالارىنداعى وڭ ناتيجەلەر سونىڭ دالەلى.
مارات پاشيموۆ، «كارديولوگيا جانە ىشكى اۋرۋلار ع ز ي» ا ق باسقارما ءتوراعاسى:
- قازاقستان بويىنشا دونور جۇرەگىنە مۇقتاج 140 ادام بار. ولاردىڭ قاتارىندا 5 بالا دا كۇتۋ پاراعىندا كەزەكتە تۇر. مەنىڭشە، مۇنداي وپەراتسيالاردى ءبىز جالعاستىرۋىمىز كەرەك. بۇل جۇرەك اۋرۋىنا شالدىققان ازاماتتاردىڭ ءومىرىن ۇزارتۋعا مۇمكىندىك بەرەدى.
دارىگەرلەر مارقۇمنىڭ اعزالارىن الۋعا كەلىسىم بەرگەن تۋىستارىنا العىسىن جەتكىزدى. دونوردان جۇرەگىمەن قاتار ەكى بۇيرەگى، وكپە جانە كوز قابىعى الىندى. بۇل اعزالار اۋىر كەسەلگە شالدىققان ءتورت ناۋقاستىڭ ءومىرىن ساقتاپ قالدى.
24.kz