الماتىدا جانجال شىعارعان 6 ءۇندىستاندىق ستۋدەنت دەپورتاتسيالانادى - ساياسات نۇربەك

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك الماتىدا جاپپاي توبەلەس شىعارعان ءۇندىستاندىق ستۋدەنتتەر تۋرالى پىكىر ءبىلدىردى.

ونىڭ ايتۋىنشا، جانجالعا تەك قانا ءۇندىستاندىق ستۋدەنتتەر قاتىسقان، قازاقستاندىق ستۋدەنتتەردىڭ قاتىسى جوق.

قازىرگى ۋاقىتتا الماتى پوليتسيا دەپارتامەنتى تەرگەۋ جۇرگىزىپ جاتىر.

- سول تەرگەۋدىڭ ناتيجەلەرىن كۇتەمىز. ءۇندىستان ەلشىلىگىمەن تىكەلەي بايلانىستامىن، ەلشىمەن دە سويلەستىم. وسىلايشا، بىرلەسىپ، جانجالعا قاتىسقان ستۋدەنتتەردى دەپورتاتسياعا جىبەرۋ شەشىمىن قابىلدادىق. بۇل ءبىزدىڭ ىشكى ناقتى پوزيتسيامىز. جاقىندا پرەزيدەنتىمىز «انا ءتىلى» گازەتىنە سۇحبات بەردى. كەز كەلگەن شەتەلدەن كەلگەن ازاماتتار ءوز ەلىندە قالاي زاڭ ساقتاسا، قازاقستاندا دا سولاي قاتاڭ زاڭ ساقتاۋعا مىندەتتى. سوندىقتان تەرگەۋ شەشىمى قانداي بولسا دا، ءبىز ءۇندىستان ەلشىلىگىمەن بىرلەسىپ، 6 ستۋدەنتتى دەپورتاتسياعا جىبەرەمىز، - دەدى مينيستر ۇكىمەتتە وتكەن بريفينگتە.

بۇعان دەيىن اتىراۋ وبلىسىندا توبەلەستەن 1 ادام مەرت بولىپ، 2-ەۋى اۋرۋحاناعا تۇسكەنىن جازدىق.

ايجان سەرىكجان قىزى

اۆتور