الماتىدا الداعى ەكى كۇن بويى جاۋىن جاۋادى

الماتى. KAZINFORM - الماتىدا نوسەر جاڭبىر كەزىندە سۋ باسۋدى بولدىرماۋ ءۇشىن 465 ارنايى تەحنيكا مەن 820 جۇمىسشى جۇمىلدىرىلادى.

الماتى اكىمدىگىنىڭ مالىمەتىنشە، 9-ساۋىردە ساعات 16:00-دەن 20:00-گە دەيىن جاۋىن-شاشىن تۇسەدى دەپ بولجانىپ وتىر.

«320 جۇمىسشى مەن 96 ارنايى تەحنيكانىڭ كۇشىمەن سۋدىڭ كەدەرگىسىز ءوتۋىن قامتاماسىز ەتۋ ماقساتىندا ارىق جەلىلەرىن، ارىق وتكەلدەرىن جانە قوقىسقا ارنالعان «ويىق جەرگە» تازالاۋ جۇمىستارى جۇرگىزىلۋدە. جاۋىن-شاشىن كەزىندە سۋ باسۋدىڭ الدىن الۋ جانە پروبلەمالىق ۋچاسكەلەردە سۋدىڭ كەدەرگىسىز ءوتۋىن قامتاماسىز ەتۋ ءۇشىن شانتس قۇرالىمەن جابدىقتالعان 52 جەدەل موبيلدى بريگادانىڭ كەزەكشىلىگى ۇيىمداستىرىلادى. 2 مىڭنان استام قاپ قۇم دايىندالدى. كۇندىز 465 ارنايى تەحنيكا، 29 موتوپومپا جانە 820 جول جۇمىسشىسى جۇمىلدىرىلادى»، - دەپ حابارلادى اكىمدىكتە.

سونداي-اق، اكىمدىكتە اۋا-رايىنىڭ بۇزىلۋىنا بايلانىستى جۇرگىزۋشىلەرگە اعاشتاردىڭ قۇلاۋ جانە ەلەكتر جەلىلەرىنىڭ ءۇزىلۋ قاۋپىنە بايلانىستى اۆتوكولىكتى جول جيەگىنە قويماۋعا كەڭەس بەردى. سۋ تاسقىنىنىڭ الدىن الۋ ءۇشىن قالا تۇرعىندارىنان ارىق پەن كانالدى قوقىسقا تولتىرىپ، بىتەپ تاستاماۋدى سۇرادى. قانداي دا ءبىر اۋماقتى سۋ باسسا، جەدەل شارا قولدانۋ ءۇشىن اۋدان اكىمدىكتەرىنە جۇگىنۋگە نەمەسە 77066898898 Whats app نومىرىنە حابارلاما جازۋعا بولادى.

اۆتور

دۋمان ارعىنگەلدى