الماتىدا الۋان ءتۇرلى قامشى جۇرت نازارىنا ۇسىنىلدى

қамшы
Фото: Мұрат Аяған/Kazinform

استانا. قازاقپارات - قازاقتىڭ قامشىسى قايتا جاڭعىردى. ناۋرىزناما اياسىندا الماتىدا زاماناۋي قامشىلاردىڭ تۇساۋكەسەرى ءوتتى. «رۋنا قامشى»، «تاڭبالى قامشى»، قىزدارعا ارنالعان «ارۋ» قامشى كوپشىلىك نازارىنا ۇسىنىلدى.

بالالارعا ارنالعان «بىلگە» قامشىدا قازاقتىڭ ءان كۇيلەرى، اڭىز ەرتەگىلەرى، جاڭىلتپاش، ماقال-ماتەلدەرى توپتاستىرىلعان. بالا ءارى ويناپ، ءارى تۇركى جۇرتىنىڭ ورتاق قۇندىلىعى قامشىنىڭ نە ەكەنىن ساناسىنا ءسىڭىرىپ وسەدى. راس، قامشىنى قازىر مال ايدايتىن قۇرال رەتىندە تانيمىز. الايدا ەر ازاماتتىڭ بەدەلىن تانىتاتىن، رۋحىن كوتەرەتىن قامشىنىڭ قاسيەتى تەرەڭدە، دەيدى ۇيىمداستىرۋشىلار.

جاڭا زامانعا لايىقتالعان سمارت قامشىلار قاتارىندا تانىمال ونەر ادامدارىنىڭ اندەرى ەنگىزىلگەن قامشىلار دا بار. شارا اياسىندا ەتنوگراف عالىم بولات بوپاي ۇلىنىڭ «ادامزات رۋحى - قامشى» كىتابى تانىستىرىلدى. كىتاپتا قامشىنىڭ 70 تەن اسا ءتۇرىنىڭ انىقتاماسى بەرىلگەن.

ءبىلال قۋانىش، اقپارات اگەنتتىگىنىڭ جەتەكشىسى:

- اتيللانى بۇكىل ەۋروپا تاريحشىلارى ءتاڭىردىڭ قامشىسى دەيدى، شىڭعىس حاندى الەمدى قامشىمەن جاۋلاعان دەيدى. التىن ادامنىڭ جانىنا قامشىسى قوسا جەرلەنگەن. ەندى سونداي ءبىزدىڭ بابالارىمىزدىڭ بۇكىل دالانى بيلەگەن ۇلىلىعىن كورسەتۋ ءۇشىن ءبىز قامشىنىڭ قاسيەتىن ۇمىتپاۋىمىز كەرەكپىز، سونى ۇلىقتاۋىمىز كەرەكپىز.

www.24.kz

سوڭعى جاڭالىقتار