الماتىدا اۋداننىڭ بۇرىنعى اكىمى تەندەرگە نەگىزسىز كەدەرگى كەلتىرگەن

استانا. KAZINFORM - الماتى قالاسىنىڭ پروكۋراتۋراسى مەملەكەتتىك ساتىپ الۋدى ۇيىمداستىرۋ بارىسىندا جەرگىلىكتى اتقارۋشى ورگاندار جىبەرەتىن زاڭ بۇزۋشىلىقتاردى انىقتادى، دەپ حابارلايدى ق ر باس پروكۋراتۋراسىنىڭ باسپا ءسوز قىزمەتى.

مىسالى، مەملەكەتتىك ساتىپ الۋعا قاتىسۋشىلاردا سايكەس رۇقساتتىڭ (ليتسەنزيا) بولۋىنا قاراماستان، تاپسىرىس بەرۋشى (ۇيىمداستىرۋشى) ولاردىڭ كونكۋرستىق وتىنىمدەرىن نەگىزسىز كەرى قايتارعان، ەگەر ولار كونكۋرسقا جىبەرىلگەندە، 100 ميلليون تەڭگەدەن استام بيۋدجەت قاراجاتىن ۇنەمدەۋگە بولاتىن ەدى.

كورسەتىلگەن قۇقىق بۇزۋشىلىقتار ءۇشىن بۇرىنعى اۋدان اكىمىنە 9.2 ميلليون تەڭگە اكىمشىلىك ايىپپۇل سالىنىپ، اكىمشىلىك جاۋاپكەرشىلىككە تارتىلدى.

سونىمەن قاتار قالا اكىمدىگىنىڭ قۇرىلىمدىق بولىمشەلەرىنىڭ باسشىلارىنا 43.3 ميلليون تەڭگەگە 161 ايىپپۇل سالىنىپ، اكىمشىلىك جاۋاپكەرشىلىككە تارتىلدى.

باسقا جاعدايدا، تاپسىرىس بەرۋشىلەردىڭ ءبىرى كونكۋرس جاريالاۋ كەزىندە تاۋارلاردى، جۇمىستاردى جانە قىزمەتتەردى بىرتەكتى تۇرلەرى مەن ولاردى جەتكىزۋ ورنى بويىنشا بولمەگەن، وسىلايشا ءىرى كاسىپكەرلەرگە ارتىقشىلىق بەرە وتىرىپ، شاعىن جانە ورتا كاسىپكەرلىكتىڭ الەۋەتتى ءونىم بەرۋشىلەرىن كونكۋرسقا قاتىسۋدان شەكتەگەن.

پروكۋراتۋرانىڭ قاداعالاۋ اكتىسى بويىنشا كونكۋرستىڭ كۇشى جويىلدى جانە مەملەكەتتىك ساتىپ الۋعا قاتىساتىن الەۋەتتى ءونىم بەرۋشىلەردىڭ تەڭ شارتتارى ساقتالۋىنا سايكەس قايتا وتكىزىلدى.

جالپى، 2024 -جىلدىڭ باسىنان باستاپ پروكۋرورلاردىڭ اكتىلەرى بويىنشا 10 ميلليارد تەڭگەدەن استام سومانىڭ كونكۋرستارى توقتاتىلدى.

اۆتور

ەربول جانات