الماتىدا اۋا ساپاسىن لاستايتىن باستى فاكتورلار قانداي

الماتى. KAZINFORM - الماتىدا اۋا ساپاسىن باقىلايتىن 16 ستانسيا بار.

Алматы, смог, түтін, экология, ауа сапасы
Фото: Александр Павский/Kazinform

«قازگيدرومەت» ر م ك مالىمەتىنە سايكەس، سوڭعى بەس جىلدىڭ ءتورتىنشى توقسانىن سالىستىراتىن بولساق، مەگاپوليستە اۋانىڭ لاستانۋ دەڭگەيى بىرنەشە ەسە وسكەن. 2020-2023 -جىلداردىڭ ءتورتىنشى توقسانىندا بۇل كورسەتكىش «جوعارى» دەپ باعالانسا، 2024 -جىلى اۋانىڭ لاستانۋ دەڭگەيى «وتە جوعارى» ساناتىنا ءوتتى.

Алматы, смог, түтін, экология, ауа сапасы
Фото: Александр Павский/Kazinform

الماتىدا اۋانى لاستايتىن نەگىزگى سەبەپتەر:

• كولىك سانىنىڭ كوبەيۋى. الماتىدا جىل سايىن 70 مىڭعا جۋىق جاڭا اۆتوكولىك تىركەلەدى. 2024 -جىلى مەگاپوليستەگى ماشينالاردىڭ جالپى سانى 630725 بىرلىككە جەتتى؛

• ونەركاسىپتىڭ شىعىندىلارى. قالاداعى كاسىپورىنداردىڭ شىعىندىلارى 2995,912 توننا بولدى؛

• پەشپەن جىلىتىلاتىن ۇيلەر. مەگاپوليستە 1,7 مىڭنان استام ءۇي ءالى دە گازبەن جىلىتۋعا اۋىستىرىلماعان؛

• سونداي-اق جەلسىز اۋا رايى مەن سيرەك جاۋىن-شاشىن اتموسفەرادا لاستاۋشى زاتتاردىڭ جينالۋىنا ىقپال ەتەدى.

الماتىدا اۋا ساپاسىن باقىلايتىن 16 ستانسيا بار. ولاردىڭ 12- ءسى اۆتوماتتى، ال 4-ەۋى قولمەن سىناما الۋ ادىسىمەن جۇمىس ىستەيدى. ولار شاڭ جانە ۋلى زاتتار سياقتى 25 ءتۇرلى كورسەتكىشتى تالدايدى. بۇدان باسقا، اۋا ساپاسى تالعار، ەسىك، تۇرگەن، وتەگەن باتىر جانە قاسكەلەڭ قالالارىندا ورنالاسقان 10 جىلجىمالى ەكولوگيالىق زەرتحانالاردا ولشەنەدى.

Алматы, смог
Фото: Александр Павский/Kazinform

- 2024 -جىلدىڭ ءتورتىنشى توقسانىنداعى مونيتورينگ ناتيجەلەرى الماتىدا اۋانى نەگىزگى لاستاۋشى زاتتار - ۇساق بولشەكتەر - شاڭ، وزون، كومىرتەك وكسيدى، كۇكىرت ديوكسيدى، ازوت ديوكسيدى جانە فورمالدەگيد ەكەنىن كورسەتتى. كەيبىر اۋدانداردا وزون كونسەنتراتسياسى رۇقسات ەتىلگەن نورمادان 7,5 ەسە اسادى. ورتاشا تاۋلىكتىك كونسەنتراتسيا بويىنشا شاڭ، ازوت ديوكسيدى جانە وزون نورماتيۆتەردەن اسىپ كەتكەن. اسىرەسە، وزوننىڭ شەكتەن تىم اسىپ كەتۋى بايقالادى، - دەلىنگەن «قازگيدرومەت» ر م ك جاۋابىندا.

سونىمەن قاتار، مامانداردىڭ ايتۋىنشا، جىلى ءارى جەلسىز اۋا رايى اتموسفەرادا زياندى زاتتاردىڭ شاشىراماي جينالۋىنا تاماشا جاعداي جاسايدى. مىسالى، 2024 -جىلدىڭ قازان، قاراشا جانە جەلتوقسان ايلارىندا الماتىدا سيرەك، ءبىراق قارقىندى جاۋىن-شاشىن مەن ءالسىز جەل بولدى. وعان قوسا، اۋا تەمپەراتۋراسى دا نورمادان 1-2 گرادۋس جوعارى بولعان. سونىڭ اسەرىنەن قالادا اۋا ساپاسى ايتارلىقتاي ناشارلاعان.

ەسكە سالايىق، بۇعان دەيىن «جاڭبىر ادامى» اتانعان التاي اينابەك الماتىنىڭ اۋاسىن قالاي تازارتپاق ەكەنىن جازعانبىز.

اۆتور

دوسبول اتاجان

سوڭعى جاڭالىقتار