الماتىدا 200 كوشە جاڭا اتاۋدى قاجەت ەتەدى - اكىمدىك

الماتى. KAZINFORM - بۇگىنگى كۇنى الماتىدا 200 كوشە جاڭا اتاۋدى قاجەت ەتەدى. بۇل تۋرالى ەربولات دوسايەۆتىڭ تۇركسىب اۋدانى تۇرعىندارىمەن كەزدەسۋى بارىسىندا ءمالىم بولدى.

تۇركسىب اۋدانى تۇرعىندارىنىڭ ءبىرى كوشە اتاۋىنا قاتىستى ماسەلەنى كوتەردى.

«تۇركسىب - تاريحى تەرەڭ، كونە اۋدانداردىڭ ءبىرى. وكىنىشكە وراي، كوشەلەردىڭ كوبىنە وزگە ۇلت وكىلدەرىنىڭ ەسىمى بەرىلگەن. نەگە سول كوشەلەردىڭ اتاۋىن ءوزىمىزدىڭ حالىققا ەڭبەگى سىڭگەن باتىرلارىمىزدىڭ، اقىن- جازۋشىلارىمىزدىڭ، ساياسي تۇلعالاردىڭ ەسىمىنە اۋىستىرماسقا. بۇل مۇمكىن بە؟»، - دەپ سۇرادى اۋدان تۇرعىنى.

الماتى اكىمىنىڭ ورىنباسارى ارمان قىرىقبايەۆتىڭ ايتۋىنشا، مەگاپوليستە جاڭا اتاۋدى قاجەت ەتەتىن 200 كوشە بار. تەڭ جارتىسىنىڭ اتاۋى مۇلدەم جوق.

«اتالعان كوشەلەر بويىنشا وتىنىشتەردى قالالىق ونوماستيكا كوميسسياسى قارادى. ەندى رەسپۋبليكالىق كوميسسيانىڭ جاۋابىن كۇتىپ وتىرمىز. جالعىز تۇركسىب اۋدانى ەمەس، قالاداعى سەگىز اۋداندا دا ەسكى اتاۋمەن قالعان كوشەلەر بار»، - دەدى ەربولات دوسايەۆ.

ەسكە سالايىق، 2018 -جىلدىڭ سوڭىندا الماتىدا 27 ىقشام اۋدان مەن 200-گە جۋىق كوشەنىڭ اتاۋى وزگەرگەن بولاتىن.

اۆتور

الما مۇقانوۆا