«الماتى- وسكەمەن» اۆتوماگيسترالىنىڭ جەتىسۋ وبلىسىنداعى بولىگىندە جول سالۋ جۇمىستارى جانداندى
تالدىقورعان. KAZINFORM - كۇرەجولدىڭ قۇرىلىسى 2019 -جىلى باستالدى. تالدىقورعاننان شىعىس قازاقستان وبلىسىنىڭ شەكاراسىنا دەيىنگى ارالىق 300 شاقىرىمنان اسادى. 2019 -جىلدان بەرى سونىڭ 214 شاقىرىمىندا جول سالۋ جۇمىستارى اياقتالدى.
«قازاۆتوجول» ا ق ۇ ك و ف ديرەكتورىنىڭ ورىنباسارى جاسۇلان قالتايەۆ قازىرگى كەزدە كولىك قاتىناسى جاقسارىپ، بارىس-كەلىس جەڭىلدەگەنىن ايتادى.
- بيىل ءبىرىنشى توقسانعا كەلەتىن بولساق، 21 جول اپاتى بولعان. وتكەن جىلدىڭ ءبىرىنشى توقسانىمەن سالىستىرساق، 25 پايىزعا تومەندەدى. جولشىلار تاراپىنان قاۋىپسىزدىككە باعىتتالعان ءىس-شارالار بويىنشا جول بەلگىلەرىن ورناتۋ، جولدى تاڭبالاۋ بويىنشا كاتافوتتاردى اۋىستىرۋ، توسقاۋىل قورشاۋلاردى رەتكە كەلتىرۋ بويىنشا جۇمىستار جۇرگىزىلىپ جاتىر، - دەيدى جاسۇلان قالتايەۆ.
بىلتىر جەتىسۋ وبلىسىنداعى «التىنەمەل» اسۋى جوندەلدى. بيىل «جاركەنت-قورعاس» جولىنىڭ 32 شاقىرىمىن قالپىنا كەلتىرۋ جوسپارلانىپ وتىر.
- قازىر جول جاقسى، تەگىس. ەكى- ءۇش ساعاتتا جەتىپ الامىز. كۇرەجولدىڭ قالعان 100 شاقىرىمىنا اسفالتتىڭ ءۇشىنشى قاباتى توسەلە باستادى. سونىمەن قاتار شەتكى قورشاۋى، جارىقشامدارى مەن جول بەلگىلەرى ورناتىلىپ جاتىر، - دەيدى وزبەكستان ازاماتى رۋستامجان ەسجانوۆ.
اۆتور
ابىلايحان جۇماشيەۆ
