الماتى وبلىسىندا ورمانشى ەر ادامدى اتىپ جىبەردى

قوناەۆ. KAZINFORM - الماتى وبلىسى ەڭبەكشىقازاق اۋدانىندا اڭشى ەر ادامنىڭ اياعىنان اتىپ جىبەردى.

وبلىستىق پوليتسيا دەپارتامەنتى اتالعان جاعدايدى راستادى.

- كۇدىكتى ۇستالىپ، ۋاقىتشا ۇستاۋ يزولياتورىنا قامالدى. دەنساۋلىققا اۋىرلىعى ورتاشا قاساقانا زيان كەلتىرۋ فاكتىسى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. الدىن الا مالىمەتتەرگە سايكەس، جانجال تاراپتار اراسىندا پايدا بولعان جاعىمسىز قارىم-قاتىناس نەگىزىندە تۋىنداعان، - دەپ اتاپ ءوتتى ۆەدومستۆودان.

قازىر وقيعانىڭ بارلىق ءمان-جايىن جان-جاقتى، تولىق جانە وبەكتيۆتى زەرتتەۋ ماقساتىندا كەشەندى تەرگەۋ ارەكەتتەرى جۇرگىزىلىپ جاتىر.

 الماتى وبلىسىنىڭ دارىگەرلەرى وق جاراقاتىمەن اۋرۋحاناعا تۇسكەن ناۋقاستىڭ جاعدايى تۋرالى ايتتى.

الماتى وبلىستىق دەنساۋلىق ساقتاۋ باسقارماسىنان ءمالىم ەتكەندەي، 1986 -جىلى تۋعان ەر ادام ەڭبەكشىقازاق كوپسالالى ورتالىق اۋداندىق اۋرۋحاناسىنىڭ قابىلداۋ بولىمىنە ءوزى كەلگەن.

- ەمدەۋ مەكەمەسىنە جۇگىنگەن ناۋقاس وڭ جاق اياعىنىڭ اۋىرسىنۋىنا، ءىسىپ كەتۋىنە جانە جاراقاتىنان كوپ قان كەتىپ جاتقانىن ايتىپ شاعىمداندى. دارىگەرلەر ونى جان-جاقتى تەكسەرىپ، شۇعىل ەمدەۋ ءۇشىن جاراقات بولىمىنە جاتقىزدى، - دەپ جاۋاپ بەردى ءوڭىردىڭ دەنساۋلىق ساقتاۋ باسقارماسى Kazinform اگەنتتىگى جولداعان ساۋالعا.

ەسكە سالايىق، وسىعان دەيىن الماتى وبلىسىندا اتىس بولىپ، ءۇش ادام زارداپ شەككەن ەدى.

اۆتور

الما مۇقانوۆا