الماتى وبلىسىندا ساپاسىز سالىنعان تۇرعىن ءۇي تەكسەرىلەتىن بولدى
قونايەۆ. KAZINFORM - الماتى وبلىسى، تالعار اۋدانى، بەساعاش اۋىلىندا ساپاسىز سالىنعان تۇرعىن ءۇي كەشەنىندە پاتەرلەر ساتىلىپ جاتىر.
ساپاسى سىن كوتەرمەيتىن كوپقاباتتى ءۇيدىڭ ۆيدەوسى Telegram-كانالداردىڭ بىرىندە تارادى. بەينەجازبادان ءۇي قابىرعالارىنان ۇلكەن جارىقتاردى كورۋگە بولادى.
اۆتوردىڭ ايتۋىنشا، بۇل «س ك ەليتستروي» ج ش س- ءنىڭ ەكونوم ساناتىنداعى «Dostar» تۇرعىن ءۇي كەشەنى. ءۇيدى سالىپ بىتپەي پاتەرلەردى حالىققا جاپپاي ساتىپ جاتىر.
الماتى وبلىسى اكىمدىگىنىڭ باسپا ءسوز قىزمەتى ءمالىم ەتكەندەي، اتالعان نىسانعا تەكسەرۋ جۇمىستارى جۇرگىزىلەدى.
«الماتى وبلىسىنىڭ مەملەكەتتىك ساۋلەت-قۇرىلىس باقىلاۋ باسقارماسى مەن تالعار اۋدانى اكىمدىگىنىڭ وكىلدەرى بۇل نىسانعا جوسپاردان تىس تەكسەرۋ جۇرگىزۋدى جوسپارلاپ وتىر. قوسىمشا اقپاراتتى كەيىنىرەك جولدايتىن بولامىز»، - دەپ حابارلادى وبلىستىق اكىمدىكتەن.
اكىمدىك اتاپ وتكەندەي، كوپقاباتتى ءۇيدىڭ قۇرىلىسى جەكە ينۆەستورلار ەسەبىنەن جۇرگىزىلۋدە.
اۆتور
الما مۇقانوۆا
