الماتى وبلىسىندا 967 قاراۋسىز قالعان نىسان مەملەكەت مەنشىگىنە قايتارىلدى
قونايەۆ. KAZINFORM - سوڭعى ەكى جىلدا سوت شەشىمىمەن بۇرىن سەنىمگەرلىك باسقارۋعا بەرىلگەن ستراتەگيالىق ماڭىزى بار نىساندار الماتى وبلىسىنىڭ كوممۋنالدىق مەنشىگىنە قايتارىلدى.

وبلىس اكىمدىگى مەملەكەت مەنشىگىنە قايتارىلعان ماڭىزدى نىسانداردى اتادى:
- ءۇشقوڭىر سۋ شارۋاشىلىعى كوللەدجى. 2016 -جىلى سەنىمگەرلىك باسقارۋعا بەرىلگەن، الايدا ينۆەستور 66,6 ميلليون تەڭگە ينۆەستيتسيا قاراستىرىلعان كەلىسىم شارتتارىن ورىنداماعان. سوت ءوندىرىسىنىڭ ناتيجەسىندە مۇلىك قايتادان مەملەكەت مەنشىگىنە ءوتتى.
- 2019 -جىلى ەسىك كولىندەگى بوگەت ساتىپ الۋ قۇقىعىنسىز 49 جىلعا سەنىمگەرلىك باسقارۋعا بەرىلگەن. ۋچاسكەنىڭ اۋماعى - 141,643 گەكتار. 2018 -جىلعى تەندەر شارتى بويىنشا ينۆەستور 1,1 ميلليارد تەڭگە سالۋى كەرەك ەدى، ءبىراق مىندەتتەمە ورىندالمادى. 2024 -جىلى سوت مۇلىكتى مەملەكەت مەنشىگىنە قايتاردى.
- ەسىك كولىنىڭ بوگەتىن كەشەندى قالپىنا كەلتىرۋ جۇمىستارىن جۇرگىزۋ ءۇشىن وسى جىلى 23 ميلليارد تەڭگەدەن استام ينۆەستيتسيا تارتىلدى. بۇل اۋىل شارۋاشىلىعىن، جەرگىلىكتى تۇرعىنداردى تۇراقتى سۋمەن قامتاماسىز ەتىپ، تۋريزم ينفراقۇرىلىمىنىڭ دامۋىن جاقسارتادى، بۇل ءوڭىر ەكونوميكاسىنا وڭ اسەرىن تيگىزەدى، - دەپ اتاپ ءوتتى اكىمدىكتەن.
- قاسكەلەڭ قالاسىنداعى ونەر مەكتەبىنىڭ ەكى عيماراتىن جەكە ينۆەستور 134 ميلليون تەڭگەگە ساتىپ العان، ءبىراق ونىمەن جاسالعان كەلىسىم-شارت جارامسىز دەپ تانىلدى. قارجى باسقارماسى شەشىمگە شاعىمدانعاننان كەيىن بۇل نىساندار كوممۋنالدىق مەنشىككە قايتارىلدى.
- الماتى ەكونوميكالىق كوللەدجى دە مەملەكەت مەنشىگىنە قايتا ءوتتى.
كوممۋنالدىق مەنشىكتى تۇگەندەۋ بارىسىندا 967 بوس جانە توزىعى جەتكەن عيمارات انىقتالدى. ونىڭ ىشىندە 188- ءى قاراۋسىز قالعان، 341- ءى بوس تۇرعان كوممۋنالدىق عيماراتتار، سونداي-اق ءبىلىم، دەنساۋلىق ساقتاۋ جانە رەسپۋبليكالىق مۇلىك باسقارمالارىنىڭ قاراماعىنداعى نىساندار بار.
- بۇل عيماراتتاردىڭ كەيبىرى بۇزىلادى، باسقالارى اۋكسيونعا قويىلادى، ال كەيبىرەۋلەرى قالپىنا كەلتىرىلەتىن بولادى، - دەپ ءتۇسىندىردى قارجى باسقارماسى.
وبلىستىق قارجى باسقارماسىنىڭ باسشىسى بيبىگۇل ۇزاقوۆا اتاپ وتكەندەي، بۇل باعىتتاعى جۇمىستار جالعاساتىن بولادى.
- ءبىز بۇل عيماراتتاردىڭ زاماناۋي وقۋ ورىندارىنا، سپورت كەشەندەرى مەن مادەنيەت وشاقتارىنا اينالۋ مۇمكىندىگىن كورىپ وتىرمىز. مەملەكەتتىك مەنشىك قوعام يگىلىگى ءۇشىن جۇمىس ىستەۋى كەرەك، - دەدى ول.
قازىردىڭ وزىندە ينۆەستيتسيالىق جوبالاردى جۇزەگە اسىرۋ ءۇشىن 69 نىسان ىرىكتەلىپ الىندى، ونىڭ بەسەۋى بويىنشا الەۋەتتى سەرىكتەستەردى ىزدەۋ كونكۋرستارى باستالدى. بيلىك مەملەكەتتىك مۇلىكتى ءتيىمدى باسقارۋ جاڭا ينۆەستيتسيا تارتىپ، جەرگىلىكتى بيۋدجەتكە قوسىمشا كىرىس كوزىن اشاتىنىنا سەنىمدى.
بىلتىر وڭىردە جالپى الاڭى 397313 گەكتار بولاتىن، 1340 جەر ۋچاسكەسىنىڭ پايدالانىلماي جاتقانى انىقتالعان بولاتىن.
اۆتور
الما مۇقانوۆا