الماتى تۇرعىنى قالا اكىمىنەن رايىمبەك بويىمەن وتەتىن BRT جوباسىن قايتا قاراۋدى سۇرادى

الماتى. KAZINFORM - قالا اكىمىمەن وتكەن كەزدەسۋدە الماتىلىق رايىمبەك داڭعىلىنداعى BRT جوباسىن قايتا قاراۋدى سۇرادى. ونىڭ پايىمداۋىنشا، بۇل كولىك كەپتەلىسى جاعدايىنىڭ ناشارلاۋىنا اكەلۋى مۇمكىن.

«جاقىندا رايىمبەك داڭعىلىندا BRT پايدا بولاتىنى تۋرالى جاڭالىق شىقتى. بۇل شەشىمدى قايتا قاراۋعا بولا ما، بۇل داڭعىلدىڭ وبلىستىق ماڭىزى بار. ونى رايىمبەك داڭعىلىندا جاساماڭىز، مۇندا بازارلار بار، وبلىستان ادامدار كەلەدى. تيميريازيەۆ كوشەسىندەگىدەي BRT سالساڭىز، وندا جاعداي ۋشىعادى، بىتپەيتىن كەپتەلىس بولادى. ول جەردە اۆتوبۋس جەلىسى بار، نەگە BRT؟» - دەپ سۇرادى تۇرعىن.

ەربولات دوسايەۆ رايىمبەك داڭعىلىنا BRT جەلىسى قاجەت دەپ جاۋاپ بەردى.

«بىرىنشىدەن، رايىمبەك داڭعىلىنىڭ قالالىق جول ەكەنىن ءتۇسىنۋ قاجەت، تيىسىنشە ءبىز BRT جوباسىن ىسكە اسىراتىن بولامىز، ويتكەنى قالانى دامىتۋ قاجەت. ءبىزدىڭ باسىمدىعىمىز - قوعامدىق كولىك، بۇگىندە ول رايىمبەكتە ءتيىمسىز. ايتا كەتۋ كەرەك، رايىمبەك داڭعىلى بويىنشا BRT - نىڭ جالپى ۇزىندىعى 17 ك م. سونىمەن قاتار جوبا «التىن وردا» كولىك-اۋىسىپ وتىرۋ تورابىن (كات) قۇرۋدى قامتيدى»، - دەدى قالا باسشىسى.

ايتۋىنشا، جوبانى ىسكە اسىرۋ كەزىندە قوعامدىق كولىككە بولىنگەن جولاقتاردىڭ ۇزىندىعى ءدالىز ۇزىندىعىنان %70- دان %90- عا دەيىن وسەدى، پلاتفورمالارى بار سول جاق جولاقتا بولىنگەن جولاقتار پايدا بولادى، ال قوعامدىق كولىكتىڭ قوزعالىس جىلدامدىعى %70- عا ارتادى.

وسىلايشا، ءدالىزدىڭ بۇكىل بويىندا قوعامدىق كولىكتىڭ باسىمدىعى قامتاماسىز ەتىلەدى، قاربالاس ساعاتتاعى ورتاشا قوزعالىس ارالىعى شامامەن 5 مينۋت بولادى.

«جوبانى 2 كەزەڭدە ىسكە اسىرۋ جوسپارلانۋدا. ءبىرىنشىسى - اعىمداعى جىلى رايىمبەك داڭعىلىنىڭ احريمەنكو كوشەسىنەن پۋشكين كوشەسىنە دەيىنگى ورتالىق ۋچاسكەسىندە بولىنگەن جولاقتار رەتتەلەدى. قۇرىلىس- مونتاج جۇمىستارى 2024-جىلدىڭ ەكىنشى جارتىجىلدىعىنا جوسپارلانعان. ەكىنشى كەزەڭ باتىس بولىكتى قامتيدى - احريمەنكو كوشەسىنەن باستاپ «بارلىق» بازارىنا دەيىن. 2025-2026-جىلدارى ىسكە اسىرىلادى. سونداي-اق، وسى كەزەڭدە رايىمبەك داڭعىلىن پۋشكين كوشەسىنەن «شىعىس» كولىككە اۋىسىپ وتىرۋ تورابىنا دەيىن ۇزارتۋ جوسپارلانعان»، - دەپ ءتۇسىندىردى ەربولات دوسايەۆ.

اۆتور

الما مۇقانوۆا