الماتى ماڭىنداعى اتىشۋلى فەرما: ەكى مىڭداي ەسەك باعۋداعى ماقسات نە

الماتى. KAZINFORM - «الماتى ماڭىندا ەسەك فەرماسى بار. ونداعى مالدىڭ ەتى قالا مەن جاقىن ماڭداعى ءدامحانالارعا ساتىلادى». الەۋمەتتىك جەلىدە جەلدەي ەسكەن اڭگىمە ۆيدەوسىمەن قوسا تارادى.

есек
Фото: Александр Павский/Kazinform

شارۋاشىلىق قانداي ماقساتتا، قاشان اشىلعانىن انىقتاۋ ءۇشىن Kazinform ءتىلشىسى مەگاپوليستەن 140 شاقىرىم جەردە اقتەرەك اۋىلىنىڭ ماڭىندا ورنالاسقان فەرماعا بارىپ قايتتى.

جانۋارلاردى قىتايعا تىرىدەي ەكسپورتتاۋ جوسپارلانعان

есек
Фото: Александр Павский/Kazinform

الماتى وبلىسى جامبىل اۋدانى اكىمدىگىنىڭ مالىمەتىنە سايكەس، شارۋا قوجالىعىندا العاشقى كەزدە مالعا ازىق بولاتىن داقىلداردى ءوسىرۋ جوسپارلانعان. بۇل مالىمەتتى «كازاگروماكس» قوجالىعىنىڭ يەسى ماكسيم پوجيگايلوۆ تا راستايدى. ونىڭ ايتۋىنشا، كاسىپكەر 1400 گ ا جەردى 2024 -جىلدىڭ اقپان ايىندا شەتەلدىك ينۆەستورلاردىڭ كومەگىمەن ساتىپ العان.

есек
Фото: Александр Павский/Kazinform

- مەن شەتەلدەن كەلىپ، جاڭا جوباعا ينۆەستورلار اكەلدىم. قازىر پرەزيدەنت ساياساتىنىڭ ارقاسىندا ەلىمىز شەتەلدىك ينۆەستيتسيا ءۇشىن اشىلا ءتۇستى. ەلىمىز جەر كولەمى بويىنشا 9-ورىندا، ءبىراق اگرارلىق سالا ونشا دامىماعان. سوندىقتان وسى ىسپەن اينالىسايىن دەدىم. ول ءۇشىن ارنايى 1400 گ ا جەر ساتىپ الدىم. وسى اۋماقتا جۇگەرى مەن جوڭىشقا ەگۋدى جوسپارلادىق. جەر تەگىس، تراكتور جانە وزگە دە تەحنيكانىڭ جۇمىسى ءۇشىن ىڭعايلى بولدى، - دەدى ول.

есек
Фото: Александр Павский/Kazinform

سونداي-اق فەرما يەسى شارۋا قوجالىعىندا اگرارلىق ىسپەن قاتار تۇياقتى جانۋارلاردى باعىپ، ولاردى تىرىدەي شەتەلگە ەكسپورتتاۋ جوسپارلانعانىن ايتتى. جەم-ءشوپ ەگىلگەن ەگىستىڭ ەسەبىنەن الىنباق بولعان.

- ەگىستىكپەن قاتار، قىتايعا جانۋارلاردى تىرىدەي ەكسپورتتاۋ جوسپارلاندى. سەبەبى، ءبىزدىڭ سەرىكتەسىمىزدىڭ قۇلجا قالاسىندا فەرماسى بار. ول ءسۇت ساۋۋمەن اينالىسادى. بۇل ءسۇت ونكولوگيالىق اۋرۋحانالارعا جىبەرىلەدى. سەبەبى، ەسەك سۇتىندە كازەين اقۋىزى كوپ، ول وكپە مەن باۋىردى ەمدەۋگە كومەكتەسەدى. ءبىراق بۇل ءبىزدىڭ ەلىمىز ءۇشىن جارامايدى. سوندىقتان تەك ەكسپورت جاساۋ جوسپارلاندى، ياعني شاعىن ەكونوميكالىق ورتا قالىپتاستىرعىمىز كەلدى. وسىندا داقىلداردى ەگەمىز. ونى مالعا بەرىپ، كەيىن ەكسپورتقا جىبەرەمىز، - دەدى ماكسيم پوجيگايلوۆ.

есек
Фото: Александр Павский/Kazinform

اۋدان اكىمدىگىنىڭ مالىمەتىنشە، كاسىپكەر 2024 -جىلدىڭ ناۋرىزىندا جەتىسۋ وبلىسىنان جالپى سانى 1405 ەسەكتى ۆەتەرينارلىق انىقتاماسىمەن ساتىپ العان. بۇگىنگى كۇنى شارۋا قوجالىعىنىڭ اۋماعىندا 1700 ەسەك بار جانە ونىڭ 1032- ءسى دەگەرەس اۋىلدىق وكرۋگىنىڭ ۆەتەرينارلىق پۋنكتىندە تىركەلگەن.

كاسىپكەر فەرمادا العاشقى جۇمىستار باستالعان كەزدە شارۋاشىلىقتا ەلەكتر قۋاتىنا بايلانىستى ماسەلە تۋىنداعانىن ايتادى. ونىڭ سوزىنشە، جەتكىلىكتى ەلەكتر ەنەرگياسىنىڭ بولماۋى باستاپقى جوبانى توقتاتىپ تاستاعان.

есек
Фото: Александр Павский/Kazinform

- مەنىڭ قاتەلىگىم - ەلەكتر قۋاتىنا قاتىستى ماسەلە تۋىندايدى دەپ ويلامادىم. ايتپەسە، بۇل جەردە ەشقانداي ءىس باستاماس ەدىم. «الاتاۋ جارىق كومپانياسىنان» تەحنيكالىق شارتتاردى سۇرادىم. شارت بويىنشا مەن ەلەكتر قوسالقى ستانسياسىن جوندەۋىم كەرەك ەكەن. ينۆەستورلار وعان كەلىسكەن جوق، - دەپ اتاپ ءوتتى شارۋا قوجايىنى.

есек
Фото: Александр Павский/Kazinform

ەسەك اسىراۋدىڭ ەرەكشەلىگى بار ما؟

اقتەرەك اۋىلىنان 10 ك م قاشىقتىقتا، دەگەرەس اۋىلىنان 34 ك م قاشىقتىقتا ورنالاسقان شارۋا قوجالىعىندا بۇگىنگى كۇنى 4 ادام جۇمىس ىستەيدى. ولاردىڭ ءبىرى - ەركىن قوجابەرگەن. مال باعۋمەن 25 جىلداي اينالىسقان ول بۇل قوجالىققا بيىل قىس كەزىندە كەلگەن.

- ەسەكتەردى جەم-ءشوبىن بەرىپ اسىراپ وتىرمىز. ءبىراق ولار مۇندا سويىلمايدى. تاڭعى 5-تەردە سۋىن، 6-لارعا تامان ءشوبىن بەرەمىز. تۇسكى ۋاقىتتا سۋىن بەرىپ، كەشكى ۋاقىتتا قايتادان ءشوبىن بەرەمىز. كۇنىنە 450-500 بۋما جوڭىشقا، 3 تونناداي سۋ كەتەدى. جالپى ءوزىم مال باققانىما 25 جىل بولدى. جاسىم 54-تە، اقتەرەكتەنمىن. ءبىراق قازىر وسى قوجالىقتاعى ۇيدە تۇرامىن، - دەدى ەركىن قوجابەرگەن.

سونداي-اق ول ەسەك اسىراۋدىڭ وزىندىك قيىندىعى بار ەكەنىن اتاپ ءوتتى. شارۋانىڭ ايتۋىنشا، جىلقى تەكتەس بۇل جانۋاردى قوي نە جىلقى سەكىلدى جازىق دالادا جايا المايسىڭ.

есек
Фото: Александр Павский/Kazinform

- ەسەكتى ءبىرىنشى رەت باعىپ وتىرمىن. بۇلار جىلقى تەكتەس. ءبىراق وزگە مال سەكىلدى باستارى بىرىكپەيدى. جايساڭ جان-جاققا كەتىپ قالادى. سول ءۇشىن قاماپ وتىرمىز. سونداي-اق مىنەزدەرى شاتاق. ءبىر-بىرىمەن وتە ءجيى توبەلەسەدى. وزدەرى سۋىقتى كوتەرمەيدى، ال ىستىقتا سۋدى كوپ ىشەدى. ءبىراق ءبىر جاقسى قاسيەتى - ءشوپ تالعامايدى، - دەپ اتاپ ءوتتى ول.

شارۋاشىلىقتىڭ بۇگىنگى ماقساتى قانداي؟

ماكسيم پوجيگايلوۆ العاشقى جوسپارى وزگەرگەنىمەن، ەسەكتى تىرىدەي قىتايعا ەكسپورتتاۋدى ءالى دە جوسپارلاپ وتىرعانىن ايتادى. ونىڭ ايتۋىنشا، وسى ۋاقىتقا دەيىن ەكسپورت جاسالماعان. الايدا جانۋارلاردىڭ العاشقى تاسىمالى الداعى ايدا ورىندالۋى مۇمكىن.

ферма
Фото: Александр Павский/Kazinform

- جانۋاردى تىرىدەي ەكسپورتتاۋ ءۇشىن ولار ارنايى كارانتيندىك ايماققا 45 كۇنگە ورنالاستىرىلادى. اناليز الىنىپ، تەكسەرىلەدى. قازاقستاندا الدىمەن 45 كۇندەي، كەيىن قىتايدا 30 كۇندەي كارانتيندە بولادى. مەنىڭ قازىرگى ماقساتىم - وسى جانۋارلاردى باپتاپ وسىندا ۇستاۋ جانە كارانتيندىك ايماققا دەيىن جەتكىزۋ. ارى قاراي ءبىزدىڭ سەرىكتەستەرىمىز اينالىسادى، - دەيدى ول.

ال جامبىل اۋدانى اكىمدىگىنىڭ مالىمەتىنشە، جانۋارلاردى ەكسپورتقا شىعارۋ ءۇشىن شارۋا قوجالىعى جامبىل اۋداندىق اۋماقتىق ينسپەكسياسىنان «اۋىلشارۋاشىلىق جانۋارلارىن ءوسىرىپ باعۋمەن اينالىسۋعا» ۆەتەرينارلىق، سانيتاريالىق قورىتىندى جانە ەسەپتىك ءنومىر الۋى قاجەت.

есек
Фото: Александр Павский/Kazinform

«كازاگروماكس» يەسى بۇگىنگى كۇنى قوجالىقتى ءۇش قورشاۋعا ءبولىپ، 1700-گە جۋىق ەسەك ۇستاپ وتىر. ءار قورشاۋدا 500-گە جۋىق جانۋار بار. شارۋا قوجايىنى ولاردى اسىرۋعا كۇندەلىكتى 500 بۋما ءشوپ كەتەتىنىن ايتادى.

есек
Фото: Александр Павский/Kazinform

- ەسەكتىڭ اربىرەۋىن 35-45 مىڭ تەڭگەگە ساتىپ الدىق. مال دارىگەرى ساۋدا كەزىندە قاي جانۋار ساۋ، قايسىسىن الۋعا بولادى، قايسىن الۋعا بولمايتىنىن ايتىپ، ءارقايسىسىن قاراپ شىقتى. قازىر 1700-گە جۋىق جانۋار بار. ولاردىڭ سانى ازايىپ-كوبەيىپ تۇرادى. جانۋارلارعا تاڭەرتەڭ جانە كەشكە جەم-ءشوپ بەرەمىز. كۇنىنە 500 بۋما ءشوپ كەتەدى. ءبىر بۋماسى - 950 تەڭگە. ەسەپتەيتىن بولساق، بۇل - ناعىز شىعىن. وسىعان قاراپ، بۇل جانۋاردىڭ ەتىن ساتامىز دەۋ جالعان ەكەنىن تۇسىنۋگە بولادى. ەسەكتىڭ ەتى ەشكىمگە كەرەك ەمەس. ەكىنشىدەن، بۇل - ءتيىمسىز. ونى ساتسام دا، قانداي باعاعا وتەر ەدى؟ ودان سايىن شىعىنعا باتامىن. ال قىتايعا ەكسپورتتايتىن بولسام، كىشكەنە بولسىن پايدا تۇسەدى، - دەدى ماكسيم پوجيگايلوۆ.

«كازاگروماكس» يەسى ەلەكتر قۋاتىنا قاتىستى ماسەلە شەشىلگەن جاعدايدا باستاپقى جوبانى جانداندىرىپ، جۇگەرى مەن جوڭىشقا سىندى مالعا ازىق بولاتىن داقىلداردى ءوسىرۋى مۇمكىن ەكەنىن اتاپ ءوتتى.

اۆتور

دوسبول اتاجان

سوڭعى جاڭالىقتار