الماتى دارىگەرلەرى سۇيەك كەمىگىنىڭ دونورى بولۋعا شاقىرادى
الماتى. KAZINFORM - الماتىدا ورنالاسقان قالالىق قان ورتالىعىندا قان دونورلىعىنان بولەك، سۇيەك كەمىگى دونورى بولۋعا بولادى. بۇل تۋرالى دونورلار جيناقتاۋ ءبولىمىنىڭ مەڭگەرۋشىسى نۇرداۋلەت ءابدىقادىروۆ ايتىپ بەردى.
- گەموپوەتيكالىق ءدىڭ جاسۋشالارىن ترانسپلانتاتسيالاۋ - قاننىڭ قاتەرلى اۋرۋلارىن جانە باسقا گەماتولوگيالىق اۋرۋلاردى ەمدەۋدىڭ جاڭا دامىعان تەحنولوگيالىق ءادىسى. گەموپوەتيكالىق ءدىڭ جاسۋشالارى ءار ادامنىڭ سۇيەك كەمىگىندە بولادى، ولاردان ادامنىڭ بارلىق قان جاسۋشالارى: ەريتروتسيتتەر، لەيكوتسيتتەر، مونوتسيتتەر پايدا بولادى. بۇل جاسۋشالاردىڭ سۇيەك كەمىگى مەن يممۋندىق جۇيەنىڭ زاقىمدالعان فۋنكتسياسىن قالپىنا كەلتىرۋ قابىلەتى يممۋن تاپشىلىعىن، گەماتولوگيالىق جانە ونكولوگيالىق اۋرۋلاردى ەمدەۋدە بولاشاعى زور ەكەنىن كورسەتەدى. كوپ جاعدايدا ءومىردى قۇتقارۋدىڭ جالعىز جولى - گەموپوەتيكالىق ءدىڭ جاسۋشالارىن ترانسپلانتاتسيالاۋ، - دەدى نۇرداۋلەت ءابدىقادىروۆ.
دارىگەردىڭ ايتۋىنشا، قازاقستاندا جىل سايىن 300-دەن استام ادام سۇيەك كەمىگىن ترانسپلانتاتسيالاۋدى قاجەت ەتەدى جانە ولاردىڭ جارتىسى بالالار مەن جاسوسپىرىمدەر. سوڭعى 13 جىلدا 700-دەن استام ادامعا سۇيەك كەمىگى ترانسپلانتاتسياسى جاسالعان. سونىمەن قاتار، بۇگىنگى كۇنى ەلىمىز بويىنشا 11 مىڭعا جۋىق ادام دونور رەتىندە تىركەلۋگە كەلىسىم بەرگەن.
- 18 جاستان 45 جاسقا دەيىنگى سالماعى 50 كەلىدەە جوعارى، اۋىر اۋرۋلارى جوق قازاقستان ازاماتتارى سۇيەك كەمىگىنىڭ دونورى بولا الادى. سۇيەك كەمىگىنىڭ دونورى بولۋ قاۋىپتى ەمەس. ءىس جۇزىندە تۇراقتى قان تاپسىرۋمەن بىردەي، جاناما اسەرى جوق، دونوردىڭ جاسۋشالارى 10-14 كۇننەن كەيىن دەنەدە تولىعىمەن قالپىنا كەلەدى، - دەپ اتاپ ءوتتى ول.
سۇيەك كەمىگى دونورلارىنىڭ تىركەمەسىنە كىرۋ ءۇشىن:
- قالالىق قان ورتالىعىنا بارىڭىز (الماتى قالاسى بۇحار جىراۋ كوشەسى №47)
- تىركەلىمگە كىرۋگە ءوتىنىش- كەلىسىمدى تولتىرىڭىز؛
- ساۋالناماعا جاۋاپ بەرىڭىز؛
- فەنوتيپ تالداماسىن جاساۋعا 9 م ل قان ۇلگىسىن وتكىزىڭىز (قان ۇلگىسىن وتكىزۋ كۇنىن تەلەفون ارقىلى الدىن الا كەلىسۋ كەرەك)؛
- دونور تۋرالى اقپارات سۇيەك كەمىگى دونورلارىنىڭ تىركەلىمىنىڭ دەرەكقورىنا ەنگىزىلەدى. ەگەر دونور مەن ناۋقاس اراسىندا فەنوتيپتەر سايكەس كەلسە، ۇلتتىق تىركەلىم قىزمەتكەرى مىندەتتى تۇردە دونورمەن حابارلاسادى.
اۆتور
اسحات رايقۇل
