الماتى ءتۇنى: تۇرعىنداردىڭ زارەسى ۇشىپ، كۇشتىك قۇرىلىمدار تىكەسىنەن تىك تۇردى

الماتى. KAZINFORM - توتەنشە جاعدايلار مينيسترلىگىنە قاراستى «ستاك» ج ش س- نىڭ سەيسميكالىق ستانسالار جەلىسى الماتى ۋاقىتىمەن 23-قاڭتار كۇنى 00 ساعات 09 مينۋتتا جەر سىلكىنىسىن تىركەدى.

جەراستى ءدۇمپۋى الماتىدان وڭتۇستىك- شىعىسقا قاراي 264 شاقىرىم جەردە، قازاقستەن مەن قىرعىزستان شەكاراسى اۋماعىندا بولدى.

ەنەرگەتيكالىق ساناتى - 15.1. MPV تەربەلىسى - 6.7. تەرەڭدىگى - 65 ك م.

جەر سىلكىنىسى الماتىدا 5 بال دەڭگەيىندە (MSK-64 شكالاسى بويىنشا) سەزىلدى.

الماتىلىقتاردىڭ ايتۋىنشا، جەراستى ءدۇمپۋى وسى جولى قاتتى سەزىلدى. ۇزاق ۋاقىت بويى شايقالعان. تۇرىعىندار ۇرەيلەنىپ، ۇيىنەن كوشەگە، دالاعا شىقتى.

الماتى قالالىق توتەنشە جاعدايلار دەپارتامەنتىنە جەر سىلكىنىسى كەزىندە عيماراتتاردىڭ قيراعانى جانە ادامداردىڭ زارداپ شەككەنى تۋرالى اقپارات تۇسكەن جوق.

«عيماراتتاردىڭ قيراۋى مەن زارداپ شەككەندەر تۋرالى اقپارات تۇسكەن جوق. تىنىشتىق ساقتاۋلارىڭىزدى سۇرايمىز. قاۋىپسىزدىك ماقساتىندا كەلەسى ەسكەرتۋگە دەيىن دالاعا شىعۋ كەرەك»، - دەدى الماتى قالالىق توتەنشە جاعدايلار دەپارتامەنتىنىڭ باسشىسى نۇرلان اتىعايەۆ.

مەگاپوليستە دەرەۋ بارلىق جينالۋ نۇكتەسى اشىلدى. بارلىق مالىمەت 2 گ ي س الماتى پلاتفورماسىندا ورنالاسقان. ىزدەۋ كەزىندە «زارداپ شەككەن حالىقتى قابىلداۋ پۋنكتى» دەپ تەرسەڭىز، كارتادان حالىق جينالاتىن ورىندار كورسەتىلەدى. مۇنداي دەرەكتەر الماتى قالاسى ت ج د جانە اۋداندىق اكىمدىكتەردىڭ رەسمي سايتىندا قولجەتىمدى.

الماتى قالالىق پوليتسيا دەپارتامەنتى اتاپ وتكەندەي، پاترۋلدىك پوليتسيانىڭ سانى ۇلعايتىلىپ، ۋچاسكەلىك ينسپەكتورلارىنىڭ تۇرعىن ۇيلەردى ارالاۋى ۇيىمداستىرىلدى. سونىمەن قاتار، ءتارتىپ ساقشىلارى ازاماتتاردى ۇيلەرىنىڭ ەسىگىن كىلتتەپ جابۋعا شاقىرادى.

شاھارداعى سەيسميكالىق جاعدايعا بايلانىستى، ەربولات دوسايەۆ جەدەل شتابتىڭ شۇعىل كەڭەسىن وتكىزدى. وندا ماماندار ءىس-قيمىل جوسپارىن تالقىلادى.

الماتى تۇرعىندارى قاتتى جەر سىلكىنىسىنەن كەيىن، قالادان جاپپاي كەتە باستادى. كوشەلەردە ۇلكەن كەپتەلىس پايدا بولىپ، جانارماي قۇيۋ بەكەتتەرىندە ۇزىن-سونار كەزەك قالىپتاستى. سونداي-اق، تاكسي باعاسى ءبىر ساپار ءۇشىن 5 مىڭ تەڭگەدەن 20 مىڭ تەڭگەگە دەيىن كوتەرىلدى.

ۇلتتىق سەيسمولوگيالىق باقىلاۋلار مەن زەرتتەۋلەر عىلىمي ورتالىعىنىڭ ديرەكتورى داۋلەت سارسەنبايەۆ الماتىدا جاقىن ۋاقىتتا جويقىن جەر سىلكىنىسى بولمايدى دەپ سەندىردى.

«الماتىنىڭ تۇرعىندارى مەن قوناقتارىن جاقىن ارادا جويقىن جەر سىلكىنىسى كۇتىلمەيتىنىنە سەندىرگىم كەلەدى. بۇگىن بولعان سەيسميكالىق وقيعا ق ح ر مەن قىرعىزستان رەسپۋبليكاسىنىڭ اۋماعىندا بولدى. الماتى مەن الماتى وبلىسىنىڭ تۇرعىندارى، جەتىسۋ وبلىسىنىڭ ءبىر بولىگىندە سەزىلگەن سىلكىنىستەر «افتەرشوك» بولىپ تابىلادى. ورتالىق ازيانىڭ بارلىق دەرلىك ەلدەرى سەيسميكالىق وقيعانى سەزىندى. قازىرگى ۋاقىتتا 10-نان استام افتەرشوك تىركەلدى، ونىڭ ىشىندە الماتى تۇرعىندارى 2 افتەرشوكتى سەزىندى. بايبالامعا سالىنۋدىڭ ەشقانداي سەبەبى جوق»، - دەدى ول.

الەۋمەتتىك جەلىلەردە ءال-فارابي اتىنداعى قازاق ۇلتتىق ۋنيۆەرسيتەتىنىڭ جاتاقحانالارى قيرادى دەگەن اقپارات شىقتى.

الماتىداعى ستۋدەنتتىك جاتاقحانالاردا جاعداي تۇراقتى ەكەنىن عىلىم جانە جوعارى ءبىلىم مينيسترلىگى حابارلادى.

الماتى حالىقارالىق اۋەجايىنىڭ باسپا ءسوز قىزمەتى، اۋەجاي شتاتتىق رەجيمدە جۇمىس ىستەپ جاتقانىن، اۋە كولىكتەرىن قوندىرۋعا جانە ۇشىرۋعا ەشقانداي شەكتەۋلەر جوق ەكەنىن جەتكىزدى.

وڭتۇستىك استانادا قوعامدىق ءتارتىپتى 2,5 مىڭنان استام پوليتسيا قىزمەتكەرى قامتاماسىز ەتۋدە.

پاترۋلدىك پوليتسيا قىزمەتكەرلەرى، ۋچاسكەلىك ينسپەكتورلار مەن جەدەل بولىمشەلەر قىزمەتتىڭ كۇشەيتىلگەن رەجيمىنە اۋىستىرىلدى.

تەرگەۋ-جەدەل توپتارى كۇشەيتىلدى.

«الماتىدا جەدەل جاعداي تۇراقتى، قىلمىستىڭ ءورشۋى بايقالمايدى. ازاماتتار اراسىندا تۇسىندىرمە جۇمىستارى كۇشەيتىلىپ، ءوز مۇلىكتەرىنىڭ ساقتالۋىن قامتاماسىز ەتۋ جايىندا ايتىلدى. توناۋ دەرەكتەرى تىركەلگەن جوق»، - دەپ حابارلادى ۆەدومستۆودان.

قازىرگى ۋاقىتتا مەگاپوليستە جاعداي تۇراقتى.

اۆتور

الما مۇقانوۆا