الماتى اۋەجايىندا شەتەل جۇمىسشىلارى نەگە قاپتاپ كەتتى

الماتى. KAZINFORM - الماتى اۋەجايىنىڭ جاڭا پرەزيدەنتى گوكەر كوسە مەكەمەدە شەتەلدىك جۇمىسشىلاردىڭ كوبەيۋىنە بايلانىستى سۇراققا جاۋاپ بەردى.

2020 -جىلى مامىر ايىندا تۇركيالىق TAV Airports Holding حولدينگى الماتى اۋەجايى اكسياسىنىڭ ءجۇز پايىزىن 415 ميلليون دوللارعا ساتىپ العان بولاتىن.

سول ۋاقىتتان بەرى، اسىرەسە، جاڭا تەرمينال عيماراتى اشىلعالى اۋەجايدا شەتەلدىك جۇمىسشىلار كوبەيگەن.

مەكەمە باسشىسى گوكەر كوسە مۇنى ءىس-ساپارمەن كەلەتىن جۇمىسشىلاردىڭ بولۋىمەن بايلانىستىردى.

- اۋەجايدا 3380 جۇمىسشى بار. ونىڭ قانشاۋى شەتەلدىك ەكەنىن ناقتى ايتۋ قيىن. ويتكەنى كەي شەتەل ازاماتتارى ۋاقىتشا جۇمىس ىستەيدى دە، سوسىن كەتىپ قالادى. ءبىز جاھاندىق كومپانيامىز. سوندىقتان اۋەجايدا فرانسيا، ءۇندىستان، تۇركيادان كەلگەن جۇمىسشىلاردى كورۋگە بولادى. ءبىراق ءىس-ساپارمەن كەلەتىن جۇمىسشىلار سانى اۋىسىپ تۇرادى. جۇمىس تۇراقتانعان سوڭ شەتەلدىك جۇمىسشىلار ۇلەسى %20- دان اسپايدى دەپ ويلايمىن، - دەدى ول.

ايتا كەتەيىك، بۇعان دەيىن پرەزيدەنتتىڭ الماتى اۋەجايىنىڭ جاڭا حالىقارالىق تەرمينالىن ارالاعانىن جازعان ەدىك.

ال 1-ماۋسىم كۇنى جاڭا تەرمينال العاشقى رەيستەردى قابىلدادى.

14-ماۋسىم كۇنى الماتى اۋەجايىنداعى بارلىق حالىقارالىق رەيستەر جاڭا تەرمينالعا اۋىستىرىلدى.

اۆتور

دوسبول اتاجان