الماسادام ساتقاليەۆ باس پروكۋراتۋرانىڭ ايىپتاۋىنا جاۋاپ بەردى

استانا. KAZINFORM - بۇگىن ۇكىمەت قابىرعاسىندا ەنەرگەتيكا ءمينيسترى الماسادام ساتقاليەۆ اتالعان ۆەدومستۆو زاڭ تالاپتارىن بۇزا وتىرىپ، ينۆەستيتسيالار تۋرالى كەلىسىم جوباسىنىڭ تالاپتارىن ۋاقىتىلى ورىندامادى دەگەن ايىپقا قاتىستى پىكىر ءبىلدىردى.

اڭگىمە باتىس قازاقستان وبلىسىنداعى مەتانول ءوندىرىسى بويىنشا گاز-حيميا كەشەنىنە قاتىستى.

«ءبىز قۋاتى 120 مىڭ توننا مەتانول ءوندىرۋ جوباسى تۋرالى ايتىپ وتىرمىز. بۇل جوبا بويىنشا وپەراتور «جايىق پەتروليۋم» كومپانياسى. ونى ىسكە اسىرۋ شەڭبەرىندە اعىمدىق راسىمدەردى شەشۋ تالاپ ەتىلەدى. بىرىنشىدەن، بۇل جوبانى دايىنداپ، قارجىلاندىرۋدى قامتاماسىز ەتۋ ءۇشىن كەپىل بازاسىن دايىنداۋ قاجەت. قارجىلاندىرۋدى ۇيىمداستىرۋدى ونەركاسىپتى دامىتۋ قورى جانە قازاقستاننىڭ دامۋ بانكى جوسپارلاپ وتىر، ول جەردە دە شەشىلمەگەن سۇراقتار بار. سول ماسەلەلەردىڭ ءبىرى - ونەركاسىپتىك رەجيمدەردى قولدانۋ ءۇشىن ءتيىستى كوميسسيا قۇرۋ»، - دەدى الماسادام ساتقاليەۆ ب ا ق وكىلدەرىنىڭ ساۋالىنا جاۋاپ بەرە وتىرىپ.

مينيستر اتالعان كوميسسيانى قۇرۋدىڭ كەشىككەنىن مويىنداپ وتىر.

«دەگەنمەن كوميسسيانى قۇرۋدىڭ كەشىگۋى جوبانى ىسكە اسىرۋ بارىسىنا اسەر ەتكەن جوق. ءبىز قىزمەتكەرلەردى جۇكتەۋگە بايلانىستى كىدىرىس فاكتىسىن راستايمىز، بۇل ورىنداۋشىلىق تارتىپكە بايلانىستى كەيبىر ولقىلىقتار بولۋى مۇمكىن. ءبىز بۇل جوبانى تولىعىمەن قولدايمىز، ىسكە اسىرۋ مەرزىمىنە جوعارىدا اتالعان فاكتورلار اسەر ەتكەن جوق جانە جوبا وپەراتورىمەن تىكەلەي جۇمىس ىستەيمىز»، - دەيدى ول.

ايتا كەتەيىك، كەشە باس پروكۋراتۋرا ەنەرگەتيكا مينيسترلىگىنىڭ جوبانى ينۆەستورمەن كەلىسۋدى كەشىكتىرگەنىن انىقتاعان ەدى.

باس پروكۋراتۋرا مەن «Kazakh Invest» ۇ ك» ا ق (Task Force) بىرلەسكەن جۇمىسى شەڭبەرىندە باتىس قازاقستان وبلىسىندا مەتانول ءوندىرىسى بويىنشا گاز-حيميا كەشەنىن سالۋ جوباسىن ىسكە اسىراتىن وتاندىق ينۆەستوردىڭ پروبلەماسى انىقتالدى. اتاپ ايتقاندا، ەنەرگەتيكا مينيسترلىگى زاڭ تالاپتارىن بۇزا وتىرىپ (15 جۇمىس كۇنىنىڭ ورنىنا) ينۆەستيتسيالار تۋرالى كەلىسىم جوباسى بويىنشا كەلىسسوزدەر جۇرگىزۋ جونىندەگى كوميسسيانى قۇرۋ مەرزىمىن 60 كۇنگە دەيىن سوزعان.

پروكۋراتۋرانىڭ قاداعالاۋ اكتىسى بويىنشا جول بەرىلگەن بۇزۋشىلىقتار ءۇشىن ەنەرگەتيكا مينيسترلىگىنىڭ دەپارتامەنت ديرەكتورى تارتىپتىك جاۋاپكەرشىلىككە تارتىلدى.

اۆتور

داۋلەت ىزتىلەۋ