الماس چۋكين: سالىق رەفورماسىن قازىر جاساماساق، 5 جىلدان كەيىن الەۋمەتتىك-قارجىلىق توقىراۋ بولادى

استانا. KAZINFORM - بەلگىلى ەكونوميست الماس چۋكين ءماجىلىستىڭ سالىق كودەكسىن تالقىلاۋعا ارنالعان جۇمىس توبىنىڭ وتىرىسىندا سالىق رەفورماسىن كەشىكتىرۋگە بولمايتىنىن ءمالىم ەتتى.

- جاڭا كودەكستە ۇسىنىلعاندارعا كەلسەك، مەن ونى قولدايمىن. تەڭەستىرۋ كەرەك دەگەندى باياعىدان ايتىپ ءجۇرمىن. ويتكەنى 5 جىلدان كەيىن بۇكىل بولجامدار بويىنشا كۇيرەۋگە جەتەمىز. الەۋمەتتىك-قارجىلىق سحەمادا تولىقتاي توقىراۋ بولادى. سوندىقتان قازىردەن باستاپ تۇزەتۋ كەرەك. ءتىپتى قازىر كورىپ وتىرعان سالىق ءتۇسىمىن ەسەپتەگەننىڭ وزىندە شىعىس پەن كىرىستىڭ تەڭگەرىمىن 10 تريلليون تەڭگەگە دەيىن اجىراتۋعا بولمايدى، - دەدى ول.

ونىڭ ايتۋىنشا، ۇسىنىلىپ وتىرعان جاڭا كودەكستى ءالى جەتىلدىرمەسە، رەفورما بيۋدجەت تاپشىلىعى ماسەلەسىن شەشە الماۋى دا مۇمكىن.

- سالىقتان 3-4 تريلليون تەڭگە عانا جيناۋدى كوزدەپ وتىر. مەملەكەتتىك بورىشتىڭ ءوسىمى جالعاساتىن ءتۇرى بار. بيۋدجەت تاپشىلىعى دا ساقتالادى. ياعني، 10 تريلليون تاپشىلىقتىڭ 5-6 تريلليون تەڭگەسى جابىلماي قالايىن دەپ تۇر. سوندا قارىزداردى جابۋ دا جوسپاردا جوق. ازىرگە جالپى ىشكى ءونىمدى ەكى ەسە ارتتىرۋ قولىمىزدان سونشالىق ءبىر كەلىپ جاتقان جوق. ال قارىزداردى ءۇش جىلدىڭ ىشىندە ەكى ەسە ارتتىرۋ قولىمىزدان كەلگەن. ءار ءۇش جىل سايىن مەملەكەت بورىشىنىڭ كولەمى 2 ەسە ءوسىپ كەلەدى، - دەدى ساراپشى.

ەسكە سالساق، 20 - اقپاندا ماجىلىسكە سالىق كودەكسىنىڭ تۇزەتىلگەن جوباسى ەنگىزىلگەن ەدى. بۇگىن سول قۇجاتتى پىسىقتايتىن ءماجىلىستىڭ جۇمىس توبى ىسكە كىرىستى.

كودەكستىڭ جاڭا رەداكسياسىنداعى نەگىزگى تۇزەتۋلەر مىنالار:

➤ قوسىلعان قۇن سالىعى بويىنشا مىندەتتى تىركەۋ شەگىن تومەندەتۋ - 20000 ا ە ك (78,6 ميلليون تەڭگە) 3800 ا ە ك (15 ميلليون تەڭگە) دەيىن؛
➤ قوسىلعان قۇن سالىعىنىڭ مولشەرلەمەسىن ارتتىرۋ - %12- دان %16- عا دەيىن، بۇعان قوسا ءبىرقاتار سالا ءۇشىن تومەندەتىلگەن مولشەرلەمە %10 بەلگىلەنەدى؛

➤ جەڭىلدەتىلگەن دەكلاراتسيا بويىنشا ارنايى سالىق رەجيمىن قولدانۋدى شەكتەۋ - تەك B2C سەگمەنتىنە (بيزنەس تۇپكىلىكتى تۇتىنۋشىلار ءۇشىن) قولجەتىمدى بولادى.

اۆتور

ەسىمجان ناقتىباي