الەكساندر بىرنەشە ەلدىڭ ازاماتى - گەرمانيادا مەرت بولعان ايگۇل سايلىبايەۆانىڭ كۇيەۋى جايلى نە بىلەمىز

استانا. KAZINFORM - بۇرىنعى سۋديا ايگۇل سايلىبايەۆانىڭ گەرمانيادا ءىز-ءتۇسسىز جوعالىپ، كەيىننەن مۇردەسى تابىلعانى بەلگىلى. وپات بولعان وتانداسىمىزدىڭ جاقىن قۇربىسى ايگۇلدىڭ وتباسىلىق ءومىرى جايلى ايتىپ بەردى.

Айгүл Сайлыбаева
Фото: Тоғжан Есенбаеваның жеке мұрағатынан

ونىڭ سوزىنە قاراعاندا، بالا تاربيەسى مەن قارجىلىق ماسەلەلەرگە قاتىستى وتباسىندا ۇنەمى كيكىلجىڭ تۋىنداپ وتىرعان.

ستۋدەنت كەزدەن قۇربىمىز

«ايگۇلمەن شەففيلد قالاسىندا «بولاشاق» باعدارلاماسىمەن ءبىلىم الىپ جۇرگەن كەزىمدە تانىسقان ەدىم. سول ۋاقىتتا ول دا، مەن دە ءتىل ۇيرەنۋ كۋرسىنان ءوتىپ جۇرگەن ەدىك. تانىسقان ساتتەن-اق وتە جاقىن دوستىق قارىم-قاتىناس ورنادى. ول مەنەن ەكى جاس ۇلكەن، ءبىزدىڭ قارىم-قاتىناسىمىز اپالى-سىڭلىلەر اراسىنداعى بايلانىستى ەسكە تۇسىرەتىن. ول قايىرىمدى، ەلگەزەك ەدى. كەز كەلگەن ۋاقىتتا بارلىق ستۋدەنتكە قول ۇشىن سوزۋعا تىرىساتىن. كىتاپحانادا ءجيى جولىعاتىنبىز. وسىنداي دوستىق قارىم-قاتىناسىمىز وقۋىمدى اياقتاپ كەلگەننەن كەيىن قازاقستاندا دا ۇلاستى. ول سول كەزدە استانادا جۇمىس ىستەپ جۇرگەن- ءدى. ادام رەتىندە ول جايىندا تەك جاقسى جاقتارىن عانا ايتا الامىن. وتە قايىرىمدى جان بولاتىن، دوستارى دا كوپ ەدى. قازىرگى ۋاقىتتا سول كەزدە بىزبەن بىرگە ءبىلىم العان، ونى تانيتىن، سونىمەن قاتار ارىپتەستەرى دە ماعان جازىپ جاتىر. ول ۇنەمى كۇلىپ جۇرەتىن. بارلىعى دا ونىڭ ەلگەزەكتىگىن، اشىقتىعىن، مەيىرباندىعىن ايتىپ جاتىر. ونىڭ حاريزماسى دا ەرەكشە ەدى. وتە قاتاڭ سۋديا لاۋازىمىنا قاراماستان دوستارىنا دا، تۋعان-تۋىستارىنا دا ۋاقىت تاباتىن»، - دەپ ەسكە الادى ايگۇلدىڭ قۇربىسى توعجان ەسەنبايەۆا.

Айгүл Сайлыбаева
Фото: Тоғжан Есенбаеваның жеке мұрағатынан

كىتاپحاناداعى تانىستىق

ونىڭ ايتۋىنشا، ايگۇل بولاشاق جارىمەن ۋنيۆەرسيتەت كىتاپحاناسىندا تانىسقان.

«ولاردىڭ تانىستىعىنا كۋامىن. 2015 -جىلى كوپتەگەن ستۋدەنت سياقتى ءبىز دە ۋاقىتىمىزدىڭ ءبىراز بولىگىن كىتاپحانادا وتكىزەتىن ەدى. ايگۇل ءدال سول جەردە بولاشاق جارىمەن جولىقتى. ولار قاراپايىم ستۋدەنت بولاتىن. ارالاسا باستاعاننان كەيىن ارالارىندا ماحاببات سەزىمى ويانعان»، - دەدى توعجان.

توعجان قۇربىسىنىڭ كەزدەسىپ جۇرگەن جىگىتىنىڭ ناقتى جاسى نەشەدە بولعانىن بىلمەگەندىگىن ايتادى.

«ادامدار ولاردىڭ جاس ايىرماشىلىعى بولعانىن تالقىلاپ جاتىر. مەنىڭ بىلۋىمشە، ساشا تانىسقان كەزدە ءوزىنىڭ ناقتى جاسى قانشا ەكەندىگىن ايتپاعان، تەك 1-2 جاس ۇلكەن ەكەندىگىنە ەمەۋىرىن تانىتقان. ونىڭ جامان ويى بولدى دەپ ويلامايمىن، تانىسقىسى كەلگەن شىعار. جاسىم 22-دە دەگەنمەن، 18-19 جاستا بولعان. ول باكالاۆرياتتىڭ 1 كۋرس ستۋدەنتى بولدى. ولاردىڭ كىتاپحانادا ۇنەمى بىرگە وتىراتىندىعىن ءجيى كورەتىنبىز. سول جىلى كەزدەسۋىمىز ۇنەمى سول جەردە وتەتىن. ايگۇل ەكەۋىمىز سپورت زالىنا نەمەسە تاماقتانۋعا بىرگە بارعانىمىزبەن، ونى ساشامەن تەك كىتاپحانادا كورەتىن ەدىك. ساشا «بولاشاق» باعدارلاماسىنىڭ ستيپەندياتى ەمەس. بىلۋىمشە، تالدىقورعان تۋماسى. سول ۋاقىتتا ول قازاقستان ازاماتى رەتىندە ءبىلىم الىپ جۇرگەن»، - دەدى ول.

Айгүл Сайлыбаева
Фото: Қанат Сайлыбаевтың жеке мұрағатынан

جاقسى جىگىت سياقتى ەدى

توعجاننىڭ ايتۋىنشا، الەكساندر ءوزىن جاقسى جىگىت رەتىندە كورسەتە الدى. ونىڭ ايگۇلمەن اراداعى سەزىمى شىنايى ءارى ماحابباتقا تولى كورىنەتىن.

«2016 -جىلدىڭ قىركۇيەگىندە، ءتىل ۇيرەنۋ كۋرسىن اياقتاپ، ماگيستراتۋرادا وقۋىمدى باستاعان كەزدە ايگۇل ماعان ساشانىڭ جاتاقحاناسىنا بارىپ، بولمەسىن جيناۋدى، كىلتىن تاپسىرىپ، قانداي دا ءبىر كىتاپتاردى الىپ كەلۋىمدى ءوتىندى. «نە بولدى؟» دەگەن ساۋالىما ول توتەنشە جاعداي بولعانىن، ساشانىڭ ءبىر ستۋدەنتپەن توبەلەسىپ قالعانىن ايتتى. ايگۇلدىڭ ايتۋىنشا، ساشا ءبىر جىگىتتى ۇرىپ، ول ارىز جازعان. ءبىز وزگە ەلدەن كەلگەن ستۋدەنت بولعاندىقتان مۇنداي قىلىققا جول بەرۋگە بولمايتىن. سوندىقتان ساشانى 24 ساعاتتىڭ ىشىندە ەلدەن شىعارىپ جىبەردى. ول وقۋىن اياقتاعان جوق.

كەيىنىرەك ول وقۋىن ماسكەۋدە جالعاستىردى. سول ۋاقىتتا ايگۇل قازاقستاندا بولاتىن. ول استانا قالاسىنىڭ سارى ارقا اۋداندىق سوتىنىڭ سۋدياسى بولىپ تاعايىندالعان ەدى جانە ولاردىڭ قارىم-قاتىناسى قايتا جالعاستى. 2018 -جىلى قازاقستانعا ورالعاننان كەيىن ايگۇلمەن ءجيى كەزدەسىپ، اڭگىمەلەسىپ تۇراتىنبىز. ول ماسكەۋگە ءجيى ۇشىپ باراتىن، سۇيىكتىسى دە ءجيى كەلەتىن. 2019 -جىلى ساشا استاناعا كەلىپ، قۇربىلارىممەن بىرگە كۇتىپ الدىق. سول ۋاقىتتا ونىڭ ايگۇلمەن قارىم-قاتىناسىنىڭ جاقسى ەكەنىن بايقادىم. ول تاربيەلى، ءبىلىمدى جىگىت كورىندى. 2019 -جىلدىڭ سوڭىندا ولار شاڭىراق كوتەرۋگە شەشىم قابىلدادى. سول ۋاقىتقا دەيىن ايگۇل ونىڭ اناسىمەن، تۋعان- تۋىستارىمەن تانىسىپ ۇلگەرگەن بولاتىن. ول سۇيىكتىسىنىڭ اعاسىنىڭ سانكت-پەتەربوردا وتكەن ۇيلەنۋ تويىنا بارىپ، وتباسىلىق ءىس-شارالارىنا قاتىساتىن»، - دەدى ول.

توعجان قۇربىسىنىڭ ساۋاتتى زاڭگەر بولعانىن جانە تۇرىپ جاتقان ەلدىڭ زاڭدارىن زەردەلەپ، جۇمىس تابۋعا تىرىسقانىن ايتادى.

«الەكساندردا ءالى كۇنگە دەيىن قازاقستان ازاماتتىعى بار. ال ءبىز قازاقستانعا قوس ازاماتتىققا تىيىم سالىنعانىن بىلەمىز. دەگەنمەن، ول گەرمانيانىڭ دا ازاماتى. رەسەيدىڭ دە ازاماتى دەگەن ءسوز بار. ول رەسەيدىڭ دە ازماتى سياقتى. ويتكەنى، ول قىزىنا رەسەيلىك پاسپورت جاساتقان. ءبارى تاياۋدا عانا بولىپ تۇر. ايگۇل قىزىنىڭ قۇجاتتارىنا قول جەتكىزە المادى. ول قۇجاتتاردى رەسەي ەلشىلىگى ارقىلى جاساتقان. دەمەك، ول سول ەلدىڭ ازاماتى»، - دەدى توعجان.

ەسكە سالا كەتسەك، گەرمانيادا ەكس-سۋديا ايگۇل سايلىبايەۆانىڭ زورلىق بەلگىلەرى بار ءمايىتى تابىلعانىن جازعان بولاتىنبىز.

بۇرىنعى سۋديانىڭ جوعالعانى تۋرالى ونىڭ اعاسى قانات سايلىبايەۆ حابارلادى.

اۆتور

مارلان جيەمباي

سوڭعى جاڭالىقتار