الەك بولدۋين تۇسىرىلىمدە اتىپ ولتىرگەن وپەراتور: فيلمنىڭ رەكۆيزيتورى كىنالى دەپ تانىلدى
استانا. KAZINFORM - «توت» فيلمىنىڭ رەكۆيزيتورى حاننا گۋتەررەس-ريد ءتۇسىرىلىم الاڭىنداعى وپەراتور ايەل گالينا حاتچينستىڭ ولىمىنە كىنالى دەپ تانىلدى. ءتۇسىرىلىم كەزىندە قارۋ-جاراققا گۋتەررەس-ريد جاۋاپتى بولعان، ال سوت القاسى ول بوس پاترونداردىڭ اراسىندا اتىس پاترونىنىڭ بولۋىنا كىنالى دەگەن قورىتىندىعا كەلدى، دەپ جازادى ВВС.
ۋكراينالىق وپەراتور گالينا حاتچينس 2021-جىلدىڭ قازان ايىندا ا ق ش- تا «توت» فيلمىن ءتۇسىرۋ كەزىندە مەرت بولدى.
فيلمنىڭ باستى ءرولىن ويناۋشى ءارى پروديۋسەرى الەك بولدۋين ريەۆولۆەرمەن قوزعالىستى قايتالاپ جاتىپ، شۇرىپپەنى باسقاندا، قارۋ وقتاۋلى تۇرعانى بەلگىلى بولدى.
وق حاتچينستى ءولتىرىپ، فيلمنىڭ رەجيسسەرى دجوەل سوۋزانى جارالادى.
الەك بولدۋين دە ادام ءولتىردى دەگەن ايىپپەن سوت الدىندا جاۋاپ بەرەدى.
رەكۆيزيتور ىسىنە قاتىستى ۇكىم ونى قورعاۋعا كومەكتەسۋى مۇمكىن: ونىڭ ادۆوكاتتارى جاۋىنگەرلىك وق ءتۇسىرىلىم الاڭىنا گۋتەررەس-ريدتىڭ كىناسىنەن كەلگەنىن ايتىپ، كليەنتتەرىنىڭ بۇل ىستەن بەيحابار ەكەنىن العا تارتا الادى.
حاننا گۋتەررەس-ريد ءۇش جىلعا باس بوستاندىعىنان ايىرىلۋى مۇمكىن.
ايىپتاۋشى تاراپ سوتتا ونىڭ نيۋ-مەكسيكوداعى تۇسىرىلىمگە ۇيدەن وزىمەن بىرگە جەكە وق-ءدارى قورابىن الىپ كەتكەنىن جانە بۇل پاتروندار كەزدەيسوق تۇسىرىلىمگە قاجەتتى وقتارمەن ارالاسىپ كەتكەنى تۋرالى دالەلدەر كەلتىردى.
ناتيجەسىندە، پروكۋروردىڭ مالىمدەۋىنشە، گۋتەررەس-ريدتىڭ نەمقۇرايلىعى مەن جاۋاپسىزدىعى سالدارىنان وق كامەرا الدىندا دايىندىق جاساپ تۇرعان الەك بولدۋين قولىنداعى رەكۆيزيتتى ريەۆولۆەردەن تابىلدى.
سوت القاسى ءۇش ساعات تالقىلاپ، ۇكىم شىعاردى.
حاتچينس قايتىس بولعاننان كەيىن «توت» فيلمىنىڭ ءتۇسىرىلىمى توقتاتىلدى. ءبىراق وتكەن جىلى فيلمنىڭ كومانداسى ونى گالينانى ەسكە الۋ ءۇشىن اياقتاۋدى ۇيعارىپ، ونىڭ جەسىرى مەتتيۋ حاتچينستى اتقارۋشى پروديۋسەر رەتىندە شاقىردى.
اۆتور
ەركەجان سماعۇلوۆا
