الداعى بەس جىلدا ەۋروپا وداعىن كىم باسقارادى
استانا. KAZINFORM - الداعى بەس جىلدا ەۋروپالىق وداقتى كىم باسقارادى؟ بريۋسسەلدە ەۋرووداق ەلدەرى مەن ۇكىمەت باسشىلارى كەلىسسوز باستادى، دەپ حابارلايدى Euronews.
17-ماۋسىمدا بريۋسسەلدە ەۋروپا وداعىن الداعى بەس جىلدا كىم باسقاراتىنى تۋرالى كەلىسسوز باستالدى.
كەزدەسۋگە قاتىسۋشىلار ەۋروكوميسسيا باسشىسىن، ەۋروپالىق كەڭەس ءتوراعاسىن جانە ە و سىرتقى ساياسات جانە قاۋىپسىزدىك جونىندەگى جوعارعى كوميسسارىن سايلاۋ ماسەلەلەرىىن شەشۋگە ءتيىس.
ە و مەملەكەتتەرى مەن ۇكىمەت باسشىلارى قازىرگى جاعدايدى ەسكەرىپ، گەوگرافيالىق، گەندەرلىك جانە پارتيالىق تەپە-تەڭدىكتى ساقتاۋى كەرەك.
ەۋروكوميسسيا باسشىسى لاۋازىمىنا ناقتى فاۆوريت - ونىڭ قازىرگى ءتورايىمى ۋرسۋلا فون دەر ليايەن. دەگەنمەن، يتاليانىڭ ماريو دراگي مەن گرەكيانىڭ پرەمەر- ءمينيسترى كيرياكوس ميتسوتاكيس تە ناعىز ۇمىتكەر رەتىندە اتالدى.
ساراپشىلاردىڭ پىكىرىنشە، فون دەر ليايەن باسقاراتىن ەۋروپا حالىقتىق پارتياسىنىڭ ەۋروپارلامەنت سايلاۋىنداعى جەڭىسى جانە ونىڭ جۇمىس تۇراقتىلىعى وسى سايلاۋدا العا شىعۋىنا سەپتىگىن تيگىزە الادى.
«ەۋروپالىق كەڭەس ينستيتۋتسيونالدى وزگەرىستەردى ەنگىزۋگە وتە ىنتالى بولادى. پروتسەستى تەز اياقتاۋ ءۇشىن. ويتكەنى ءبىز وتە اۋمالى-توكپەلى زاماندا، الاساپىران گەوساياسي ۋاقىتتا ءومىر ءسۇرىپ جاتىرمىز. بۇل بىرىنشىدەن. ءبىزدى ترامپتىڭ تاعى ءبىر پرەزيدەنتتىگى كۇتىپ تۇر. سوندىقتان مەنىڭ ويىمشا، ە و كوشباسشىلارى جاڭا كۇن ءتارتىبى بار جاڭا كوميسسيانىڭ مۇمكىندىگىنشە تەزىرەك قۇرىلۋىنا مۇددەلى»، - دەيدى ەۋروپالىق ساياساتتى زەرتتەۋ ورتالىعىنىڭ ساراپشىسى سوفيا رۋسساك.
ەۋروپا كەڭەسىندە مۇمكىندىكتەر نەعۇرلىم اشىق، دەگەنمەن بارلىق بەلگىلەر ونى سوتسيال-دەموكراتتار وكىلى باسقاراتىنىن كورسەتەدى.
ەۋروپالىق كەڭەس ءتوراعاسى لاۋازىمىنا ەڭ ىقتيمال ۇمىتكەرلەر - پورتۋگاليانىڭ بۇرىنعى پرەمەر-ءمينيسترى انتونيۋ كوشتا مەن دانيا ۇكىمەتىنىڭ باسشىسى مەتتە فرەدەريكسەن.
ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلىنىڭ قىزمەتىنە كەلەتىن بولساق، سۇراقتار كوبىرەك.
ءبىراق، نەگىزىنەن، بۇل لاۋازىمعا ليبەرال ءوتۋى ءتيىس.
مۇنداعى ۇمىتكەرلەر - ەستونيا پرەمەر-ءمينيسترى كايا كاللاس، پولشا سىرتقى ىستەر ءمينيسترى رادوسلاۆ سيكورسكي جانە بەلگيانىڭ پرەمەر-ءمينيسترىنىڭ مىندەتىن اتقارۋشى الەكساندر دە كروو بولۋى مۇمكىن.
اۆتور
زارينا تۋعانبايەۆا
