الداعى 3 جىلدا باسپانا باعاسى ايتارلىقتاي قىمباتتايدى - مامان

استانا. KAZINFORM - الداعى 3 جىلدا ەلىمىزدە جىلجىمايتىن مۇلىك باعاسى ءبىرشاما قىمباتتايدى. مۇنداي پىكىردى قازاقستان ريەلتورلارى بىرلەسكەن قاۋىمداستىعى پرەزيدەنتىنىڭ كەڭەسشىسى نينا لۋكيانەنكو ايتتى.

ونىڭ اتاپ وتۋىنشە، قازىرگى ۋاقىتتا باسپانا نارىعىندا ءوسىم دە، قۇلدىراۋ دا بايقالمايدى.

«2024-جىلدىڭ قاڭتارىندا جاسالعان مامىلە سانى 37713 بولسا، وتكەن جىلدىڭ جەلتوقسانىندا 37818 بولعان ەدى. ياعني، ءوسىم دە، قۇلدىراۋ دا بايقالىپ وتىرعان جوق. جالپى، جىل ىشىندەگى باعا قورىتىندىسى مىناداي: جاڭادان سالىنعان باسپانا قۇنى 2,9 پايىزعا قىمباتتاپ، قايتالاما نارىقتاعى باعا 4,4 پايىزعا تومەندەدى»، - دەدى ول قازاقپارات تىلشىسىنە بەرگەن سۇحباتىندا.

وسى ورايدا ساراپشى قاڭتارداعى ينفلياتسيانىڭ رەسمي دەڭگەيى 0,8 پايىزدى قۇراسا، اقشانىڭ جىلدىق ماندە قۇنسىزدانۋى 9,5 پايىزعا جەتكەنىن ايتادى.

«وسىدان-اق شارشى مەتر باعاسىنىڭ تومەندەۋ ترەندى جالعاسىپ جاتقانى جايلى قورىتىندى شىعارۋعا بولادى. مۇنىڭ ۇستىنە اكتيۆتەردى ءارتاراپتاندىرۋ جانە ينۆەستيتسيالاۋ ماقساتىندا جىلجىمايتىن مۇلىك ساتىپ الۋ ءۇشىن قازىرگى ءسات وتە قولايلى. جاعدايعا قاتىستى ءوز كوزقاراسىمدى بىلدىرسەم، الداعى 3 جىلدا جىلجىمايتىن مۇلىك باعاسىنىڭ ايتارلىقتاي وسكەنىن كورەمىز»، - دەدى نينا لۋكيانەنكو.

اۆتور

مارلان جيەمباي