العىس ايتۋ كۇنى: اسكەري بورىشىن وتەپ جۇرگەن وزگە ۇلت وكىلدەرى العىس ايتتى
اقتوبە. KAZINFORM - ق ر ۇلتتىق ۇلانىنىڭ «باتىس» وڭىرلىك قولباسشىلىعىنا قاراستى 55/17 اسكەري بولىمىندە وزگە ۇلت وكىلدەرى دە وتان الدىنداعى بورىشىن وتەپ جاتىر. ورىس، تاتار، ازەربايجان، قىرعىز، وزبەك، ۇيعىر ۇلتىنىڭ وكىلدەرى العىس ايتۋ كۇنى تۋرالى ءوز وي- پىكىرلەرىن ورتاعا سالدى.
«بۇل كۇن قازاقتاردىڭ باۋىرمال ءارى قوناقجايلىلىعىنىڭ كورسەتكىشى دەسەم ارتىق ايتقانىم ەمەس. كوكتەمنىڭ جايماشۋاق جىلۋىمەن تۇسپا-تۇس كەلگەن مەرەكەدە مەن اتا-اناما، دوستارىما العىس ايتقىم كەلەدى. قيىن ۋاقىتتا كومەكتەسىپ، قولداۋ مەن قامقورلىق كورسەتكەنى ءۇشىن شىن جۇرەكتەن ريزاشىلىعىمدى بىلدىرەمىن»، - دەدى 55/17 اسكەري ءبولىمى اتقىشتار روتاسىنىڭ ساربازى سايد ارمەدينوۆ.
ول الماتى وبلىسى كەتپەن اۋىلىندا دۇنيەگە كەلگەن. 18 جاستاعى جىگىت قازاق تىلىندە ەركىن سويلەيدى.
«ءوزىم الماتى وبلىسى ۇيعىر اۋدانىنان كەلىپ، وتان الدىنداعى بورىشىمدى وتەپ ءجۇرمىن. قازاق ءتىلىن ەركىن مەڭگەرگەن سوڭ مەنىڭ جانىمدا دوس كوپ. وتباسىمىزدا قازاق تىلىندە سويلەيمىز، مۇندا دا قازاقتار اراسىندا جولداس تاۋىپ، قۋانىپ قالدىم»، - دەدى ول.
55/17 اسكەري بولىمىندە بورىشىن وتەپ جۇرگەن فارۋح تۋعالوۆ تۇركىستان وبلىسىنىڭ تۋماسى. ول قازاق مەكتەبىندە ءبىلىم العان، ءتىپتى دومبىرا تارتادى.
«قازاقستان - مەنىڭ تۋعان جەرىم. اتا-انام، باۋىرلارىم وسىندا. ۇلتىم تاجىك بولعانىمەن، ءتىلىم دە، جۇرەگىم دە قازاق دەپ ايتار ەدىم. ءوزىم قازاق مەكتەبىندە ءبىلىم الىپ، ۇلتتىق اسپاپ - دومبىرانى دا ۇيرەنىپ الدىم. العىس ايتۋ كۇنى ءبىز ءۇشىن دە ۇلكەن ءارى جاۋاپتى مەرەكە. بۇل قيىن-قىستاۋ كەزدە قۋانىش پەن قايعىنى ءبولىسىپ، وزگەلەرگە پانا بولا بىلگەن قازاق حالقىنا وزگە ۇلت وكىلدەرىنىڭ ريزاشىلىعىن ايتۋعا مۇمكىندىك بەرىلگەن شاق. وسى كۇنى جانىمداعى جاننىڭ بارىنە العىس ايتامىن. العىس ايتۋ - بۇل ادامنىڭ جۇرەگىنە ەرەكشە جىلۋلىق سىيلايتىن كەرەمەت قاسيەت، ادامگەرشىلىكتىڭ جوعارعى كورسەتكىشى»، - دەدى قاتارداعى جاۋىنگەر فارۋح تۋعالوۆ.
ق ر ۇلتتىق ۇلانىنىڭ «باتىس» وڭىرلىك قولباسشىلىعىنا قاراستى 55/17 اسكەري بولىمىندە 400-دەن استام قازاقستاندىق اسكەري بورىشىن وتەپ ءجۇر.
اۆتور
التىناي ساعىندىقوۆا
