الاياقتار حابارلاسقاندا نە ىستەۋ كەرەك

استانا. KAZINFORM – ق ر ادىلەت مينيسترلىگىنىڭ رەسمي وكىلى تالعات ءۋالي تۇرعىندارعا الاياقتار حابارلاسقان جاعدايدا نە ىستەۋ كەرەگىن ءتۇسىندىردى.

سپيكەردىڭ ايتۋىنشا، الاياقتار وزدەرىن سوت ورىنداۋشىسى رەتىندە تانىستىرىپ، ازاماتتاردان قارىزدارىن وتەۋدى تالاپ ەتەدى. تالاپ ورىندالماعان جاعدايدا جەكە شوتتاردى، مۇلىكتى بۇعاتتايتىنىن ايتىپ قورقىتادى.

«سىزگە وسىنداي قوڭىراۋ تۇسسە، ادىلەت مينيسترلىگىنىڭ، رەسپۋبليكالىق جانە وڭىرلىك جەكە سوت ورىنداۋشىلار پالاتاسىنىڭ رەسمي سايتتارىنداعى اقپاراتتى ءوز بەتىڭىزشە تەكسەرىپ، قاجەت بولعان جاعدايدا بانككە حابارلاسا الاسىز. اتقارۋشىلىق ءىس جۇرگىزۋدىڭ بار- جوعىن تەكسەرۋ ءۇشىن ينتەرنەت- براۋزەردىڭ ىزدەۋ جۇيەسىندە AIS OIP (اتقارۋشىلىق ءىس جۇرگىزۋدىڭ اۆتوماتتاندىرىلعان اقپاراتتىق جۇيەسى) دەپ جازۋ كەرەك، سودان كەيىن «بورىشكەرلەر مەن تىيىم سالۋلار ءتىزىلىمى» ءبولىمىن تاڭداپ، تەك ج س ن ەنگىزۋ كەرەك»، - دەپ ءتۇسىندىردى ت. ءۋالي مينيسترلىك ۇيىمداستىرعان بريفينگتە.

ادام شىن مانىندە بورىشكەر بولسا، قارىزى تۋرالى اقپارات، سوت ورىنداۋشىسىنىڭ اتى-ءجونى جانە ونىڭ تەلەفون ءنومىرى كورسەتىلەدى.

«ال ەگەر بورىشكەر بولماساڭىز، قىزعىلت سارى تۇسپەن «سۇراۋىڭىز بويىنشا ەشتەڭە تابىلمادى» حابارى پايدا بولادى. بۇل ءسىزدىڭ شوتتارىڭىز بەن مۇلىكتەرىڭىزدى ەشكىم بۇعاتتالماعان جانە بۇعاتتاي المايدى دەگەندى بىلدىرەدى. تەك رەسمي دەرەككوزدەرگە سەنىڭىز، جەكە دەرەكتەرىڭىزدى بەلگىسىز تۇلعالارعا بەرمەڭىز»، - دەيدى رەسمي وكىل.

قوسىمشا اقپاراتتى 119 نەمەسە 87172580058 نومىرلەرى بويىنشا الۋعا بولادى.

اۆتور

ايجان سەرىكجان قىزى