الماتىدا تاۋعا شىققان ءۇش قىز تىك بەتكەيدەن وزدىگىنەن تۇسە الماي قالعان
استانا. KAZINFORM - الماتى وبلىسى تالعار اۋدانى بۋكرەيەۆ شىڭى ماڭىندا تەڭىز دەڭگەيىنەن 3010 مەتر بيىكتىكتە الماتى قالاسىنىڭ مونيتورينگ جانە جەدەل ارەكەت ەتۋ ورتالىعىنىڭ قۇتقارۋشىلارى 2007 -جىلى تۋعان ءۇش قىزعا كومەك كورسەتتى. بۇل تۋرالى ت ج م ءمالىم ەتتى.
— تىك بەتكەيگە بايلانىستى قىزدار تاۋدان وزدىگىنەن تۇسە الماي، قۇتقارۋشىلاردان كومەك سۇراعان. ولارمەن تۇراقتى بايلانىس ورناتىلىپ، ورنالاسقان جەرىنىڭ گەولوكاسياسى انىقتالعان. قۇتقارۋشىلار قىزداردى بەساعاش كەنتىنە قاراي باعىتتالعان اۆتوموبيل جولىنا دەيىن امان-ەسەن الىپ ءتۇستى، — دەلىنگەن حابارلامادا.
ولارعا مەديسينالىق كومەك قاجەت بولعان جوق. قىزدار ءارى قاراي جولدارىن ءوز بەتتەرىنشە جالعاستىرۋدى جوسپارلاعان.
ايتا كەتەيىك، جىل باسىنان بەرى قۇتقارۋشىلار 70 مىڭنان استام شاقىرتۋعا شىعىپ، 8 مىڭنان استام ادامدى قۇتقارعان. تاعى 9 مىڭنان استام ادام قاۋىپتى ايماقتاردان ەۆاكۋاتسيالانىپ، 3 مىڭعا جۋىق زارداپ شەككەن ادامعا مەديسينالىق كومەك كورسەتىلگەن. ەلىمىزدە جىل سايىن 18 مىڭنان استام تابيعي جانە تەحنوگەندىك توتەنشە جاعداي تىركەلەدى. ونىڭ شامامەن 12 مىڭى - ءورت.
