الماتىدا تاۋداعى كولدەردىڭ سۋ دەڭگەيىن تومەندەتۋ بويىنشا جۇمىس باستالدى
الماتى. KAZINFORM - الماتىنىڭ تاۋلى ايماعىندا سەل ءجۇرۋىنىڭ الدىن الۋ ماقساتىندا «قاز سەلدەن قورعاۋ» م م كۇشتەرىمەن مۇزداق كولدەردەگى سۋ دەڭگەيىن رەتتەۋ بويىنشا الدىن الۋ شارالارى جۇرگىزىلىپ جاتىر.
ت ج م مالىمەتىنشە، قازىرگى ۋاقىتتا الماتىنىڭ بيىك تاۋلى ايماعىنداعى 6 مۇزداق كولدە جۇمىستار باستالعان. ماماندار ارتىق سۋدى بۇرۋ جانە كولدەردەگى قاۋىپسىز سۋ دەڭگەيىن ۇستاپ تۇرۋ جۇمىستارىن قامتاماسىز ەتۋدە. سونداي-اق سۋ بۇرۋ ارنالارىنىڭ جاعدايىن جاقسارتىپ، ولاردى قالپىنا كەلتىرۋ جۇمىستارىن اتقارىپ جاتىر.
ال كىشى الماتى وزەنى باسسەينىندەگى مۇزداق كولگە سۋدى سورىپ شىعارۋ جانە باقىلاۋلى تۇردە بۇرۋ ءۇشىن پوليەتيلەندى سيفوندىق قۇبىرلار جەتكىزىلگەن.
- مۇزداق كولدەردىڭ باسىم بولىگى جەتۋى قيىن بيىك تاۋلى ايماقتاردا ورنالاسقاندىقتان، قۇبىرلاردى، جابدىقتار مەن قاجەتتى ماتەريالداردى جەتكىزۋ جۇمىستارى «قاز اۆياقۇتقارۋ» تىكۇشاقتارىن جۇمىلدىرا وتىرىپ جۇزەگە اسىرىلادى. پوليەتيلەندى قۇبىرلار سيفونداۋ ادىسىمەن مۇزداق كولدەردەگى سۋ دەڭگەيىن قاۋىپسىز بەلگىگە دەيىن تومەندەتۋ ءۇشىن پايدالانىلادى، - دەپ حابارلادى ت ج م.
سونىمەن قاتار ت ج م الماتىنىڭ تاۋلى ايماعىنداعى گيدرولوگيالىق جانە سەل جاعدايى باقىلاۋدا ەكەنىن اتاپ ءوتتى.
ەسكە سالايىق، الماتىدا سەل قاۋپىنىڭ الدىن الۋ ماقساتىندا مۇزداق كولدەردىڭ جاي-كۇيىن تاۋلىك بويى باقىلايتىن بەس بيىك تاۋلى ماۋسىمدىق باقىلاۋ بەكەتى جۇمىسىن باستادى.
