الماتىدا قىركۇيەكتە 3 كوشەنىڭ ۇزارتىلعان ۋچاسكەلەرى اشىلادى - الماتى اكىمى
الماتى. KAZINFORM - الماتىدا ماگيسترالدى كوشەلەردى ۇزارتۋ جۇمىستارى ءجۇرىپ جاتىر. الماتى اكىمى دارحان ساتىبالدى بۇل جۇمىستاردىڭ قالاي ءجۇرىپ جاتقانىمەن الەۋمەتتىك جەلىدەگى پاراقشاسىندا ءبولىستى.
قالا باسشىسىنىڭ جازۋىنشا، شاھار شەكاراسىنا دەيىن جانە ودان ءارى ۇلكەن الماتى اۆتوموبيل اينالما جولىنا دەيىن ۇزارتىلاتىن كوشەلەردە جەر تەلىمدەرىن ساتىپ الۋ جۇمىستارىمەن قاتار ينجەنەرلىك كوممۋنيكاتسيالاردى كوشىرۋ جانە جول توسەمىنىڭ نەگىزىن دايىنداۋ جۇمىستارى جۇرگىزىلىپ جاتىر.
الماتى اكىمى قىركۇيەك ايىندا بىرنەشە ۋچاسكەدە كولىك قوزعالىسىن اشۋدى تاپسىرعانىن اتاپ ءوتتى. ولار:
- رىسقۇلوۆ داڭعىلىنىڭ وڭعارسىنوۆا كوشەسىنەن قالا شەكاراسىنا دەيىنگى جاڭا ۋچاسكەسى؛
- تولە بي كوشەسىنىڭ ياسساۋي كوشەسىنەن ءاشىموۆ كوشەسىنە دەيىنگى جانە ودان ءارى قالا شەكاراسىنا دەيىنگى ەكى ۋچاسكەسى؛
- جۇبانوۆ كوشەسىنىڭ كارەرنايا كوشەسىنەن قالا شەكاراسىنا دەيىنگى ءبىرىنشى ۋچاسكەسى.
سونداي-اق اباي داڭعىلى بويىنشا دا مەرزىم وزگەرمەيدى - بيىل جول ۇلكەن الماتى اۆتوموبيل اينالما جولىنا قوسىلۋى ءتيىس.
- بۇل جوبالار قالانىڭ كولىك ينفراقۇرىلىمىن دامىتۋداعى باسىم باعىتتاردىڭ ءبىرى. سوندىقتان ولاردى تۇراقتى باقىلاۋىمدا ۇستاپ وتىرمىن. جەر تەلىمدەرىن ساتىپ الۋ، ينجەنەرلىك كوممۋنيكاتسيالاردى كوشىرۋ ماسەلەسى بويىنشا تۇراقتى تۇردە كەڭەستەر وتكىزىپ، تۋىنداعان تۇيتكىلدى جەدەل قاراستىرىپ كەلەمىز، - دەپ جازدى دارحان ساتىبالدى.
ەسكە سالايىق، بۇعان دەيىن سولتۇستىك اينالما جولى، تىلەنديەۆ، ساين كوشەلەرى، سونداي-اق رىسقۇلوۆ پەن اباي داڭعىلدارى ۇلكەن الماتى اۆتوموبيل اينالما جولىنا دەيىن ۇزارتىلاتىنىن جازعانبىز.
