الماتىدا «قازاق فيلم» پاركىنىڭ تۇجىرىمداماسى ازىرلەنىپ جاتىر
الماتى. KAZINFORM - الماتىدا قازاقستان كينەماتوگرافياسىنىڭ تاريحىنا ارنالعان جاڭا قوعامدىق كەڭىستىكتىڭ تۇجىرىمداماسى ازىرلەنىپ جاتىر.
قوعامدىق كەڭىستىكتەردى دامىتۋ باسقارماسىنىڭ مالىمەتىنشە، «قازاق فيلم» كينەماتوگرافيالىق پاركى سەرۋەندەۋگە، دەمالۋعا جانە وتاندىق كينو ونەرىمەن تانىسۋعا ارنالعان زاماناۋي ورىن بولماق.
كەڭىستىكتە بىرنەشە تاقىرىپتىق ايماق قۇرۋ كوزدەلگەن. ولاردىڭ ءارقايسىسى كەلۋشىلەردى وتاندىق كينەماتوگرافيانىڭ ءار كەزەڭدەگى دامۋ تاريحىمەن تانىستىرادى.
جوبا اياسىندا سەرۋەندەۋگە ارنالعان اللەيالار، ينتەراكتيۆتى جانە مۋلتيمەديالىق ينستاللياتسيالار، اشىق اسپان استىندا فيلمدەر كورسەتۋگە ارنالعان امفيتەاتر، بالالار الاڭى مەن دەمالىس ايماقتارىن سالۋ قاراستىرىلعان.
— قازاقستان كينوسىنىڭ تاريحىن ۆيزۋالدى ەلەمەنتتەر ارقىلى عانا ەمەس، زاماناۋي ينتەراكتيۆتى فورماتتار ارقىلى دا تانىستىرۋ كوزدەلىپ وتىر. بۇل كەلۋشىلەرگە كينەماتوگرافيانىڭ دامۋ جولىمەن، ايتۋلى تۋىندىلارمەن جانە ەلىمىزدىڭ مادەني مۇراسىمەن قولجەتىمدى ءارى زاماناۋي فورماتتا تانىسۋعا مۇمكىندىك بەرەدى، — دەلىنگەن حابارلامادا.
ەسكە سالساق، ايدا بالايەۆا «قازاق فيلمنىڭ» وتباسىلىق دەمالىس ورتالىعىنا اينالاتىنىن مالىمدەگەن ەدى.
اۆتورلار
قىرمىزى سكەندىر
