الماتىدا كولىكتى توقتاتپاي شىعارىندىلارىن ولشەيتىن جۇيە سىناقتان وتكىزىلىپ جاتىر

الماتى. KAZINFORM - الماتىدا پيلوتتىق جوبا اياسىندا كولىك قوزعالىسى كەزىندە كولىكتەردەن بولىنەتىن زياندى زاتتاردىڭ مولشەرىن قاشىقتان ولشەيتىن تەحنولوگيا سىناقتان وتكىزىلە باستادى.

Алматыда көлікті тоқтатпай шығарындыларын өлшейтін жүйе сынақтан өткізіліп жатыр
Фото: Алматы әкімдігі

الماتى قالاسى ەكولوگيا جانە قورشاعان ورتا باسقارماسىنىڭ مالىمەتىنشە، OPUS RSE جۇيەسى كولىكتى توقتاتپاي-اق پايدالانىلعان گاز قۇرامىنداعى لاستاۋشى زاتتاردىڭ ناقتى دەڭگەيىن انىقتايدى. سىناق جۇرگىزۋ ءۇشىن كومپانيا قالانىڭ ءارتۇرلى اۋداندارىنداعى جولعا ورناتىلاتىن RSD6000 جىلجىمالى جابدىعىن ۇسىندى.

Алматыда көлікті тоқтатпай шығарындыларын өлшейтін жүйе сынақтан өткізіліп жатыр
Фото: Алматы әкімдігі

ولشەۋ جۇمىستارى ەكى اپتا ىشىندە 12 كۇن بويى جۇرگىزىلەدى. جۇيەنىڭ كولىك قوزعالىسى ءارتۇرلى قارقىنمەن جۇرەتىن جاعدايدا قالاي جۇمىس ىستەيتىنىن تەكسەرۋ ءۇشىن جابدىقتىڭ ورنالاسقان جەرى كۇن سايىن وزگەرتىلەدى. OPUS كومپانياسىنىڭ وكىلى تەحنيكالىق قولداۋ كورسەتىپ، جابدىقتى كاليبرلەۋدى جانە الىنعان دەرەكتەردىڭ دۇرىستىعىن تەكسەرۋدى قامتاماسىز ەتەدى.

Алматыда көлікті тоқтатпай шығарындыларын өлшейтін жүйе сынақтан өткізіліп жатыр
Фото: Алматы әкімдігі

- سىناق قورىتىندىسى بويىنشا ماماندار اۆتوكولىكتەردەن بولىنەتىن زياندى زاتتاردىڭ دەڭگەيىن تالداپ، كورسەتكىشتەردى حالىقارالىق دەرەكتەرمەن سالىستىرادى. سونداي-اق قورشاعان ورتانى شامادان تىس لاستايتىن كولىك قۇرالدارىن انىقتاۋ كريتەريلەرىن ۇسىنادى، - دەپ حابارلادى باسقارمادان.

ۆەدومستۆو وكىلدەرىنىڭ ايتۋىنشا، پيلوتتىق جوبانىڭ ناتيجەسى تەحنولوگيانىڭ تيىمدىلىگىن باعالاۋعا جانە الماتىداعى اۆتوكولىكتەردىڭ ەكولوگيالىق تالاپتارعا سايكەستىگىن باقىلاۋ ءۇشىن الداعى ۋاقىتتا قولدانۋ مۇمكىندىگىن انىقتاۋعا كومەكتەسەدى.

Алматыда көлікті тоқтатпай шығарындыларын өлшейтін жүйе сынақтан өткізіліп жатыр
Фото: Алматы әкімдігі

ەسكە سالايىق، الماتىدا بيىل 28- ساۋىردەن باستاپ تومەن ەميسسيالى ايماقتىڭ (LEZ) پيلوتتىق جوباسى ىسكە قوسىلدى.

ال 1- قىركۇيەكتەن باستاپ الماتىدا بەنزين، گاز جانە ديزەل وتىنىمەن جۇرەتىن اۆتوكولىكتەر ەكولوگيالىق نورماتيۆتەرگە سايكەستىگىن انىقتاۋ ءۇشىن تەحنيكالىق تەكسەرۋدەن ءوتۋ مىندەتتەلدى.

بۇعان دەيىن الماتىداعى قويۋ تۇتىنمەن قالاي كۇرەسۋگە بولاتىنىن جازعانبىز.