الماتىدا كەلەسى جىلى SkyTrain قۇرىلىسى باستالادى
استانا. قازاقپارات - 2030 -جىلعا قاراي الماتىداعى قوعامدىق كولىك باعىتتارى تاعى 60 شاقىرىمعا ۇزارادى. حالىق سانى جىل ساناپ وسكەندىكتەن، اكىمدىك وسىنداي شەشىم قابىلداعان، دەپ حابارلايدى 24KZ.
جاڭا مارشرۋتتاردىڭ باسىم بولىگىندە SkyTrain مونورەلستى كولىگى جۇرەدى. ول مەگاپوليستىڭ شىعىسى مەن باتىسىن بايلانىستىرادى. قۇرىلىستى كەلەسى جىلى باستاۋ جوسپارلانعان.
رايىمبەك داڭعىلىمەن وتەتىن SkyTrain جوباسىنداعى قوس جەلىنىڭ جالپى ۇزىندىعى - 46 شاقىرىمنان اسادى. پويىزدار ارنايى 8-14 مەترلىك ەستاكادامەن جۇرەدى. سوندىقتان جەلىگە كەپتەلىس پەن باعدارشام كەدەرگى ەمەس. جاڭا قوعامدىق كولىك ەكى باعىتتا قاتىنايدى. ءبىرى رايىمبەك داڭعىلىمەن جۇرسە، ەكىنشىسى ءال-فارابي داڭعىلىن بويلايدى. قوس جەلى شاھاردىڭ «شىعىس قاقپاسىندا» توعىسادى. جول بويىندا جالپى 27 بەكەت بولادى.
اسان بوستانوۆ، قالالىق جول ينفراقۇرىلىمىن دامىتۋ باسقارماسى باسشىسىنىڭ ورىنباسارى:
- جوسپار بويىنشا العاشقى جەلى اۋەجايدان باستالىپ، رايىمبەك داڭعىلى ارقىلى التىن وردا بازارىنا دەيىن بارادى. قازىر جوبانى جان-جاقتى زەرتتەپ جاتىرمىز. قۇرىلىستى كەلەسى جىلى باستاۋ جوسپاردا بار. جوبا جولاۋشىلاردىڭ قالا ىشىندە ءجۇرىپ-تۇرۋىن جەڭىلدەتەدى. اسىرەسە تاڭەرتەڭگى كەپتەلىستە جۇيكەسى جۇقارىپ، ۋاقىتى جولدا وتەتىن الماتىلىقتار ۇلكەن ءۇمىت ارتىپ وتىر. ءبىر پويىز 500-گە جۋىق ادامدى تاسىمالداي الادى.
بىلتىر رايىمبەك داڭعىلىندا BRT قۇرىلىسى باستالعان ەدى. ءبىراق وسى باعىتپەن SkyTrain دە وتەتىن بولعاندىقتان، جۇمىس ۋاقىتشا توقتادى. بۇعان دەيىن سالىنعان اۆتوبۋس جولاعى جول شەتىنە كوشىرىلەدى. «بۇل بيۋدجەت اقشاسىن ۇنەمدەۋگە مۇمكىندىك بەرەدى»، - دەيدى اكىمدىك قىزمەتكەرلەرى. BRT- نىڭ قۇرىلىسى SkyTrain جوباسى ىسكە اسقان سوڭ، 2030 -جىلى جالعاسادى.
24.kz
