الماتىدا جۇك كولىكتەرىنىڭ قوزعالىسىن جاپپاي توقتاتۋعا شاقىرعان تۇرعىن قاماۋعا الىندى

پوليتسيانىڭ مالىمەتىنشە، الەۋمەتتىك جەلىدە ەر ادامنىڭ بەينەۇندەۋى تاراعان. وندا ول جۇرگىزۋشىلەردى 1 -قاراشا كۇنى جۇك كولىكتەرىنىڭ قوزعالىسىن ۇيىمداسقان تۇردە توقتاتۋعا شاقىرعان.

قۇقىق قورعاۋ ورگاندارى بەينەجازبا اۆتورىنىڭ جەكە باسىن انىقتادى.

- ۇندەۋ اۆتورى 41 جاستاعى ا. بايمۇحانوۆ بولىپ شىقتى. رۇقسات ەتىلمەگەن بۇقارالىق ءىس-شارا ۇيىمداستىرۋعا شاقىرعانى ءۇشىن ول اكىمشىلىك جاۋاپكەرشىلىككە تارتىلدى. سوت شەشىمىمەن كىنالى دەپ تانىلىپ، 15 تاۋلىككە اكىمشىلىك قاماۋعا الىندى، - دەلىنگەن پوليتسيا حابارلاماسىندا.

ايتا كەتەيىك، بيىل شىلدە ايىنان باستاپ الماتىدا اۋىر جۇك كولىكتەرىنىڭ قوزعالىسىنا شەكتەۋلەر ەنگىزىلگەن بولاتىن. كۇن سايىن ساعات 07:00-دەن 22:00-گە دەيىن وسكە تۇسەتىن جۇكتەمەسى 8 توننادان اساتىن جۇك كولىكتەرىنە ساين كوشەسى، ءال-فارابي داڭعىلى، شىعىس اينالما اۆتوموبيل جولى جانە رىسقۇلوۆ داڭعىلىمەن شەكتەلگەن اۋماقتا جۇرۋگە تىيىم سالىنعان.

بۇعان دەيىن قىركۇيەك ايىندا الماتىدا اتالعان شەكتەۋلەردى بۇزعانى ءۇشىن 3,7 مىڭنان استام جۇك كولىگىنىڭ جۇرگىزۋشىسى اكىمشىلىك جاۋاپكەرشىلىككە تارتىلعانى حابارلانعان ەدى.