الماتى مەتروسىندا بومبا بارىن ايتقان ايەل ۇستالدى

الەۋمەتتىك جەلىلەردە «رايىمبەك باتىر» ستانسياسىنىڭ جابىلعانى تۋرالى اقپارات تارادى. جولاۋشىلارعا ساپارىن اۆتوبۋستارمەن جالعاستىرۋ ۇسىنىلعان. بۇل جاعداي قالا تۇرعىندارىنىڭ اراسىندا سۇراق تۋعىزدى.

پوليتسيانىڭ مالىمەتىنشە، مەترو قىزمەتكەرلەرىنە ءبىر ايەل جارىلعىش قۇرىلعى بار ەكەنىن حابارلاعان. ول دەرەۋ ۇستالدى.

- ستانسيادا ءتيىستى مامانداردىڭ قاتىسۋىمەن كوميسسيالىق تەكسەرىس جۇرگىزىلدى. ناتيجەسىندە جارىلعىش قۇرىلعىلار مەن كۇدىكتى زاتتار انىقتالعان جوق، - دەپ حابارلادى الماتى پوليتسيا دەپارتامەنتىنىڭ باسپا ءسوز قىزمەتى.

الدىن الا مالىمەت بويىنشا، ايەل پسيحيكالىق دەنساۋلىق ورتالىعىندا ەسەپتە تۇرادى. قازىر تەكسەرىس جۇرگىزىلىپ جاتىر. ونىڭ قورىتىندىسى بويىنشا ايەلدىڭ ارەكەتىنە قۇقىقتىق باعا بەرىلەدى.

پوليتسيا مەتروپوليتەننىڭ شتاتتىق رەجيمدە جۇمىس ىستەپ تۇرعانىن جانە جاعداي قۇقىق قورعاۋ ورگاندارىنىڭ باقىلاۋىندا ەكەنىن اتاپ ءوتتى.

الماتىدا بومبا تۋرالى جالعان حابارلامالار جيىلەپ كەتتى. بۇعان دەيىن Dostyk Plaza ساۋدا ورتالىعىندا بومبا بار دەگەن حابارلاما تاراپ، ادامدار ەۆاكۋاتسيالاندى.

سونداي-اق 20 -قازاندا UIB جانە تاعى بىرنەشە ۋنيۆەرسيتەتتە جارىلعىش زاتتىڭ بار-جوعى تەكسەرىلدى.