الماتى مەن بەيجىڭ اراسىندا پويىز قاتىنايدى

 ەندى بەيجىڭنەن جۇكتى تىكەلەي جونەلتۋگە بولادى. جۇك پويىزى اپتاسىنا 1 رەت جۇرەدى. جوبا ساۋدا-ساتتىق پەن ايماقارالىق لوگيستيكانى دامىتۋعا باعىتتالعان. جاڭا پويىز ارنايى بەلگىلەنگەن كەستە بويىنشا جۇرەدى. العاشقى ح9305 ءنومىرلى پويىز ليانسيان ستانسياسىنان جونەلتىلدى. ول قىتايدىڭ سولتۇستىك باتىس بولىگىمەن ءجۇرىپ وتىرىپ شىينجاڭ ۇيعىر اۆتونومدىق اۋدانى ارقىلى الاتاۋ پورتىنا بارىپ، شەكارادان وتەدى. ودان ءارى قاراي الماتىعا بەت الادى. تيەلگەن جۇكتەر شامامەن 10 كۇندە جەتەدى.

«بۇل - ساۋدا جانە ەكونوميكالىق الماسۋلار ءۇشىن تۇراقتى جانە ءتيىمدى لوگيستيكالىق قادام. ءارى ترانسشەكارالىق جۇكتى جەتكىزۋگە كەپىلدىك بولا الادى. ەڭ باستىسى، جول شىعىندارى ازايادى»، - دەيدى ماماندار.

قىتايلار بۇل جوباعا ەرەكشە ءمان بەرىپ وتىر. پويىزدىڭ ۇزدىكسىز قاتىناۋى ءۇشىن بەيجىڭ تەمىرجول لوگيستيكالىق ورتالىعى «جاسىل ءدالىز» رەجيمىن ۇسىنىپ وتىر.

 ليۋ بين، بەيجىڭ تەمىرجول لوگيستيكالىق ورتالىعىنىڭ مەنەدجەرى:

- بۇل پويىز كەستە بويىنشا بەلگىلەنگەن ۋاقىتتا، باعىتتا جانە ارنايى نومىرمەن جۇرەدى. ول تاسىمالداۋ تيىمدىلىگى مەن تۇراقتىلىعىن ەداۋىر ارتتىرادى. بۇل كومپانيالارعا ءوندىرىس كەستەسىن جوسپارلاپ تاپسىرىستاردى ءوزارا ورىنداۋ جۇمىستارىن جەڭىلدەتەدى. جالپى قازاقستان مەن قىتاي اراسىنداعى كولىك- لوگيستيكالىق ىنتىماقتاستىعى جىلدان جىلعا نىعايىپ كەلەدى. بىلتىر تەمىرجول ارقىلى ەكى ەل اراسىندا 35,6 ميلليون توننا جۇك تاسىمالداندى. بۇل - رەكورد. ودان بولەك، الماتى مەن اقتاۋ قالالارىندا ترانسكاسپي حالىقارالىق كولىك باعىتى بويىنشا ترانزيتتىك جۇك تاسىمالدارىن كوبەيتۋ ءۇشىن كونتەينەرلىك حابتار پايدالانۋعا بەرىلدى. وسىنىڭ ارقاسىندا كولەمى 36 پايىزعا ارتىپ 77 مىڭ كونتەينەر جەتكىزىلدى.

 ايتا كەتۋ كەرەك، دوستىق-الاتاۋ شەكارالىق تەمىرجول وتكەلىنىڭ ەكىنشى بولىگى دوستىق- مويىنتى باعىتى ىسكە قوسىلعالى وتكىزۋ مۇمكىندىگى 5 ەسەگە دەيىن ءوستى. قازىر ءۇشىنشى اياگوز-شاۋەشەك باعىتىندا تەمىرجول سالىنىپ جاتىر. بۇل جوبا اياقتالسا تاسىمالداناتىن جۇكتىڭ كولەمىن جىلىنا 20-25 ميلليون تونناعا دەيىن ارتتىرۋعا مۇمكىندىك تۋادى.

 24.kz