الاتاۋ «اقىلدى قالا» بولادى - جاسلان ماديەۆ
قونايەۆ. KAZINFORM - جۇمىس ساپارى اياسىندا ق ر سيفرلىق دامۋ، يننوۆاتسيالار جانە ايەروعارىش ونەركاسىبى ءمينيسترى جاسلان ماديەۆ الاتاۋ قالاسىنىڭ تۇرعىندارىمەن كەزدەسۋ وتكىزىپ، ازاماتتاردى قابىلدادى.
كەزدەسۋگە سيفرلىق دامۋ مينيسترىگى قۇرىلىمدىق بولىمشەلەرىنىڭ باسشىلارى، الماتى وبلىسى مەن الاتاۋ قالاسى اكىمدىگىنىڭ وكىلدەرى، سونداي-اق بايلانىس وپەراتورلارى مەن «ازاماتتارعا ارنالعان ۇكىمەت» مەملەكەتتىك كورپوراتسياسى وكىلدەرى قاتىستى.
حالىقپەن كەزدەسۋ بارىسىندا مينيستر وبلىستى قولجەتىمدى ينتەرنەت پەن بايلانىسپەن قامتاماسىز ەتۋ، سونداي-اق وڭىردە IT- سالانى دامىتۋ بولىگىندە جۇرگىزىلىپ جاتقان جوبالار مەن جۇمىستار تۋرالى ايتتى.
مەملەكەت باسشىسى الاتاۋ قالاسىن فلاگماندىق جوبامەن ايقىندادى. ءدال وسى جەردە جەتەكشى حالىقارالىق ىسكەرلىك حابقا اينالاتىن جاڭا ينتەگراتسيالانعان مەگاپوليس سالۋ جوسپاردا.
سيفرلىق دامۋ مينيسترلىگىنىڭ باسشىسى الاتاۋ قالاسى «اقىلدى قالا» ەكەنىن اتاپ ءوتتى.
«الماتى وبلىسىندا قازىردىڭ وزىندە اقىلدى تەحنولوگيالار ەنگىزىلىپ، «Smart City» تۇجىرىمداماسى ىسكە اسىرىلۋدا. قازىرگى ۋاقىتتا قونايەۆ قالاسىندا «109» ءبىرىڭعاي بايلانىس ورتالىعى، «السەكو» ءبىرىڭعاي ەسەپ ايىرىسۋ ورتالىعى جۇمىس ىستەيدى، بارلىق اۆتوبۋستاردا ەلەكتروندىق بيلەتتەۋ جۇيەسى ىسكە اسىرىلدى. مەكتەپتەردە قاۋىپسىزدىكتى قامتاماسىز ەتۋ ءۇشىن پوليتسيانىڭ جەدەل باسقارۋ ورتالىعىنا كىرۋدى باسقارۋ جانە باقىلاۋ كامەرالارى ورناتىلعان»، - دەدى جاسلان ماديەۆ.
اۆتور
الما مۇقانوۆا
