الاكول جاعالاۋىن نىعايتۋعا 30 ميلليارد تەڭگە بولىنەدى

استانا. قازاقپارات - الاكول جاعالاۋىن نىعايتۋ جۇمىستارىنا 2027 -جىلى شامامەن 30 ميلليارد تەڭگە باعىتتاۋ جوسپارلانىپ وتىر. قۇرىلىس كەلەسى جىلى باستالماق. الايدا بولىنەتىن قاراجاتتىڭ ءتيىمدى جۇمسالۋى، جوبالاردىڭ ساپاسى مەن مەردىگەرلەردىڭ جۇمىسى قاتاڭ باقىلاۋدا بولۋى كەرەك. 

Алакөлде жел 28 м/с-қа дейін күшейеді: Қазақстанның бірқатар өңірінде ескерту жарияланды
Фото: ЖИ

 بۇل تۋرالى ءماجىلىس دەپۋتاتى ەكاتەرينا سمولياكوۆا 24KZ تەلەارناسىنا بەرگەن سۇحباتىندا ايتتى.

دەپۋتاتتىڭ سوزىنشە، الاكول - جىل سايىن شامامەن 4 ميلليون ادامعا قىزمەت كورسەتەتىن ءىرى تۋريستىك ايماق. سوندىقتان ونىڭ ينفراقۇرىلىمىن جاقسارتۋ ماڭىزدى. كۋرورتتاعى باستى ماسەلەلەردىڭ ءبىرى - جاعالاۋدى تولقىن شايىپ، جىل سايىن ءبۇلدىرۋى. بۇعان قوسا، اباي جانە جەتىسۋ وبلىستارىنىڭ اۋماعىنداعى تۋريستىك باعىتتا جول ماسەلەسى دە شەشىمىن كۇتىپ تۇر. ەكى وبلىستىڭ اراسىنداعى شامامەن 8 شاقىرىم جول بىرنەشە جىلدان بەرى جوندەلمەگەن. الاكولگە كەلەتىن تۋريستەر دە، جەرگىلىكتى تۇرعىندار دا جولدىڭ جاعدايىن ۇنەمى ايتىپ ءجۇر. حالىقتىق قۇرىلىس جىلى اياسىندا وسى جانە باسقا دا ينفراقۇرىلىمدىق ماسەلەلەر شەشىلەدى دەپ ۇمىتتەنەمىز. ءبىراق بولىنەتىن ءار تەڭگەنىڭ قايدا جۇمسالاتىنىن، جوبانىڭ ساپاسىن جانە مەردىگەردىڭ كىم ەكەنىن مۇقيات تەكسەرۋ قاجەت، - دەدى ەكاتەرينا سمولياكوۆا.

دەپۋتات تۋريزمدى تەك دەمالىس پەن ساياحات سالاسى رەتىندە قاراستىرۋعا بولمايتىنىن اتاپ ءوتتى. بۇل باعىت كولىك، قۇرىلىس، ساۋدا، كادر دايارلاۋ جانە قىزمەت كورسەتۋ سياقتى 20-دان استام سالامەن تىعىز بايلانىستى. سوندىقتان تۋريزمنىڭ دامۋى جالپى ەكونوميكاعا دا اسەر ەتەدى. 2025 -جىلدىڭ قورىتىندىسى بويىنشا تۋريزمنىڭ ەلدىڭ جالپى ىشكى ونىمىندەگى ۇلەسى 3,2 پايىزعا جەتىپ، ەكونوميكالىق كولەمى 5 تريلليون تەڭگەنى قۇراعان. سالادا 650 مىڭنان استام ادام ەڭبەك ەتەدى. ال تۋريستىك باعىتقا تارتىلعان ينۆەستيتسيا كولەمى الدىڭعى كەزەڭمەن سالىستىرعاندا 18 پايىزعا وسكەن.

دەپۋتاتتىڭ پىكىرىنشە، تۋريزمگە ينۆەستيتسيا تارتۋ ءۇشىن ەڭ الدىمەن ينجەنەرلىك جانە كولىك ينفراقۇرىلىمىن دامىتۋ قاجەت. ينۆەستور قوناقۇي نەمەسە دەمالىس ورنىن سالۋعا نيەتتى بولعانىمەن، جول، سۋ، ەلەكتر جانە باسقا دا قاجەتتى جەلىلەر دايىن بولماسا، جوبانى جۇزەگە اسىرۋ قيىندايدى. بۇعان قوسا، كاسىپكەرلەر ءۇشىن تۇراقتى ءارى تۇسىنىكتى زاڭنامالىق تالاپتار بولۋى ماڭىزدى. مەملەكەت تۋريستىك نىساندار سالاتىن كاسىپكەرلەرگە ءبىرقاتار قولداۋ تەتىگىن ۇسىنادى. ماسەلەن، قوناقۇي سالۋ نەمەسە ونى قايتا جاڭعىرتۋ شىعىندارىنىڭ 10 پايىزىنا دەيىن، ۆيزيت ورتالىقتارى مەن تۋريستىك كولىك ساتىپ الۋ شىعىندارىنىڭ 25 پايىزىنا دەيىن وتەلۋى مۇمكىن.

سونىمەن بىرگە سالاداعى قىزمەت كورسەتۋ ساپاسىن ارتتىرۋ ءۇشىن بىلىكتى ماماندار دايارلاۋ قاجەت. دەپۋتات تۋريستەرمەن تىكەلەي جۇمىس ىستەيتىن گيدتەر مەن ەكسكۋرسوۆودتاردىڭ كاسىبي دەڭگەيى ەلدىڭ تۋريستىك كەلبەتىن قالىپتاستىراتىنىن ايتتى. وسى باعىتتا گيدتەر مەن ەكسكۋرسوۆودتاردى دايارلاۋ جانە سەرتيفيكاتتاۋ ەرەجەلەرى جەتىلدىرىلگەن. تۋريزم ماماندىقتارى بويىنشا ءبىلىم بەرۋ مۇمكىندىكتەرى دە كەڭەيىپ كەلەدى. تۋريستى قارسى الاتىن گيد - ەلىمىزدىڭ ۆيزيتتىك كارتوچكاسى. سوندىقتان ونىڭ ساۋاتتى سويلەۋى، دۇرىس اقپارات بەرۋى جانە ساپالى قىزمەت كورسەتۋى وتە ماڭىزدى. تۋريزمدى دامىتامىز دەسەك، ەڭ الدىمەن ادامعا، ياعني بىلىكتى مامان دايارلاۋعا باسىمدىق بەرۋىمىز كەرەك، - دەدى دەپۋتات.