الاكول اۋدانىندا ءۇش اۋىل جولدىڭ ازابىن تارتىپ وتىر
جەتىسۋ وبلىسى. KAZINFORM - جەتىسۋ وبلىسىنىڭ الاكول اۋدانىنداعى قابانباي-كوكتۇما تاسجولىنىڭ ۇزىندىعى 97 شاقىرىم. وبلىستىق ماڭىزى بار جول وسىدان ەكى جىل بۇرىن عانا ورتاشا جوندەۋدەن وتكەن، الايدا حالىق جولدىڭ ساپاسىنا نارازى.
بۇل جولدىڭ 35 شاقىرىمىنا 2020-2022 -جىلدار ارالىعىندا ورتاشا جوندەۋ جۇمىستارى جۇرگىزىلگەن. بيىل وي-شۇڭقىرى جامالىپ، جولاعىن سىزۋ باستالعان. ءبىراق بيباقان-توقجايلاۋ-ءۇشبۇلاق اۋىلدارىندا بۇل جۇمىستاردان تىس قالعان. قاشىقتىعى 11 شاقىرىم بولاتىن بيباقان مەن توقجاۋلايلاۋ ەلدىمەكەندەرىنىڭ ورتاسىنداعى جولدىڭ ساپاسى وتە ناشار.
«قابانباي مەن توقجايلاۋدىڭ اراسى 45 شاقىرىم. ەكى ورتانى ءبىر جارىم ساعات جۇرەمىز. 10 جىلداي بولدى ايتا-ايتا شارشادىق. حالىق مەزى بولدى. اۋدان اكىمى، وبلىستان باسشىلار اۋىلعا كەلگەن سايىن ايتامىز. ناتيجە جوق» - دەيدى اۋىل تۇرعىنى اراي كەرىمقۇلوۆ.
جەتىسۋ وبلىسى بويىنشا ەكونوميكالىق تەرگەپ تەكسەرۋ دەپارتامەنتىنە ارىزدانعان توقجايلاۋ اۋىلىنىڭ تۇرعىندارى جولعا جاۋاپتى مەردىگەر مەن تاپسىرىس بەرگەن مەكەمەلەردى تەكسەرۋدى سۇراپ وتىر.
«جولدى جاسايتىندار ءبىزدىڭ اۋىلدىڭ تۇسىنا جەتكەندە بولىنگەن اقشا جەتپەي قالدى دەيدى. قاراجات بولىنگەننەن كەيىن ءبىراق بولىنبەي مە؟ ساناعان كەزدە قالاي سانايدى؟ اۋىلدا اۋرۋحانا دا جوق. ورتالىققا جەتە الماي جولدا بوسانىپ قالعانداردا بار» - دەدى اۋىل تۇرعىنى ارداق ارشابايەۆ.
قازاقپارات ءتىلشىسى توقجايلاۋلىقتاردىڭ شاعىمىن وبلىستىق جولاۋشىلار كولىگى جانە اۆتوموبيل جولدارى باسقارماسىنا جەتكىزگەن ەدى.
«وبلىستىڭ جولاۋشىلار كولىگى جانە اۆتوموبيل جولدارى باسقارماسى بۇل جولدى 2025 -جىلعى جوبالار تىزبەسىنە ەنگىزىگەن. قازىرگى ۋاقىتتا 2025 -جىلعى بەكىتىلگەن وبلىستىق بيۋدجەتكە بيۋدجەتتىك ءوتىنىم دايىندالۋدا. قۇرىلىس-مونتاجداۋ جۇمىستارىن 2025 -جىلدىڭ II توقسانىندا باستاۋ جوسپارلانۋدا»، - دەيدى جەتىسۋ وبلىسىنىڭ جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ايدوس دوسجانوۆ.
تىكە تارتسا تۋريستەردى تاۋ ىشىمەن كولگە جەتكىزەتىن كۇرە جولعا كوڭىل بولىنبەي كەلەدى.
ەسكە سالا كەتەيىك بۇعان دەيىن ەلىمىزدە جول سالاتىن جانە جوندەيتىن مەردىگەر كومپانيالاردىڭ رەيتينگى ازىرلەنەتىنىن جازعانبىز.
اۆتور
ايبەك قۇتتىبەك
