اكتيۆتەردى قايتارۋ جونىندەگى كوميتەت قانداي حالىقارالىق ۇيىمدارمەن تىعىز جۇمىس ىستەيدى

استانا. KAZINFORM - باس پروكۋراتۋرا اكتيۆتەردى قايتارۋ جونىندەگى كوميتەت قانداي حالىقارالىق ۇيىمدارمەن تىعىز جۇمىس ىستەپ جاتقانىن ءمالىم ەتتى.

«زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭمەن (بۇدان ءارى - زاڭ) ايقىندالعان ماقساتتار مەن مىندەتتەر تۇرعىسىندا اكتيۆتەردى قايتارۋ جونىندەگى كوميتەت حالىقارالىق-قۇقىقتىق ىنتىماقتاستىقتى نىعايتادى، سونداي-اق شەتەلدىك ورگاندارمەن جانە سۇرانىسقا يە حالىقارالىق ۇيىمدارمەن تۇراقتى ءوزارا ءىس-قيمىل جاسايدى. اتاپ ايتقاندا، اقپارات الماسۋ «CARIN» ،«ARIN- AP» جەلىلەرى، سونداي-اق قورعالعان ينتەرپول ارنالارى جانە GlobE Network جەلىلەرى ارقىلى جۇرگىزىلەدى. بيىل كوميتەت ينتەرپولدىڭ «كۇمىس بيۋللەتەن» جانە «كۇمىس حابارلاما» اكتيۆتەردى قايتارۋدىڭ جاڭا قۇرالىن ازىرلەۋ جونىندەگى جۇمىس توبىنا مۇشە بولدى جانە ونىڭ جۇمىسىنا بەلسەندى قاتىسادى. گلوبي جاھاندىق سىبايلاس جەمقورلىققا قارسى جەدەل جەلىسىنە مۇشەلىككە الىندى. جەدەل اقپارات پەن سۇرانىستاردى ءوزارا الماسۋ ءۇشىن بايلانىس ارناسى ورناتىلدى. ۇرلانعان اكتيۆتەردى قايتارۋ بويىنشا ب ۇ ۇ ەسىرتكى جانە قىلمىس باسقارماسىمەن جانە دۇنيەجۇزىلىك بانكتىڭ ستار باستاماسىمەن ءوزارا ءىس-قيمىل جولعا قويىلعان»، - دەپ اتاپ وتەدى باس پروكۋراتۋرادان اگەنتتىكتىڭ رەسمي ساۋالىنا وراي.

ۆەدومستۆونىڭ مالىمەتىنشە، كوميتەت اكتيۆتەردى قايتارۋمەن تىكەلەي نەمەسە جاناما بايلانىسى بار بارلىق حالىقارالىق ۇيىمدارمەن جانە ءوزارا ءىس- قيمىل جەلىلەرىمەن سەرىكتەستىك ورناتۋ جۇمىستارىن جالعاستىرىپ جاتىر.

ايتا كەتەيىك، وتكەن جىلدىڭ 26-قىركۇيەگىندە قايتارىلعان اكتيۆتەردى باسقاراتىن كومپانيا قۇرۋ تۋرالى ۇكىمەت قاۋلىسى شىقتى.

2022 -جىلدىڭ باسىنان ەلىمىزدىڭ قۇقىق قورعاۋ، ارناۋلى مەملەكەتتىك، ۋاكىلەتتى مەملەكەتتىك ورگانداردىڭ شارالارىمەن قۇنى 1,5 تريلليون تەڭگەدەي بولاتىن اكتيۆتەر قايتارىلدى.

اۆتور

مارلان جيەمباي