اكەلەر بالا تاربيەسىنە نەگە از ارالاسادى

استانا. KAZINFORM - قازاق قوعامىندا بالامەن ساۋ قارىم-قاتىناس قۇراتىن اكەنىڭ ناقتى ءبىر ۇلگىسى قالىپتاسپاعان. «بۇگىن LIVE» باعدارلاماسىنا سۇحبات بەرگەن مەديا مامان، «ايەلىممەن اڭگىمە» كىتابىنىڭ اۆتورى مارعۇلان اقان ءدال وسىنداي پىكىر ءبىلدىردى.

ول پەرزەنتىنە اكەلىك تاربيە بەرۋ جولىندا جارىنىڭ دا كوپ كومەگى تيگەنىن ايتادى.

- مەنىمەن قاتارلاس بۋىن قاتاڭ ءتارتىپ، ەرەجەسى بار قالىپتىڭ ىشىندە ءوستى. ارتىق ءسوز سويلەسەك، ۇرىس ەستىپ، تاياق جەيتىنبىز. ال قازىرگى بالالار مۇلدە باسقا. سەبەبى، تىم ەركىن بولعىسى كەلەدى. ودان بولەك، قازىرگى قوعامدا ايەلدەردىڭ ءرولى كىشكەنە بولسا دا ارتىپ، ەر ادامعا ءوز ويىن ەركىن جەتكىزە الاتىن بولدى. سونىڭ ارقاسىندا ءبىز دە بەيىمدەلىپ كەلە جاتىرمىز. مەنىڭ وزىمدە سولاي بولدى. بالاعا قالاي قارىم-قاتىناس جاساۋ كەرەكتىگى جونىندە ايەلىم كوپ كومەكتەستى. ويتكەنى ايەلىم - پسيحولوگ، - دەيدى جازۋشى.

ستۋديا قوناعى بالا تاربيەسىنە كوپ كوڭىل بولەتىنىن ايتادى. ءتىپتى دەمالىس كۇندەرىن تولىقتاي وتباسىنا ارنايدى ەكەن.

- مەن بالاما كوبىرەك ۋاقىت بولۋگە تىرىسامىن. ادەتتە سەنبى، جەكسەنبى كۇندەرىن تولىقتاي وتباسىما ارنايمىن. سول كۇنى سىرتقا شىعىپ، قىدىرامىز. مەن بالاعا تاربيەنى قارىم-قاتىناستى نىعايتۋ ارقىلى بەرەمىن. ءجاي عانا ويناتا بەرۋدەن گورى، بالامەن كوبىرەك سويلەسەمىن. ول سۇراق قويسا، بالام تولىقتاي تۇسىنگەنشە جاۋاپ بەرەمىن. ۇلىممەن تەڭ دارەجەدە سويلەسۋگە، ونىڭ دەڭگەيىنە تۇسۋگە تىرىسامىن. كەيدە جۇيكە شىداماۋى مۇمكىن، ءبىراق شىداۋ كەرەك. ونىڭ باسقا جولى جوق. كوبىنە تاربيەلەپ، سويلەسەتىن - اناسى. ونى جوققا شىعارا المايمىن. اناسى قۇرساقتا جاتقاننان قالاي سويلەسە، 1-2 ايلىعىندا دا سولاي سويلەسەتىن. مەنىمەن قالاي اڭگىمە ايتسا، تۋرا سولاي بالاممەن دە سويلەسەتىن، - دەيدى مارعۇلان اقان.

دەسە دە، مەديا مامان قازىرگى تاڭدا قازاق قوعامىندا ۇلگى تۇتاتىن اكەنىڭ مودەلى قالىپتاسپاعانىن ايتادى.

- مەن بالانىڭ جىلاعانىنا شىداي المايمىن. سەبەبى، كىشكەنتاي كەزىمدە اعالارىم، ۇيدەگى ۇلكەندەر «سەن ەركەكسىڭ، جىلاما» دەيتىن. ايەلىم بالا جىلاسا، شىدامدى بولۋعا دا ۇيرەتتى. بىرتىندەپ ارەكەت ەتۋ ارقىلى ساۋ قارىم-قاتىناس ورناتاتىن اكەنىڭ مودەلىن جاساپ شىعارا الامىز دەپ ويلايمىن. ءبىراق ءدال قازىر سونداي مودەل بىزدە ءالى جوق، - دەيدى اكە.

جازۋشىنىڭ بۇل پىكىرىمەن باسپاگەر باقىتجان بۇقارباي دا كەلىسەدى. سەبەبى ءار وتباسىنىڭ جاعدايى ءارتۇرلى دەيدى ول.

-ءبىز بىلتىر «زامانمەن ساناسقان 30 اكەنىڭ حيكاياسى» كىتابىن شىعاردىق. قازىرگى ءار سالادا قىزمەت ەتەتىن 30 اكەنىڭ تاجىريبەسىن ءبىر جيناققا بىرىكتىردىك. قوعامدا ورتاق ءبىر مودەل بار دەپ ايتا المايمىن. بۇل - قايتالانبايتىن تاجىريبە عوي. اركىم ءارتۇرلى، اركىمنىڭ كونتەكستى، جاعدايى، ايتارى بولەك. 30 اكەنىڭ ءبىر-بىرىنە ۇقساستىعى از. ارينە «بىرەۋدىڭ اقىسىن جەمە، الا ءجىبىن اتتاما» دەگەن ۇستانىمدار بارشامىزعا ورتاق قوي. دەسە دە، ولار قانداي كىتاپتار وقىپ جاتىر، بولاشاققا قالاي دايىندالىپ جاتىر نەمەسە وزدەرىندەگى اكەلىك جاۋاپكەرشىلىكتى ارتتىرۋ ءۇشىن قانداي ارەكەتتەرگە بارىپ جاتىر؟ بۇل اقىل-كەڭەستەر كوپ جاعدايدا قايتالانبايدى. اركىمنىڭ ءوزىنىڭ جەكە-دارا تاجىريبەسى بار. سول تاجىريبەلەردى كىتاپتا بولىستىك، - دەيدى باسپاگەر.

اۆتور بۇل كىتاپتى جازۋعا نە سەبەپ بولعانىن ءتۇسىندىردى.

- بۇل كىتاپتى جازۋعا قازىرگى اكەلەردىڭ بالالارىنا تاربيە بەرە الماي جاتقانى تۇرتكى بولدى. ءتىپتى بالاسىنا قاراۋعا ۋاقىتى دا جەتپەيدى. بۇل ماسەلەنىڭ تۋىنداۋىنا ەكى سەبەپ بار. ءبىرىنشىسى - كەيدە اكەلەردىڭ تاربيە ماسەلەسىنە قاتىستى ءوزىن جەتىلدىرۋ، ءبىلىم جيناقتاپ، ىزدەنۋى جەتىسپەيدى. «مەن ونسىز دا ءبارىن بىلەمىن» نەمەسە «ايتەۋىر اسىراپ جاتىرمىن، تاماعى توق، كيىمى ءبۇتىن - قالعانىن اناسى ىستەيدى» دەپ ويلايدى. ەكىنشى فاكتور — ءبىزدىڭ حالقىمىزدىڭ ءبىرازىندا نەسيە ماسەلەسى بار. ءناپاقا تابۋ كوپ ۋاقىت الادى دا، اكەلەردىڭ ىزدەنىسكە ارنايتىن ۋاقىتى دا، كۇش- قۋاتى دا بولا بەرمەيدى. سوندىقتان ءبىزدىڭ ماقساتىمىز — وقىرمانعا اكەلىك مودەلدەردەن، اكەلىك تاربيە ۇلگىلەرىنەن تۇراتىن شۆەد داستارحانىن جايىپ بەرۋ بولدى، — دەيدى باقىتجان بۇقارباي.

اۆتور

ارۋجان ماحمۋت