ەۆاكۋاتسيالانعان قازاقستاندىقتار يزرايلدەگى جاعداي تۋرالى ايتتى
ەۆاكۋاتسيالانعان قازاقستاندىقتار ەلگە ۇشىپ كەلگەننەن كەيىن يزرايلدەگى جاعداي تۋرالى ايتتى، دەپ حابارلايدى Kazinform.

استانا قالاسىنىڭ تۇرعىنى ايگۇل ابدىكەروۆا نەمەرەسىمەن يزرايلگە قىدىرىپ بارعان. ول جەردە ءبىر اي بولعان.
«وسىدان ءبىر اي بۇرىن گەرتسليا قالاسىنا نەمەرەم ەكەۋىمىز قىدىرىپ بارعان ەدىك. ول جاقتا قىزىم مەن كۇيەۋ بالام تۇرادى. ولار سول ەلدە جۇمىس ىستەيدى. سەگىزىنشى قازان كۇنى قايتۋىم كەرەك ەدى، سوعىسقا بايلانىستى رەيستەر توقتاتىلدى. ويلاماعان جەردەن سوعىس باستالىپ كەتتى. سيرەنا ويناعان كەزدە، بومبادان قورعاناتىن جەردە تىعىلىپ وتىردىق. قورقىنىش بولدى. ءبىزدى قيىن جاعدايعا قالدىرماعان قازاقستاننىڭ يزرايلدەگى ەلشىلىگىنە، ارنايى رەيس ۇيىمداستىرعان اۋە كومپانياسىنا راحمەت ايتقىم كەلەدى. سول كىسىلەردىڭ ارقاسىندا ەلگە امان- ەسەن ورالدىق. الايدا، قىزىم مەن كۇيەۋ بالام سول جاقتا قالدى. ەندى سولاردى ۋايىمداپ تۇرمىن»، - دەدى ايگۇل ابدىكەروۆا.
تەل- اۆيۆتەن ۇشىپ كەلگەن قازاقستاندىق ارتۋر كوۆاليەۆسكي ءوز ەلىن شەكسىز ماقتان تۇتاتىنىن ايتتى.
«ءبىز سوڭعى ۋاقىتقا دەيىن ۇرىس ايماعىنان تەز كەتەمىز دەپ ۇمىتتەندىك، ويتكەنى مەن ەشقاشان مۇنداي نارسەنى سەزىنگەن ەمەسپىن - سيرەنانىڭ جاعىمسىز داۋسى، جارىلىس وتە قورقىنىشتى. قاتەلەسپەسەم، قازاقستان - ءوز ازاماتتارىن شۇعىل قايتارىپ العان جالعىز ەل. چات، ءبارى- ءبارى دەرەۋ اشىلدى. وندا مينيسترلىكتىڭ، Air Astana-نىڭ قىزمەتكەرلەرى جان- جاقتى قولداۋ كورسەتتى. سول ءۇشىن دە العىسىمىز شەكسىز. ءوز ەلىمدى وتە ماقتان تۇتامىن»، - دەدى ول.
سونداي- اق، كەلگەندەردىڭ اراسىندا «بولاشاق» باعدارلاماسى اياسىندا تاعىلىمدامادان وتۋگە بارعان ستيپەندياتتار بار.
اينۇر وماروۆا يزرايلدىڭ حايفا قالاسىنا ءبىرىنشى قازان كۇنى وقۋعا بارعان. مەديتسينا سالاسى بويىنشا ءبىلىمىن جەتىلدىرۋگە اتتانعان دارىگەرلەر ساناۋلى كۇن عانا ءبىلىم الدى.
«مەن «بولاشاق» باعدارلاماسى بويىنشا حايفا قالاسىنا تاعىلىمدامادان ءوتۋ ءۇشىن 1- قازاندا باردىم. ءبارى جاقسى باستالىپ ەدى، ءبىراق 10 كۇننەن كەيىن وسىنداي جاعدايعا تاپ بولدىق. توتەنشە جاعدايعا بايلانىستى ەلدەن كەتۋگە ءماجبۇر بولدىق. ءبارى ويداعىداي بولىپ، سول جەرگە قايتامىز دەپ ۇمىتتەنەمىز. ويتكەنى، يزرايلدە مەديتسينا وتە جاقسى دامىعان»، - دەيدى اينۇر وماروۆا.
سەمەي قالاسىنان يزرايلگە بارعان ءۇمىت جەلدىبايەۆانىڭ ايتۋىنشا، جەرگىلىكتى حالىق باس ساۋعالايتىن جەر تاپپاي جاتىر.
«سەمەيدەن «بولاشاق» باعدارلاماسى بويىنشا ءۇش ايعا يزرايلدىڭ حايفا قالاسىنا وقۋعا باردىق. نەگىزى مەنىڭ تاعىلىمدامامنىڭ بىتۋىنە ءۇش اپتا ۋاقىت قالعان ەدى. وسى قاقتىعىسقا بايلانىستى ءبىزدى وتانىمىزعا قايتاردى. توبەدەن ۇشىپ جاتقان ۇشاقتار مەن سيرەنانىڭ داۋىسى، گۋىلى ۇرەي تۋدىردى. يزرايلدەگى قازاقستاننىڭ وكىلەتتى جانە توتەنشە ەلشىسى بىزگە جاقسى كومەكتەستى. پاتەرىمىزدىڭ الدىنا دەيىن كەلىپ، الىپ كەتەتىن كولىك ۇيىمداستىرىپ بەردى. قورقىنىشتى جاعدايدى كوزبەن كوردىك. حالىق باس ساۋعالايتىن جەر تاپپاي جاتىر»، - دەدى سەمەي قالاسىنان يزرايلگە بارعان ءۇمىت جەلدىبايەۆا.
بۇعان دەيىن 124 قازاقستاندىق ارنايى رەپاترياتسيالىق رەيسپەن ەلگە جەتكىزىلگەنى تۋرالى جازعان ەدىك.
اۆتور
الما مۇقانوۆا