اجىراسقان ءار 10 وتباسىنىڭ جەتەۋىندە جانجال لۋدومانيا سالدارىنان شىققان - دەپۋتات

بۇگىن ءماجىلىستىڭ جالپى وتىرىسىندا دەپۋتات نارتاي سارسەنعاليەۆ ەلىمىزدە اجىراسقان ءار 10 وتباسىنىڭ جەتەۋىندە جانجال لۋدومانيا سالدارىنان شىعاتىنىن ايتتى، دەپ حابارلايدى Kazinform.

нартай
Фото: Фото: Мәжіліс

«ەلىمىزدە قازىر 350 مىڭنان استام ادام قۇمار ويىننىڭ «ينەسىنە» وتىرعان. 2019 -جىلمەن سالىستىرعاندا، بىلتىر قۇمار ويىندارعا ءباس تىگۋ ەلىمىزدە 40 ەسەگە كوبەيگەن. بۋكمەكەر كەڭسەلەردىڭ ءبىر جىلدىق قارجى اينالىمى 1 تريلليون تەڭگە بولعان. لۋدومانيا دەرتىنە شالدىققان 174 مىڭ جاس قازاقستاندىق 36 ميلليارد تەڭگەگە ءباس تىككەن. قازىر قۇمار ويىننىڭ شىرماۋىنا تۇسكەندەر شەتىنەن قىلمىسكەر بولىپ جاتىر. بىلتىر 157 مىڭنان استام قىلمىس جاسالسا، سونىڭ 20 پايىزى قۇمار ويىنعا قۇننىققانداردىڭ موينىندا. سۋيتسيد جاساعان 3676 وتانداسىمىزدىڭ ءار بەسىنشىسى لۋدومانيا دەرتىنە شالدىققان دەگەن دەرەك كەلدى. بۇل لۋدومانيا ءبىر ادامنىڭ تاعدىرىن ەمەس، تۇتاس وتباسىلاردى بۇلدىرەدى. ەلىمىزدە اجىراسقان ءار 10 وتباسىنىڭ جەتەۋىندە جانجال لۋدومانيا سالدارىنان شىققان. ال ءبىز وسىمەن قالاي كۇرەسىپ جاتىرمىز؟ ەلىمىزدە قوعامدىق كولىكتىڭ سىرتىن، تۇرعىن ۇيلەردىڭ قاسبەتىن تۇگەلدەي قۇمار ويىنداردىڭ جارناماسىنا بەردىك»، - دەدى ن. سارسەنعاليەۆ.

سونىمەن قاتار دەپۋتات ۇلتتىق سپورت الاڭدارى، كوكپار مەن بايگەنىڭ ءبارى توتاليزاتوردىڭ ورنىنا اينالىپ كەتكەنىن ايتتى.

«ۇلتىمىزدى ساقتايمىز دەپ جۇرگەندە ۇلتتىق سپورتىمىزدى قۇمار ويىننىڭ الاڭىنا اينالدىرۋ كىمگە كەرەك بولعانىن سۇراعىم كەلەدى. ۇلتىمىزدى، جۇرتىمىزدى قۇرتىپ جاتقان قۇمار ويىنداردى تۇگەل توقتاتىن كەز كەلدى عوي؟!»، - دەدى نارتاي سارسەنعاليەۆ.

ءوز كەزەگىندە پرەمەر- ءمينيستردىڭ ورىنباسارى تامارا دۇيسەنوۆا دەپۋتات كوتەرگەن ماسەلەمەن كەلىسەتىنىن ايتتى.

«بۇل تاقىرىپ — وتە وزەكتى. ويىن بيزنەسى تۋرالى زاڭ 2007 -جىلى قابىلدانعان. ونداعى نورمالار قازىرگى وزگەرىستەرگە جاۋاپ بەرە المايدى. ماسەلەن، جارناماعا قارسى، بالالاردىڭ ويىنىنا ەشقانداي شەكتەۋ جوق. سوندىقتان پارلامەنت دەپۋتاتتارى باستاماسىمەن ەنگىزىلىپ جاتقان تۇزەتۋلەردىڭ بارلىعىن قۇزىرەتتى ورگاندارمەن بىرگە قاراپ شىقتىم. بيزنەسكە ءتيىستى شەكتەۋ سالاتىن 16 ۇسىنىستى ۇلتتىق ەكونوميكا مينيسترلىگىمەن پىسىقتاپ جاتىرمىز. بۇل تۇرعىدا 8 شەكتەۋ بويىنشا جۇمىستار اياقتالۋعا جاقىن. قالعان 8- ءى كەلەر ايدا قارالىپ بولادى. وسىنىڭ ءبارىن جيناقتاپ، پارلامەنتكە كەلەمىز. نەگىزگى ماسەلە نەدە؟ قازىر شەتەل تاجىريبەسىن زەرتتەپ شىقتىق. جالپى، ويىن ءتارتىبى بار ەكەن. وعان سايكەس ويىننىڭ ۋاقىتىنا، ستاۆكا دەڭگەيىنە قاتىستى ليميتى بولۋى كەرەك. سوندىقتان بۇل باعىتتا ءتيىستى شەكتەۋلەردى قويىپ جاتىرمىز»، - دەپ ءتۇسىندىردى ۇكىمەت باسشىسىنىڭ ورىنباسارى.

تامارا دۇيسەنوۆا قۇمار ويىننىڭ جارناماسىنا تىيىم سالۋ ماسەلەسىنە دە توقتالدى.

«اتاپ ايتقاندا، شەتەل تاجىريبەسىنە قاراساق، ءبىر دە ءبىر سىرتقى جارنامادا قۇمار ويىندارىن كورسەتپەۋى كەرەك. سوندىقتان جارناماعا شەكتەۋ جونىندە ءتيىستى نورمانى بەلگىلەدىك. ەندى تەك بۋكمەكەر كەڭسەسىنىڭ ىشىندە، سونداي- اق سپورت تەلەارنالارىندا جارناما جاساۋعا بولادى دەگەن ۇسىنىستى قاراستىرىپ وتىرمىز»، - دەدى ول.

اۆتور

رۋسلان عابباسوۆ

سوڭعى جاڭالىقتار